អន្តរជាតិ
របាយការណ៍៖ អាមេរិក និងរុស្ស៊ីបន្តកាន់កាប់ជំនួញសព្វាវុធពិភពលោក 22, Feb 2016 , 10:39 pm
× របាយការណ៍វិទ្យាស្ថានស្រាវជ្រាវសន្តិភាពស៊ុយអែតបានបង្ហាញថា អាមេរិកបន្តកាន់កាប់តំណែងលេខរៀងទីមួយជាប្រទេសដែលនាំសព្វាវុធទៅកាន់ទីផ្សារអន្តរជាតិច្រើនជាងគេ។ ចំណែករុស្ស៊ីឯណោះវិញស្ថិតនៅលំដាប់លេខរៀងទី ២ ខណៈដែល ឥណ្ឌា ចិន អារ៉ាប៊ីសាអូឌីត និង អារ៉ាប់រួមនោះជារដ្ឋដែលនាំចូលអាវុធច្រើនជាងគេ។
សហរដ្ឋអាមេរិក និងរុស្ស៊ីនៅតែបន្តជាប្រទេសដែលនាំសព្វាវុធទៅកាន់ទីផ្សារពិភពលោកច្រើនជាងគេ ខណៈដែលនាំចូលអាវុធនៅតំបន់អាស៊ីក៏បន្តកើនឡើងកាន់តែខ្លាំងទៀត។ បើតាមរបាយការណ៍វិទ្យាស្ថានស្រាវជ្រាវសន្តិភាព ស៊ុយអែត ដែលទើបចេញផ្សាយនៅថ្ងៃចន្ទនេះ ក្រុងវ៉ាស៊ីនតោនស្ថិតនៅលំដាប់លេខរៀងទី១ ហើយរុស្ស៊ីនៅលេខរៀងទី២ ហើយសព្វាវុធទាំងនោះរាប់ទាំងលក់និងជំនួយទៅកាន់អាស៊ី អាហ្វ្រិក និងមជ្ឈិមបូព៌ាផង។
ចាប់ពីឆ្នាំ ២០១១ ដល់ ២០១៥ សព្វាវុធនាំចេញពីសហរដ្ឋអាមេរិកទាំងលក់និងផ្តល់ជំនួយកើនឡើង១៤ភាគរយ បើប្រៀបធៀបរយៈពេល ៥ ឆ្នាំមុននោះ ដោយធ្វើឲ្យអាមេរិកកាន់កាប់ទីផ្សារទាំងមូលដល់ ៤១ ភាគរយឯណោះ។ ចំណែករុស្ស៊ីឯវិញនៅលំដាប់ទី២ ព្រោះទំហំសព្វាវុធដែលនាំចេញស្មើ ២៥ភាគរយនៃសព្វាវុធដែលនាំទៅទីផ្សាទាំងមូល តែក្នុងឆ្នាំ ២០១៤ ដល់២០១៥ ទំហំសព្វាវុធរុស្ស៊ីនាំចេញធ្លាក់ចុះព្រោះទណ្ឌកម្មលោកខាងលិច។
បើតាមរបាយការណ៍ខាងលើដដែល អាមេរិកលក់អាវុធនិងផ្តល់អាវុធទៅកាន់រដ្ឋទូទាំងពិភពលោកយ៉ាងណាស់ក៏ ៩៦ រដ្ឋដែរ ហើយក្នុងចំណោមអាវុធទាំងនោះមានច្រើនប្រភេទមានទាំងយន្តប្រដេញ រថក្រោះ រថពាសដែក អាវុធប្រឆាំងយន្តហោះ កាំភ្លើងគ្រប់ធុនថែមទៀត។
ដោយសារជម្លោះប្រដាប់អាវុធបន្តកើនឡើងនៅអាស៊ី និងអាហ្វ្រិក ជាពិសេសនៅមជ្ឈិមបូព៌ាជាដើមនោះ ដែលវាជាមូលហេតុដែលជំរុញឲ្យអាវុធអាមេរិកនិងរុស្ស៊ីពេញនិយមក្នុងទីផ្សារអន្តរជាតិផង។ ហើយបើប្រៀបធៀបរយៈពេល២ ទសវត្សរ៍ចុងក្រោយនេះ ការចរាចរណ៍សព្វាវុធជារួមមានការកើនឡើងខ្លាំងទូទាំងពិភពលោក។
ចំណែកចិន ដែលជាមហាអំណាចជាន់ថ្មីនោះ បានប្រជែងយកតំណែងលេខរៀងទី៣ ជារដ្ឋដែលនាំអាវុធទៅកាន់ទីផ្សារអន្តរជាតិច្រើនជាងគេក្នុងរយៈពេលប្រាំឆ្នាំមកនេះ។ អាវុធចិនភាគច្រើនហូរចូលទៅកាន់បណ្តារដ្ឋអាស៊ីជាពិសេសប៉ាគីស្ថានជាដើម៕
© រក្សាសិទ្ធិដោយ thmeythmey.com