អន្តរជាតិ
លោក ថេន សេន ដាស់តឿនសមាជិកសភាថ្មីឲ្យគោរពរដ្ឋធម្មនុញ្ញ 09, Feb 2016 , 8:59 pm
× ប្រធានាធិបតីចប់អាណត្តិមីយ៉ាន់ម៉ាលោក ថេន សេន បានប្រាប់សមាជិកសភាមីយ៉ាន់ម៉ាដែលភាគច្រើនមកពីគណបក្សសម្ព័ន្ធជាតិដើម្បីប្រជាធិបតេយ្យឲ្យគោរពតាមបទបញ្ញត្តិដែលមានក្នុងរដ្ឋធម្មនុញ្ញ ក្នុងការស្នើសេចក្ដីព្រាងច្បាប់ឬកែប្រែជាដើម។ នេះបើយោងតាមទីភ្នាក់ងារព័ត៌មាន Xinhua។
លោក រឿន ភារុន រាយការណ៍លម្អិត៖
ក្នុងលិខិតទៅកាន់សភាសហភាពដែលផ្ដើមប្រជុំនៅថ្ងៃទី៨ ខែកុម្ភៈ ប្រធានាធិបតីមីយ៉ាន់ម៉ាលោក ថេន សេន បានស្នើឲ្យសមាជិកសភាទាំងអស់ឲ្យការពារនិងគោរពតាមរដ្ឋធម្មនុញ្ញឆ្នាំ២០០៨ ដែលបានព្រាងដោយក្រុមយោធា។ សភាសហភាពនេះគ្របដណ្ដប់ដោយសមាជិកភាគច្រើនមកពីគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី ដែលកំពុងតែប៉ុនប៉ងធ្វើវិសោធនកម្មរដ្ឋធម្មនុញ្ញមាត្រា៥៩ ដើម្បីអនុញ្ញាតឲ្យលោកស្រី ស៊ូជី ធ្វើប្រធានាធីបតី។
លោក ថេន សេន ដែលនឹងត្រូវផុតអាណត្តិនៅចុងខែមិនាខាងមុខ បានស្នើឲ្យសភាត្រូវគិតពីផលប្រយោជន៍របស់ប្រទេស និងត្រូវគោពរដ្ឋធម្មនុញ្ញ ដែលនេះគឺលោកចង់សំដៅដល់ការបង្កើតច្បាប់ថ្មី ការកែប្រែច្បាប់ ព្រមទាំងការលុបចោលជាដើម ត្រូវតែស្របតាមបញ្ញត្តិកំពូលនេះ។ លោកក៏បានប្រាប់ឲ្យសមាជិកសភាសហភាពទាំងអស់ ត្រូវតែពង្រឹងសន្តិភាព សន្តិសុខ ក៏ដូចជានីតិរដ្ឋនៅក្នុងប្រទេស។
ជាការកត់សម្គាល់នោះ សារដាស់តឿនរបស់ប្រធានាធិបតី ថេន សេន គឺធ្វើឡើងចំពេលដែលមានភាពស្រពិចស្រពិលថា គណបក្សលោកស្រី ស៊ូជី កំពុងតែព្យាយាមធ្វើវិសោធនកម្មមាត្រា៥៩ ។ មាត្រា៥៩នេះ ជារបាំងដែលរារាំងជ័យលាភីណូបែលសន្តិភាពឆ្នាំ១៩៩១រូបនេះធ្វើប្រធានាធិបតី ព្រោះមាត្រានេះចែងថា អ្នកណាដែលមានប្ដីប្រពន្ធឬកូនមានសញ្ជាតិបរទេស មិនអាចធ្វើជាប្រធានាធិបតីបានទេ។ លោកស្រី ស៊ូជី មានប្ដីនិងកូនប្រុសពីរនាក់ជាជនជាតិអង់គ្លេស។
យ៉ាងណាក្ដី រដ្ឋធម្មនុញ្ញមីយ៉ាន់ម៉ាបានបញ្ជាក់ច្បាស់ហើយថា ការធ្វើវិសោធនកម្មរដ្ឋធម្មនុញ្ញអាចធ្វើបាន លុះត្រាតែមានការយល់ព្រមពីសមាជិកច្រើនជាង២ភាគ៣លើវិសោធនកម្មនោះ។ គណបក្សសម្ព័ន្ធជាតិដើម្បីប្រជាធិបតេយ្យដែលឈ្នះឆ្នោតកាលពីខែវិច្ឆិកា ឆ្នាំ២០១៥ មិនអាចធ្វើរឿងនេះតែឯងបានទេ ដ្បិតក្រុមយោធាមានសំឡេង២៥ភាគរយនៅក្នុងសភាទៅហើយ ដែលវាគឺគ្រប់គ្រាន់សម្រាប់ប្រឆាំងនឹងការធ្វើវិសោធនកម្មណាមួយក៏បាន។មួយវិញទៀតនោះ ការកែប្រែច្បាប់ទាំងឡាយក៏ត្រូវការធ្វើប្រជាមតិយល់ព្រមពីប្រជាជនដែរពោលគឺត្រូវតែទទួលការយល់ព្រមលើសពីពាក់កណ្ដាលនៃចំនួនប្រជាជនបោះឆ្នោត។
សូមរម្លឹកដែរថា ក្រោយការបោះឆ្នោតខែវិច្ឆិកា ឆ្នាំ២០១៥ លោកស្រី អ៊ុងសាន ស៊ូជី បានជួបជាមួយមេបញ្ជាការកងទ័ពមីយ៉ាន់ម៉ាលោកឧត្តមសេនីយ៍ មីន អ៊ុងឡាំង (Min Aung Hlaing) ចំនួនពីរដង។ ជំនួបនោះត្រូវបានចាត់ទុកជា ការចរចាសម្របសម្រួលមួយរបស់លោកស្រី ស៊ូជី ជាមួយយោធាដ៏មានឥទ្ធិពលដើម្បីបើកផ្លូវដល់ការធ្វើវិសោធនកម្មមាត្រា៥៩ បើទោះបីជារបៀបវារៈនៃជំនួបទាំងពីរមិនត្រូវបានបញ្ចេញក៏ដោយ៕
Tag:
ថេនសេន
មីយ៉ាន់ម៉ា
© រក្សាសិទ្ធិដោយ thmeythmey.com