អន្តរជាតិ
លោក Donald Trump៖ កុំមាក់ងាយទេពកោសល្យរបស់លោក គីម ជុងអ៊ុន 07, Feb 2016 , 10:30 pm
× ខណៈសហគមន៍អន្តរជាតិ បានថ្កោលទោស និងកំពុងស្វែងរកចំណាត់ការប្រឆាំងទៅនឹងការបាញ់សាកល្បងគ្រាប់បែកបរមាណូម្តងហើយម្តងទៀត នៃរបបក្រុងព្យុងយ៉ាងដែលកំពុងស្ថិតក្រោមការគ្រប់គ្រងដោយលោក គីម ជុងអ៊ុន លោក Donald Trump បែរជាលើកសរសើរពីការដឹកនាំរបស់លោកគីម ជុងអ៊ុនទៅវិញ។ លោក Donald Trump ថ្លែងទៅកាន់ទស្សនិកជនថា «កុំមាក់ងាយទេពកោសល្យលោកគីម ជុងអ៊ុន»។
បេក្ខជនប្រធានាធិបតីបក្សសាធារណរដ្ឋដ៏ល្បី និងជាមហាសេដ្ឋីលោក Donald Trump បានសរសើរ ចំពោះការដឹកនាំរបស់លោក គីម ជុងអ៊ុន ក្នុងការដឹកនាំប្រទេសមួយទាំងស្ថានភាពលំបាក។ ការអះអាងបែបនេះ ធ្វើឡើងក្នុងវេទិកានយោបាយ ក្នុងក្រុង Florence រដ្ឋ South Carolina នៅថ្ងៃទី០៥ ខែកុម្ភៈ កន្លងទៅ ។
លោក Trump បានថ្លែងទៅកាន់អ្នកចូលរួមក្នុងវេទិកាថា « អ្នកត្រូវផ្តល់ការសរសើរទៅកាន់ លោក គីម ជុងអ៊ុនលើចំណុចមួយ។ នោះគឺ បុរសវ័យក្មេងដែលកំពុងតែដោះស្រាយបញ្ហាទូទៅក្រោយពីឪពុកខ្លួនស្លាប់។ ហើយ លោក គីម នៅតែអាចគ្រប់គ្រងស្ថានភាពបានដូចធម្មតា»។ លោក Donald Trump បានសង្កត់ធ្ងន់ថា « កុំ មាក់ងាយលោក គីម ជុងអ៊ុន»។
សូមបញ្ជាក់ផងដែរថា លោក គីម ជុងអ៊ុន បានឡើងកាន់អំណាចនៅឆ្នាំ២០១១ ពោលគឺបន្ទាប់ពីអតីត មេដឹកនាំកំពូលកូរ៉េខាងជើង លោក គីម ជុងអ៊ីល ដែលជាឪពុករបស់លោក បានទទួលមរណៈភាព។ មិនខុសពីមេដឹកនាំត្រកូលគីមទាំងពីរជំនាន់ (លោក គីមអ៊ីលស៊ុង និងលោក គីម ជុងអ៊ីល) មេដឹកនាំ វ័យក្មេងដ៏មានឥទ្ធិពលលោក គីម ជុងអ៊ុន បានដឹកនាំកូរ៉េខាងជើង ជារដ្ឋឯកោ ដោយមិនពឹងផ្អែកលើ ណាមួយ។ ជាពិសេសនោះ លោក គីម បានបន្តកម្មវិធីគោលនយោបាយនៃការផលិតអាវុធបរមាណូ ដែលកូរ៉េខាងជើងចាត់ទុកជាយុទ្ធសាស្ត្រការពារខ្លួន និងប្រឆាំងដាច់ខាតចំពោះវត្តមានអាមេរិកនៅក្នុង ឧបទ្វីបកូរ៉េ។
តាមពិតទៅ ការសរសើររបស់លោក Donald Trump ទៅកាន់លោក គីម ជុងអ៊ុន មិនមែនជាលើកដំបូង នោះទេ។ កាលពីដើមខែមករា នៅក្នុងវេទិកានយោបាយរដ្ឋ Iowa លោក Donald Trump បាននិយាយថា « ជារឿងធម្មតា បើយើងក្រឡេកមើលកូរ៉េខាជើង លោក គីម ជុងអ៊ុន គឹដូចទៅនឹងមនុស្សឆ្កួតនឹងអំណាច»។ តែលោក បន្ថែមទៀតថា « អ្នកគ្រប់គ្នា គួរតែផ្តល់ការសរសើរទៅកាន់ លោក គីម ជុងអ៊ុន។ លោកថា មានមនុស្សប៉ុន្មាននាក់ ដែលស្ថិតនៅក្នុងវ័យ ២៦ ឬ២៥ ឆ្នាំ អាចគ្រប់គ្រងកិច្ចការទូទៅដ៏លំបាក និង ភ្លាមៗ បន្ទាប់ពីឪពុកលោកស្លាប់នោះ។« លោក Donald Trump សង្កត់ធ្ងន់ថា ការដឹកនាំរបស់លោក គីម ជុងអ៊ុន ពិតជាអស្ចារ្យ៕
© រក្សាសិទ្ធិដោយ thmeythmey.com