អន្តរជាតិ
តួកគីបង្ហាញចិត្តសប្បុរសត្រៀមបើកព្រំដែនទទួលជនភៀសខ្លួនស៊ីរី 08, Feb 2016 , 5:49 pm
× ប្រទេសតួកគីនឹងបើកទ្វារព្រំដែនរបស់ខ្លួនទទួលយកជនភៀសខ្លួនស៊ីរីដែលបានរត់គេចពីការវាយប្រយុទ្ធគ្នានៅទីក្រុង Aleppo រវាងក្រុមឧទ្ទាមនិងកងកម្លាំងរដ្ឋាភិបាលស៊ីរីដែលគាំទ្រដោយរុស្សី។ ជនភៀសរាប់ពាន់នាក់ដែលភាគច្រើនជាក្មេងៗនិងមនុស្សចំណាស់បានរត់ភៀសខ្លួននិងកំពុងតែជាប់គាំងនៅព្រំដែនរវាងតួកគីនិងស៊ីរី ដើម្បីរង់ចាំជំនួយនិងភៀសចូលទឹកដីតួកគី។
រដ្ឋាភិបាលតួកគីនិយាយថាខ្លួននឹងមិនបោះបង់ជនភៀសខ្លួនស៊ីរីដែលបានរត់គេចពីការវាយប្រយុទ្ធគ្នានៅទីក្រុងធំទី២ របស់ស៊ីរី រវាងកងកម្លាំងក្រុមឧទ្ទាមប្រឆាំងនិងកងទ័ពរដ្ឋាភិបាលរបស់ប្រធានាធិបតី អាសាដ ដែលមានការគាំទ្រពីរុស្សី។ ការវាយប្រយុទ្ធគ្នានៅទីក្រុង Aleppo បានបង្ខំឲ្យប្រជាជនស៊ីរីរាប់ពាន់នាក់រត់គេចខ្លួនទៅកាន់ព្រំដែនជាមួយតួកគីក្នុងគោលបំណងគេចពីការប្រយុទ្ធនិងស្វែងរកចំណីអាហារ។
ប្រធានាធិបតីតួកគីលោក Recep Tayyip Erdogan ក៏បានបញ្ជាក់ពីបំណងបើកព្រំដែន ទទួលយកជនភៀសខ្លួនទាំងនោះ ដ្បិតពួកគេមិនមានជម្រើសអ្វីទេ ក្រៅពីរត់ភៀសខ្លួនពីការប្រយុទ្ធគ្នានោះ ខណៈកងទ័ពរដ្ឋាភិបាលស៊ីរីកំពុងវាយសម្រុកយ៉ាងខ្លាំងចូលទីក្រុង Aleppo។ បើតាមសារព័ត៌មាន Al Jazeera លោក Erdogan និយាយថា តួកគីត្រៀមខ្លួនរួចរាល់ បើកព្រំដែនដើម្បីទទួលជនភៀសខ្លួនស៊ីរី។
យ៉ាងណាក្ដី ច្រកឆ្លងកាត់ព្រំដែន Oncupinar ដែលនៅខាងតួកគីជាមួយនឹងស៊ីរីនៅតែបន្តបិទនៅឡើយកាលពីថ្ងៃអាទិត្យម្សិលមិញ។ ប៉ុន្តែ មន្ត្រីតួកគីអះអាងថាច្រកឆ្លងកាត់នេះនឹងបើក បើមានករណីបន្ទាន់ណាមួយកើតឡើង ស្របពេលដែលជនភៀសខ្លួនស៊ីរីរាប់ពាន់បានឈប់ត្រៀបត្រានៅទីនោះអស់បីថ្ងៃមកហើយក្ដី។
សូមបញ្ជាក់ដែរថា ជម្លោះក្នុងប្រទេស៊ីរី កាន់តែផុងជ្រៅរកដំណោះស្រាយមិនឃើញ ខណៈជនភៀសខ្លួនរាប់លាននាក់បានចាកចេញពីប្រទេសទៅរស់នៅប្រទេសជិតខាង និងរាប់ម៉ឺនទៀតរត់ដល់ទ្វីបអឺរ៉ុប។ កងកម្លាំងរដ្ឋាភិបាលរបស់ប្រធានាធិបតី អាសាដ ក៏បានបើកការវាយលុកទៅលើទីតាំងជាច្រើនរបស់ក្រុមឧទ្ទាមប្រឆាំង ដោយមានការគាំទ្រពីសំណាក់កងកម្លាំងស៊ីរី។
ក្រៅពីនោះ ការវាយប្រយុទ្ធនេះក៏បានធ្វើឲ្យប្រជាជនស៊ីរីរាប់សិបពាន់នាក់ជាប់ផុងជាប់ព្រោះការប្រយុទ្ធគ្នា និងប្រឈមកង្វះស្បៀងអាហារយ៉ាងធ្ងន់ធ្ងរ ដោយសារការផ្គត់ផ្គងជំនួយមនុស្សធម៌មិនអាចចូលទៅកាន់តំបន់ទាំងនោះបាន។ ដូច្នេះដើម្បីដោះស្រាយបញ្ហានេះ គឺត្រូវរត់ទៅកាន់ទឹកដីតួកគីដើម្បីរស់រានមានជីវិតឬក៏ប្រថុយជីវិតផ្សងព្រេងទៅកាន់ទ្វីបអឺរ៉ុប៕
Tag:
តួកគី
ស៊ីរី
ជនភៀសខ្លួន
© រក្សាសិទ្ធិដោយ thmeythmey.com