អន្តរជាតិ
នយោបាយអន្តរជាតិ
លោក ពូទីន នឹងរៀបចំកិច្ចប្រជុំកំពូល រុស្ស៊ី-អាស៊ាន រឹតបន្តឹងដៃគូសេដ្ឋកិច្ចនៅខែឧសភា 06, Feb 2016 , 10:30 pm
× ក្រោមការផ្តួចផ្តើមដោយប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) រុស្ស៊ីនឹងរៀបចំកិច្ចប្រជុំកំពូលរុស្ស៊ី-អាស៊ាន (Russia-ASEAN Summit)នៅខែឧសភាខាងមុខនេះ។ កិច្ចប្រជុំនេះ ធ្វើឡើងដើម្បីរឹតចំណងមិត្តភាពរវាងរុស្ស៊ី និងអាស៊ាន និងទំនាក់ទំនងភាពជាដៃគូសេដ្ឋកិច្ចផងដែរ។
រដ្ឋមន្ត្រីការបរទេសរុស្ស៊ី លោក Sergei Lavrov បានបញ្ជាក់កាលពីចុងខែមករាកន្លងទៅថាកិច្ចប្រជុំ រុស្ស៊ី-អាស៊ាន នឹងត្រូវប្រារព្ធឡើងនៅក្នុងខែឧសភាខាងមុខ នៅក្នុងខេត្ត Sochi នៃប្រទេសរុស្ស៊ី ដែលនឹងផ្តោតសំខាន់លើភាពជាដៃគូសេដ្ឋកិច្ច។ នេះបើយោងតាមកាសែតរុស្ស៊ី sputnik។
តាមប្រភពព័ត៌មានដដែល លោក Sergei Lavrov បានថ្លែងប្រាប់ក្នុងសន្និសីទសារព័ត៌មានថា កិច្ចប្រជុំកំពូលដែលគ្រោងនឹងប្រព្រឹត្តឡើងក្នុងខែឧសភាខាងមុខ គឺជាការផ្តួចផ្តើមរបស់ប្រធាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ក្នុងគោលបំណងឲ្យមានការពិគ្រោះយោបល់រវាងរុស្សី និងដៃគូរបស់ខ្លួនដែលជាសមាជិកនៃសហភាពសេដ្ឋកិច្ចអឺរ៉ាស៊ាន (Eurasian Economic Union) អង្គការសហប្រតិបត្តិការសៀងហៃ (Shanghai Cooperation Organization) និងអាស៊ាន។ លោកបន្ថែមថា ជំនួបនឹងផ្តោតសំខាន់លើលទ្ធភាពផ្សេងៗនៃភាពជាដៃគូសេដ្ឋកិច្ចដើម្បីអាចឈានទៅរកការបង្កើតជាកិច្ចសហប្រតិបត្តិការដែលមានសក្តានុពលថ្មីមួយ។
បើតាមប្រមុខការទូតដដែល ខួបរម្លឹកអនុស្សាវរីយ៍២០ឆ្នាំនៃទំនាក់ទំនងរុស្ស៊ីនិងអាស៊ាន ក៏នឹងត្រូវដាក់បញ្ជូលក្នុងរបៀបវារៈនៃកិច្ចប្រជុំរុស្ស៊ី-អាស៊ានផងដែរ។ រុស្ស៊ី បានចាប់ផ្តើមទំនាក់ទំនងជាមួយនឹងអាស៊ានជាផ្លូវការនៅឆ្នាំ១៩៩៧។
សូមរមឹ្លកផងដែរ កាលពីចុងឆ្នាំ២០១៥កន្លងទៅ ក្នុងឱកាសនៃការធ្វើមហាសន្និបាតប្រចាំឆ្នាំ លោកប្រធានាធិបតីពូទីន ក៏ធ្លាប់បានប្រកាសពីចេតនារបស់រុស្ស៊ី ក្នុងការជំរុញកិច្ចសហប្រតិបត្តិការជាមួយនឹងសមាជិកអង្គការសហប្រតិបត្តិការសៀងហៃ និងអាស៊ានផងដែរ។ នេះមានន័យថា ២០១៦នេះ រុស្ស៊ី នឹងមានគោលនយោបាយការបរទេសច្រើនរូបភាពមករកបណ្តាប្រទេសដែលជាសមាជិកនៃអង្គការទាំងពីរផងដែរ។
សូមបញ្ជាក់ផងដែរ សមាជិកនៃសមាគមប្រជាជាតិអាស៊ីអាគ្នេយ៍ឬហៅកាត់ថាអាស៊ាន មានដូចជា ព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី វៀតណាម និង ថៃ។ កាលពីចុងឆ្នាំ២០១៥កន្លងទៅនាយករដ្ឋមន្ត្រីរុស្ស៊ី Dmitry Medvedev ក៏បានទស្សនកិច្ចលើកដំបូងមកកាន់កម្ពុជាដែលជាសមាជិកអាស៊ានមួយផងដែរ៕
© រក្សាសិទ្ធិដោយ thmeythmey.com