អន្តរជាតិ
នយោបាយអន្តរជាតិ
អង់គ្លេសនឹងបាត់១ពាន់លានដុល្លារ បើហាម ដូណាល់ ត្រាំ មិនឲ្យចូលអង់គ្លេស 07, Jan 2016 , 3:21 pm
× បេក្ខជនប្រធានាធិបតីបក្សសាធាណរដ្ឋ លោក ដូណាល់ ត្រាំ (Donald Trump) ព្រមានថានឹងដកទុនវិនិយោគ១ពាន់លានដុល្លារអាមេរិកពីអង់គ្លេស បើសមាជិកសភាអង់គ្លេសសម្រេចជាផ្លូវការហាមប្រាមដំណើរទស្សកិច្ចរបស់លោកទៅអង់គ្លេស។ ការជជែកដេញដោលគ្នារវាងសមាជិកសភាពាក់ព័ន្ធវិធានការបែបនេះ កើតឡើងដោយសេដ្ឋីអចលនទ្រព្យអាមេរិកនេះប្រើសម្តីញុះញង់ និងរើសអើងខ្លាំងពេក។
លោក មុំ ពិទូរ្យ លម្អិតព័ត៌មាននេះ
បេក្ខជនប្រធានាធិបតីនាំមុខក្នុងបក្សសាធារណរដ្ឋលោក ដូណាល់ ត្រាំ បានព្រមានហើយថា ក្រុមហ៊ុនលោកនឹងលុបចោលគម្រោងវិនិយោគនៅអង់គ្លេសមានទំហំប្រហែល ១ពាន់លានដុល្លារអាមេរិក បើសិនសភាអង់គ្លេសហាមលោកមិនឲ្យចូលទឹកដីរបស់ខ្លួន។
យោងតាមទីភ្នាក់ងារព័ត៌មាន AFP លោក ដូណាល់ ត្រាំមានទីលានវាយកូនហ្គោលចំនួនពីរនៅស្កុតឡែន ហើយលោកគ្រោងនឹងចំណាយលុយវិនិយោគ ៧០០លានផោនស្មើ១ពាន់លានដុល្លារអាមេរិកដើម្បីពង្រីកជំនួញរបស់ខ្លួន។ ប៉ុន្តែបើសិនចក្រភពអង់គ្លេសហ៊ានហាមលោកមែននោះ លោកនឹងលុបចោលគម្រោងនេះភ្លាម។
សភាអង់គ្លេសគ្រោងនឹងបើកកិច្ចប្រជុំមួយនៅថ្ងៃ ១៨មករា ខាងមុខ ដើម្បីជជែកដេញដោលគ្នាជុំវិញការចេញវិធានការហាមបេក្ខជនប្រធានាធិបតិអាមេរិកបក្សសាធារណរដ្ឋលោក ដូណាល់ត្រាំ មិនឲ្យចូលមកអង់គ្លេសបាន។
សភាបើកកិច្ចប្រជុំក្រោយពេលដែលប្រជាជនអង់គ្លេសច្រើនជាង៥សែននាក់បានដាក់ញត្តិស្នើសុំទៅកាន់សភាឲ្យដាក់ចេញចំណាត់ការប្រឆាំងលោក ដូណាល់ ត្រាំ ដោយសារមូលហេតុថា អ្នកនយោបាយអាមេរិកនេះប្រើប្រាស់ពាក្យសម្តីរើសអើង និងញុះញង់។ ជាធម្មតាកាលណាបើមានប្រជាជន១សែននាក់ដាក់ញត្តិហើយនោះ សភាអាចបើកកិច្ចប្រជុំដើម្បីជជែកពិភាក្សាគ្នាតាមការស្នើសុំរបស់ប្រជាជនបាន។
លោក ដូណាល់ ត្រាំ បន្តថ្លែងសារបង្កប់ដោយភាពរើសអើងពូជសាសន៍ និងសាសនា មិនចេះចប់មិនចេះហើយ។ ដូចដែលឃើញស្រាប់លោក បានស្នើឲ្យមានការហាមឃាត់ប្រជាជនម៉ូស្លីមចូលមកទឹកដីអាមេរិក ក្រោយមានការវាយប្រហារនៅ San Bernardino ។ ក្រៅពីនេះ លោកក៏បានធ្វើត្រាប់ក្នុងន័យប្រមាថអ្នកសារព័ត៌មាន និងមាក់ងាយជនអន្តោប្រវេសន៍ម៉ិចស៊ីកូដែលចូលមករស់នៅអាមេរិកជាដើម។
កន្លងមកនាយករដ្ឋមន្ត្រីអង់គ្លេសលោក ដេវីដ ខេមេរ៉ូន បានថ្កោលទោសពាក្យសម្តីរបស់លោក ដូណាល់ ត្រាំ ដែរ ប៉ុន្តែលោកមិនគាំទ្រឲ្យមានការហាមប្រាមអ្នកនយោបាយអាមេរិកបែបនេះទេ។ អាចថា វាប៉ះពាល់ដល់ទំនាក់ទំនងអាមេរិក និងអង់គ្លេស បើសិនលោក ដូណាល់ ត្រាំ ក្លាយជាប្រធានាធិបតីនោះ។
លោក ដូណាល់ ត្រាំ ក្លាយជាអ្នកនយោបាយមួយរូបដែលមានប្រជាប្រិយភាពខ្ពស់ក្នុងចំណោមសមាជិកបក្សសាធារណរដ្ឋ ហើយលោកក៏ជាបេក្ខជននាំមុខគេដែរក្នុងការប្រជែងក្នុងបក្សដើម្បីឆ្ពោះទៅរកការបោះឆ្នោតប្រធានាធិបតីខាងមុខ៕
© រក្សាសិទ្ធិដោយ thmeythmey.com