អន្តរជាតិ
ឆ្នាំចិន៖ អូបាម៉ា-ស៊ី ឆ្លើយឆ្លងតាមទូរសព្ទ ហើយសន្យាដោះស្រាយបញ្ហាពិភពលោករួមគ្នា 06, Feb 2016 , 12:57 pm
× ខណៈពិធីបុណ្យប្រពៃណីចូលឆ្នាំចិនកំពុងតែខិតជិតមកដល់ មេដឹកនាំកំពូលពិភពលោក លោកប្រធានាធិបតីអាមេរិក បារ៉ាក់ អូបាម៉ា និងសមភាគីរបស់លោក លោកស៊ី ជិនពីង បានឆ្លើយឆ្លងគ្នាតាមរយៈ ទូរសព្ទដើម្បីជូនពរគ្នាទៅវិញទៅមក។ ក្នុងកិច្ចសន្ទនានោះដែរ ប្រមុខដឹកនាំកំពូលទាំងពីរ ក៏បានសន្យាបន្តកិច្ចសហប្រតិបត្តិការល្អនឹងគ្នា និងបន្តដោះស្រាយបញ្ហាពិភពលោករួមគ្នាផងដែរ។
ថ្ងៃសុក្រទី០៥ ខែកុម្ភៈ ម្សិលមិញ លោកប្រធានាធិបតីស៊ី ជិនពីង (Xi Jinping) និង ប្រធានាធិបតីបារ៉ាក់ អូបាម៉ា (Barack Obama) បានជូនពរគ្នាទៅវិញទៅមកក្នុងឱកាសនៃពិធីបុណ្យប្រពៃណីចូលឆ្នាំចិន។ ការសន្ទនានេះត្រូវបានធ្វើឡើងតាមរយៈទូរសព្ទ។ នេះបើយោងតាមភ្នាក់ព័ត៌មាន Xinhau។
ក្នុងកិច្ចសន្ទនានោះ លោកស៊ី ជិនពីង បានអះអាងថា ចិន ពិតជាមានឆន្ទៈក្នុងការចូលរួមជាមួយនឹងភាគីអាមេរិកក្នុងការបន្តកិច្ចសហប្រតិបត្តិការពិតប្រាកដស៊ីជម្រៅលើគ្រប់វិស័យ និងរឹតចំណងការទំនាក់ទំនង និងការសម្របសម្រួលផ្សេងៗលើបញ្ហាអន្តរជាតិ ក្នុងតំបន់ និងបញ្ហាជាសកលដើម្បី ធានាឲ្យបាននូវការអភិវឌ្ឍចំណងទ្វេភាគីដែលប្រកបដោយនិរន្តរភាព និង រឹងម៉ាំ។ នេះបើយោងតាមព័ត៌មានដដែលដែលបានឲ្យដឹងថាភាគីលោក បារ៉ាក់ អូបាម៉ា ក៏បានសម្តែងនូវភាពជារីករាយចំពោះកិច្ចសន្ទនាជាមួយនឹងលោកស៊ី ជិនពីង ក្នុងឱកាសនៃការខិតជិតមកដល់នៃបុណ្យចូលឆ្នាំចិនផងដែរ។
លោក អូបាម៉ា ក៏បានសង្ឃឹមថាទំនាក់ទំនងរវាងភាគីទាំងពីរនឹងបន្តវិវត្ត និងចូលរួមធ្វើការជាមួយគ្នាក្នុង កិច្ចសហប្រតិបត្តិការឲ្យកាន់តែស៊ីជម្រៅនិង បន្តរួមគ្នាលើកកម្ពស់សន្តិភាព សន្តិសុខ និងភាពរុងរឿងនៃប្រទេសទាំងពីរ ក៏ដូចជាសហគមន៍អន្តរជាតិផងដែរ។
ក្នុងឱកាសនៃការជូនពរនោះដែរ លោក អូបាម៉ា និងស៊ី ក៏បានឆ្លៀតនិយាយពីបញ្ហានៅឧបទ្វីបកូរ៉ ពោលគឺបញ្ហានៃការអុកឡុករបស់កូរ៉េខាងជើងក្នុងការត្រៀមបាញ់មីស៊ីលជាថ្មី បន្ទាប់បានបាញ់សាក ល្បងដោយជោគជ័យនាពេលបន្តបន្ទាប់គ្នា។
ក្នុងថ្ងៃជាមួយគ្នានោះដែរ សម្ព័ន្ធមិត្តអាមេរិក ប្រធានាធិបតីកូរ៉េខាងត្បូងលោកស្រីផាក ហ្គឺនហេ( Park Geun-hye) ក៏បានជូនពរគ្នាជាមួយនឹងលោកប្រធានាធិបតីចិន ស៊ី ជិនពីង។ ភាគីទាំងពីរ សន្យាលើក កម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្មក្នុងកម្រិតខ្ពស់។
សូមបញ្ជាក់ផងដែរថាក្រៅពីបញ្ហាដែលបង្កឡើងដោយកូរ៉េខាងជើង រយៈពេលប៉ុន្មានខែចុងក្រោយនេះ ចិន និងអាមេរិក មិនសូវមើលមុខគ្នាចំប៉ុន្មាននោះទេ។ ហើយនោះ ក៏ព្រោះតែរឿងជម្លោះសមុទ្រចិនខាងត្បូង ដោយអាមេរិកបានប្រតិបត្តិការនាវាចម្បាំងរបស់ខ្លួនមកក្បែរតំបន់កោះសិប្បនិម្មិតរបស់ចិនក្រោមហេតុផលនៃការអនុវត្តសិទិ្ធសេរីដែនសមុទ្រអន្តរជាតិ ខណៈចិន ចោទថាអាមេរិក បានបំពានដែនអធិបតេយ្យខ្លួន និងទាមទារឲ្យមានការសុំអនុញ្ញាតពីរដ្ឋាភិបាលចិនជាមុនសិន៕
Tag:
ចូលឆ្នាំចិន
បារ៉ាក់ អូបាម៉ា
ស៊ី ជិនពីង
© រក្សាសិទ្ធិដោយ thmeythmey.com