អន្តរជាតិ
ពេទ្យប្រកាសថាស្លាប់ ប៉ុន្តែក្រោយដាក់ក្នុងទូរតម្កល់សព១៥ម៉ោង ទារកនៅមានជីវិត 10, Feb 2016 , 12:20 pm
×
ទារកចិនម្នាក់ ត្រូវបានក្រុមគ្រូពេទ្យនៅមន្ទីរពេទ្យមួយក្នុងខេត្ត Zhejiang ប្រកាសថាស្លាប់។ បន្ទាប់មក គេបានយកទារកនោះដាក់ក្នុងសាលតម្កល់សពដែលមានសីតណ្ហភាពក្រោម១២អង្សារសេ ប៉ុន្តែ១៥ម៉ោងក្រោយមក គេបានឃើញក្មេងនោះកម្រើកដៃជើង និងប្រឹងស្រែក ខណៈគ្រូពេទ្យ និងឪពុក បម្រុងយករូបគេទៅបញ្ចុះ។ នេះបើតាមការរាយការណ៍របស់ទូរទស្សន៍ Channel Six របស់ខេត្ត Zhejiang។
កាលពីថ្ងៃទី៨ ខែមករា ទារកបានកើតមុនកំណត់រហូតដល់ទៅជាង២ខែនៅមន្ទីរពេទ្យ Pan’an People’s Hospital ក្នុងខេត្ត Zhejiang ប្រទេស។ ទារករូបនេះ កើតមកបន្ទាប់ពីម្តាយពរពោះបានតែ៧ខែប៉ុណ្ណោះ ហើយមានទម្ងន់១,៤គីឡូក្រាម។
ពេទ្យបានតម្រូវឲ្យឪពុកម្តាយថែទាំទារករូបនេះ នៅមន្ទីរពេទ្យរយៈពេល១ខែ។ ប៉ុន្តែត្រឹមរយៈពេល២៣ថ្ងៃប៉ុណ្ណោះ ឪពុកម្តាយបានសម្រេចយកកូនទៅថែទាំនៅផ្ទះ និងដើម្បីបានឱកាសអបអរពិធីបុណ្យចូលឆ្នាំថ្មី។
ដោយសារតែការមិនស្តាប់តាមពេទ្យ បញ្ហាបានកើតឡើងលើទារក។ ២ថ្ងៃក្រោយមក ឪពុកម្តាយបាននាំទារកទៅមន្ទីរពេទ្យវិញដើម្បីសង្គ្រោះបន្ទាន់ ដោយសារតែមានអាការៈមិនស្រួលខ្លួន។ នៅថ្ងៃទី៤ ខែកុម្ភៈ ក្រុមគ្រូពេទ្យបានចេញលិខិតបញ្ជាក់ថា ទារកបានស្លាប់។
ក្រោយការបញ្ជាក់ ទារកត្រូវបានយកទៅទុកនៅក្នុងសាលតម្កល់សព ដោយដាក់ក្នុងទូរក្លាសេដ៏ត្រជាក់។ ទារកស្ថិតនៅក្នុងសាលពី៦ល្ងាច ហើយនៅម៉ោង៩ព្រឹកនាថ្ងៃបន្ទាប់ពោលគឺ១៥ក្រោយ ឪពុកម្តាយ និងគ្រួពេទ្យ នាំគ្នាយកទារកទៅបញ្ចុះ ប៉ុន្តែជាមួយគ្នានេះ គេបានលឺសំឡេងក្មេងស្រែក។
«ខ្ញុំធ្វើពេទ្យផ្នែកកុមារជាង២០ឆ្នាំហើយ ខ្ញុំអាចជឿបានសោះថា ហេតុអ្វីអភិនីហាកើតឡើងយ៉ាងដូច្នេះ?»។ លោកវេជ្ជបណ្ឌិត Chen សម្តែងការភ្ញាក់ផ្អើល បន្ទាប់ពីឪពុកម្តាយរបស់ទារក បានប្រកាសរំសាយកម្មវិធីបញ្ចុះសព។
ភ្លាមៗ ទារកត្រូវបានបញ្ជូនទៅកាន់បន្ទប់សង្គ្រោះបន្ទាន់សារជាថ្មី ខណៈស្ថានភាពរបស់គេស្ថិតនៅក្នុងជ្រោះមរណដដែល។ ប្រធានមន្ទីរពេទ្យ លោក Yang បានអះអាងថា ក្រុមគ្រូពេទ្យរបស់លោកនឹងមិនបង្ករកំហុសលើកទីពីរទាក់ទងនឹងការប្រកាសពីមរណភាពរបស់ទារកនោះឡើយ៕
© រក្សាសិទ្ធិដោយ thmeythmey.com