អន្តរជាតិ
លោក ខេមេរ៉ូន៖ ការចាកចេញពីអឺរ៉ុបនឹងធ្វើឲ្យអង់គ្លេសខាតបង់ 23, Feb 2016 , 8:19 pm
× នាយករដ្ឋមន្ត្រីចក្រភពអង់គ្លេសលោក ដេវីដ ខេមេរ៉ូន (David Cameroon) បានព្រមានពីការខាតបង់ផ្នែកសេដ្ឋកិច្ចនិងសន្តិសុខ នៅពេលដែលអង់គ្លេសពិតជាចាកចេញពីតំបន់អឺរ៉ុបមែននោះ។ ខណៈភាពមិនច្បាស់លាស់នៅតែបន្តនោះ ការធ្វើប្រជាមតិនៅថ្ងៃទី២៣ ខែមិថុនា នឹងកំណត់ជោគវាសនាចក្រភពអង់គ្លេសថា នឹងបន្តជាសមាជិកអឺរ៉ុបឬក៏ត្រូវចាកចេញ។
សូមស្ដាប់ព័ត៌មានលម្អិត៖
លោកដេវីដ ខេមេរ៉ូន បានព្រមានពីផលប៉ះពាល់ដែលអាចនឹងកើតឡើង ប្រសិនបើប្រជាជនអង់គ្លេសជ្រើសរើសការចាកចេញពីសហភាពអឺរ៉ុបនៅថ្ងៃធ្វើប្រជាមតិក្នុងខែមិថុនាខាងមុខ។ ការ ប្រឈមមុខនឹងផលប៉ះពាល់សេដ្ឋកិច្ចនិងសន្តិសុខជាតិ ជាប្រធានបទដ៏សំខាន់ក្នុងយុទ្ធនាការរបស់លោក ខេមេរ៉ូន ដែលចង់ឲ្យអង់គ្លេសបន្តជាសមាជិកអឺរ៉ុប។
និយាយនៅក្នុងសភាកាលពីថ្ងៃទី២២ ម្សិលមិញលោកខេមេរ៉ូន បានប្រាប់សមាជិកសភាពីបញ្ហាសេដ្ឋកិច្ចដែលអង់គ្លេសកំពុងជួបប្រទះ ជាពិសេសការធ្លាក់ចុះតម្លៃប្រាក់Sterling ធៀបនឹងប្រាក់ដុល្លារក្នុងរយៈពេលជិត៧ឆ្នាំមកនេះ។ លោកថា នេះជាផលវិបាកសេដ្ឋកិច្ចនៃការដែលចាកចេញពីតំបន់អឺរ៉ុប។ បើទោះជាមានមតិខ្លះអះអាងថា អង់គ្លេសនៅតែអាចធ្វើពាណិជ្ជកម្មជាមួយប្រទេសអឺរ៉ុបផ្សេងទៀត នៅពេលដែលអង់គ្លេសចាកចេញនោះ នាយករដ្ឋមន្ត្រីខេមេរ៉ូន ហាក់ដូចជារួញរាបញ្ហានេះ ហើយនៅតែបន្តជំហររបស់លោក។
ជាមួយគ្នានេះដែរ លោកនាយករដ្ឋមន្ត្រីខេមេរ៉ូន ដែលចង់ឲ្យពលរដ្ឋអង់គ្លេសជ្រើសរើសការបន្តជាសមាជិកបញ្ជាក់ដែរថា អង់គ្លេសជាមហាអំណាចមួយ ហើយបើទោះជាលទ្ធផលប្រជាមតិយ៉ាងម៉េចក៏ដោយ អង់គ្លេសនៅតែជាមហាអំណាចដដែល។ ប៉ុន្តែលោកខេមេរ៉ូន សង្កត់ធ្ងន់ថា «ជម្រើសនៅពេលនេះគឺអង់គ្លេសចង់ធ្វើជាមហាអំណាចក្នុងតំបន់អឺរ៉ុបឬតំបន់ណាផ្សេង»។
ក្រៅពីនោះ នាយករដ្ឋមន្ត្រីរូបនេះក៏បានព្រមានពីផលវិបាកលើសន្តិសុខជាតិ ដោយលោកបានលើកឡើងពីការគំរាមកំហែងរបស់ក្រុមភេរវកម្មជ្រុលនិយមនិងសកម្មភាពហិង្សារបស់រុស្សីនៅអ៊ុយក្រែន។ នៅក្នុងកាលៈទេសៈនេះ អង់គ្លេសពិតជាចាំចាច់បន្តជាសមាជិករបស់អង្គការតំបន់ដ៏ធំនេះ ព្រោះអង់គ្លេសត្រូវចាប់ដៃជាមួយសមាជិកដទៃទៀតដើម្បីប្រយុទ្ធប្រឆាំងនឹងការគំរាមពីខាងក្រៅ។ ហើយពិតណាស់ថា បើអង់គ្លេសចាកចេញនោះ បញ្ហាទាំងអស់នឹងក្លាយជាសម្ពាធលើអង់គ្លេសមិនខាន។
សូមបញ្ជាក់ដែរថា ប្រជាជនចក្រភពអង់គ្លេសនឹងសម្រេចចិត្តបន្តជាសមាជិកអឺរ៉ុបឬត្រូវចាកចេញនៅក្នុងការធ្វើប្រជាមតិថ្ងៃទី២៣ ខែមិថុនាខាងមុខ។ លោកនាយករដ្ឋមន្ត្រីខេមមេរ៉ូន កំពុងតែញាប់ដៃជើងបញ្ចុះបញ្ចូលឲ្យពលរដ្ឋអង់គ្លេសជ្រើសរើសបន្តសមាជិកភាព ប៉ុន្តែក៏មានយុទ្ធនាការស្នើឲ្យមានការបោះឆ្នោតដល់ការចាកចេញផងដែរ។
សមាជិកគណៈរដ្ឋមន្ត្រីអង់គ្លេសខ្លះបានប្រកាសគាំទ្រការចាកចេញ ស្របពេលដែលអភិបាលទីក្រុងឡុងដ៍លោក Boris Johnson ដែលជាគូប្រជែងលោកខេមេរ៉ូន ក៏បង្ហាញជំហរគាំទ្រការចាកចេញដូចគ្នា៕
Tag:
អង់គ្លេស
អឺរ៉ុប
© រក្សាសិទ្ធិដោយ thmeythmey.com