អន្តរជាតិ
ថៃកំពុងបែកបាក់ទាំងនយោបាយ ប្រេះឆាទាំងសាសនា
17, Feb 2016 , 8:39 am
×![]()
រដ្ឋប្រហារឆ្នាំ២០១៤ ដែលទម្លាក់នាយករដ្ឋមន្ត្រីលោកស្រី យីងឡាក់ ស៊ីណាវ៉ាត្រា ប្អូនស្រីបង្កើតលោកថាក់ស៊ីន ចេញពីតំណែងជាសញ្ញាមួយទៀតនៃការបែកបាក់នៅក្នុងនយោបាយថៃ។ ខណៈនយោបាយកំពុងតែបែកបាក់ ស្ថាប័នពុទ្ធសាសនានៅថៃក៏កំពុងប្រេះឆាផងដែរដោយសារតែបញ្ហាតែងតាំងសម្ដេចសង្ឃរាជថ្មី ដែលនេះបង្ហាញប្រទេសកាន់តែធ្លាក់ក្នុងស្ថានភាពយ៉ាប់យ៉ឺនមួយ។
ខណៈនយោបាយថៃហាក់មានការស្ងប់ស្ងាត់បន្តិចក្រោយរដ្ឋប្រហារយោធាឆ្នាំ២០១៤ វិបត្តិថ្មីមួយទៀតក៏លេចជារូបរាងនៅក្នុងផ្នែកព្រះពុទ្ធសាសនារបស់ថៃ។ បន្ទាប់ពីការសុគតរបស់សម្ដេចសង្ឃរាជចាស់ បញ្ហាអ្នកស្នងតំណែងកំពុងតែបង្កទៅជាជម្លោះរវាងអ្នកគាំទ្រសម្ដេចឈួង (Somdet Chuang) ដែលជាសម្ដេចសង្ឃរាជស្ដីទីនិងក្រុមប្រឆាំងព្រះអង្គ។
តាមពិតទៅ ក្រុមប្រឹក្សាសង្ឃជាន់ខ្ពស់បានជ្រើសរើសសម្ដេចឈួងជាបេក្ខជនសម្ដេចសង្ឃថ្មីទៅហើយ ដោយរង់ចាំតែការបញ្ជូនសេចក្ដីសម្រេចនេះពីនាយករដ្ឋមន្ត្រីទៅកាន់ព្រះមហាក្សត្រថៃប៉ុណ្ណោះ។ ប៉ុន្តែព្រះសង្ឃមួយក្រុមទៀតបានប្រឆាំងនឹងរឿងនេះ ដោយបានចោទសម្ដេចឈួង មានជាប់ពាក់ព័ន្ធនឹងអំពើពុករលួយលើករណីទិញឡានទំនើប។ ព្រះឥស្សរា (Isara) ដែលប្រឆាំងនឹងការសម្រេចរបស់ក្រុមប្រឹក្សាសង្ឃ បានទាមទារឲ្យបើកការស៊ើបអង្កេតលើរឿងនេះផងដែរ។
ដោយសារតែមានការប្រឆាំងដូចនេះ លោកនាយករដ្ឋមន្ត្រីប្រាយុទ្ធ ច័ន្ទអូចា បានផ្អាកបញ្ជូនសេចក្ដីសម្រេចរបស់ក្រុមប្រឹក្សាសង្ឃជាន់ខ្ពស់ទៅព្រះមហាក្សត្រ។ លោកឧត្តមសេនីយ៍ប្រាយុទ្ធក៏បានបញ្ជាក់ដែរថា លោកនឹងបញ្ជូនសំណើរតែងតាំងសម្ដេចឈួងទៅព្រះមហាក្សត្រភូមិពល លុះត្រាតែបញ្ហាទាំងអស់ត្រូវបានដោះស្រាយរួចរាល់។
ក្រោយពេលដែលនាយករដ្ឋមន្ត្រីផ្អាកបញ្ជូនសំំណើរទៅព្រះមហាក្សត្រ ក្រុមព្រះសង្ឃដែលគាំទ្រសម្ដេចឈួង និងអ្នកគាំទ្ររាប់ពាន់នាក់ផ្សេងទៀតបានចេញមកធ្វើបាតុកម្មនៅខេត្ត Nakhon Pathom។ ក្រុមអ្នកតវ៉ាបានទាមទារឲ្យរដ្ឋាភិបាលឈប់លូកលាន់បញ្ហាសាសនា និងឆាប់បញ្ជូនសំណើរតែងតាំងសម្ដេចឈួងទៅព្រះមហាក្សត្រ។ ក្រៅពីនោះ ក្រុមអ្នកតវ៉ាក៏បានទាមទារឲ្យដាក់ព្រះពុទ្ធសាសនាជាសាសនារបស់រដ្ឋនៅក្នុងរដ្ឋធម្មនុញ្ញដែលកំពុងតែព្រាងទៀតផង។
យ៉ាងណាមិញ រដ្ឋាភិបាលថៃប្រហែលមិនធ្វើតាមសំណើទាំងនេះទេ។ បើតាម Bangkok Post រដ្ឋមន្ត្រីក្រសួងយុត្តិធម៌របស់រដ្ឋាភិបាលលោកប្រាយុទ្ធថែមទាំងជំរុញឲ្យបើកការស៊ើប អង្កេត រឿងពុករលួយនេះផងដែរ ដើម្បីបញ្ជាក់ថា ឡានត្រូវបានទិញទាំងមូលឬក៏ត្រូវបានផ្គុំឡើងពី បំណែកតូចៗដូចការអះអាងរបស់សម្ដេចឈួង។
គួរបញ្ជាក់ថា ក្នុងខែមករា សម្ដេចឈួង ដែលមានព្រះជន្ម៩០វស្សាទៅហើយនោះ ត្រូវក្រុមប្រឹក្សាសង្ឃជាន់ខ្ពស់សម្រេចជាបេក្ខជនសម្ដេចសង្ឃរាជថ្មី ដើម្បីគ្រប់គ្រងលើព្រះសង្ឃជាង៣០ម៉ឺននាក់។ ប៉ុន្តែរឿងអាស្រូវពុករលួយរឿងទិញឡានបានរារាំងការដំណើរការនេះ ដ្បិតរដ្ឋាភិបាលយោធាបានផ្អឹបសំណើទុកមួយអន្លើ និងរង់ចាំការដោះស្រាយសិន៕
ខណៈនយោបាយថៃហាក់មានការស្ងប់ស្ងាត់បន្តិចក្រោយរដ្ឋប្រហារយោធាឆ្នាំ២០១៤ វិបត្តិថ្មីមួយទៀតក៏លេចជារូបរាងនៅក្នុងផ្នែកព្រះពុទ្ធសាសនារបស់ថៃ។ បន្ទាប់ពីការសុគតរបស់សម្ដេចសង្ឃរាជចាស់ បញ្ហាអ្នកស្នងតំណែងកំពុងតែបង្កទៅជាជម្លោះរវាងអ្នកគាំទ្រសម្ដេចឈួង (Somdet Chuang) ដែលជាសម្ដេចសង្ឃរាជស្ដីទីនិងក្រុមប្រឆាំងព្រះអង្គ។
តាមពិតទៅ ក្រុមប្រឹក្សាសង្ឃជាន់ខ្ពស់បានជ្រើសរើសសម្ដេចឈួងជាបេក្ខជនសម្ដេចសង្ឃថ្មីទៅហើយ ដោយរង់ចាំតែការបញ្ជូនសេចក្ដីសម្រេចនេះពីនាយករដ្ឋមន្ត្រីទៅកាន់ព្រះមហាក្សត្រថៃប៉ុណ្ណោះ។ ប៉ុន្តែព្រះសង្ឃមួយក្រុមទៀតបានប្រឆាំងនឹងរឿងនេះ ដោយបានចោទសម្ដេចឈួង មានជាប់ពាក់ព័ន្ធនឹងអំពើពុករលួយលើករណីទិញឡានទំនើប។ ព្រះឥស្សរា (Isara) ដែលប្រឆាំងនឹងការសម្រេចរបស់ក្រុមប្រឹក្សាសង្ឃ បានទាមទារឲ្យបើកការស៊ើបអង្កេតលើរឿងនេះផងដែរ។
ដោយសារតែមានការប្រឆាំងដូចនេះ លោកនាយករដ្ឋមន្ត្រីប្រាយុទ្ធ ច័ន្ទអូចា បានផ្អាកបញ្ជូនសេចក្ដីសម្រេចរបស់ក្រុមប្រឹក្សាសង្ឃជាន់ខ្ពស់ទៅព្រះមហាក្សត្រ។ លោកឧត្តមសេនីយ៍ប្រាយុទ្ធក៏បានបញ្ជាក់ដែរថា លោកនឹងបញ្ជូនសំណើរតែងតាំងសម្ដេចឈួងទៅព្រះមហាក្សត្រភូមិពល លុះត្រាតែបញ្ហាទាំងអស់ត្រូវបានដោះស្រាយរួចរាល់។
ក្រោយពេលដែលនាយករដ្ឋមន្ត្រីផ្អាកបញ្ជូនសំំណើរទៅព្រះមហាក្សត្រ ក្រុមព្រះសង្ឃដែលគាំទ្រសម្ដេចឈួង និងអ្នកគាំទ្ររាប់ពាន់នាក់ផ្សេងទៀតបានចេញមកធ្វើបាតុកម្មនៅខេត្ត Nakhon Pathom។ ក្រុមអ្នកតវ៉ាបានទាមទារឲ្យរដ្ឋាភិបាលឈប់លូកលាន់បញ្ហាសាសនា និងឆាប់បញ្ជូនសំណើរតែងតាំងសម្ដេចឈួងទៅព្រះមហាក្សត្រ។ ក្រៅពីនោះ ក្រុមអ្នកតវ៉ាក៏បានទាមទារឲ្យដាក់ព្រះពុទ្ធសាសនាជាសាសនារបស់រដ្ឋនៅក្នុងរដ្ឋធម្មនុញ្ញដែលកំពុងតែព្រាងទៀតផង។
យ៉ាងណាមិញ រដ្ឋាភិបាលថៃប្រហែលមិនធ្វើតាមសំណើទាំងនេះទេ។ បើតាម Bangkok Post រដ្ឋមន្ត្រីក្រសួងយុត្តិធម៌របស់រដ្ឋាភិបាលលោកប្រាយុទ្ធថែមទាំងជំរុញឲ្យបើកការស៊ើប អង្កេត រឿងពុករលួយនេះផងដែរ ដើម្បីបញ្ជាក់ថា ឡានត្រូវបានទិញទាំងមូលឬក៏ត្រូវបានផ្គុំឡើងពី បំណែកតូចៗដូចការអះអាងរបស់សម្ដេចឈួង។
គួរបញ្ជាក់ថា ក្នុងខែមករា សម្ដេចឈួង ដែលមានព្រះជន្ម៩០វស្សាទៅហើយនោះ ត្រូវក្រុមប្រឹក្សាសង្ឃជាន់ខ្ពស់សម្រេចជាបេក្ខជនសម្ដេចសង្ឃរាជថ្មី ដើម្បីគ្រប់គ្រងលើព្រះសង្ឃជាង៣០ម៉ឺននាក់។ ប៉ុន្តែរឿងអាស្រូវពុករលួយរឿងទិញឡានបានរារាំងការដំណើរការនេះ ដ្បិតរដ្ឋាភិបាលយោធាបានផ្អឹបសំណើទុកមួយអន្លើ និងរង់ចាំការដោះស្រាយសិន៕
Tag:
ថៃ
នយោបាយ
សាសនា
© រក្សាសិទ្ធិដោយ thmeythmey.com
