អន្តរជាតិ
នយោបាយអន្តរជាតិ
ពូទីន និងអូបាម៉ាឯកភាពគ្នាលើផែនការបញ្ចប់ការប្រយុទ្ធគ្នានៅស៊ីរី
23, Feb 2016 , 5:23 pm
×![]()
ដោយ: ថ្មីៗ
រដ្ឋាភិបាលក្រេមឡាំងបានបង្ហាញគម្រោងបទឈប់បាញ់នៅស៊ីរីជាផ្លូវការដែលសម្រេចបានក្រោយមានការជជែក និងចរចាគ្នាផ្ទាល់រវាងមេដឹកនាំសហរដ្ឋអាមេរិកនិងរុស្ស៊ី។ ភាគីទាំងពីរជឿជាក់ថា វាជំហានដ៏សំខាន់មួយដើម្បីឈានទៅបញ្ចប់ការបង្ហូរឈាមគ្នាអស់រាប់ឆ្នាំនៅស៊ីរីផង។ 
រដ្ឋាភិបាលស៊ីរីបានសម្រេចបញ្ចេញឯកសារលម្អិតដែលជាផែនការអនុវត្តបទឈប់បាញ់នៅស៊ីរី ដែលឯកភាពគ្នាបង្កើតឡើងដោយសហរដ្ឋអាមេរិកនិងរុស្ស៊ីផ្ទាល់។ ផែនការនេះចេញជាផ្លូវការក្រោយពេលមេដឹកនាំអាមេរិកលោក បារ៉ាក់ អូបាម៉ា និង ប្រធានាធិបតីរុស្ស៊ីលោក វ្ល៉ាឌីមៀ ពូទីន ជជែកពិភាក្សាទ្វេភាគតាមទូរស័ព្ទ និងមានការចរចាគ្នាជាសម្ងាត់អស់ពេលយូរដែរ។
បើយោងតាមសារព័ត៌មានរុស្ស៊ី Sputnik លោក វ្ល៉ាឌីមៀ ពូទីន បានបង្ហាញសុទិដ្ឋិនិយមថា ផែនការរៀបចំបទឈប់បាញ់នៅស៊ីរីដែលឯកភាពគ្នាបង្កើតឡើងដោយអាមេរិកនិងរុស្ស៊ីនោះនឹងក្លាយជាជំហានដ៏សំខាន់ដែលនាំមកសន្តិភាពនិងបញ្ចប់ការបង្ហូរឈាមគ្នានៅស៊ីរី។
មុនពេលបញ្ចេញឯកសារផ្លូវការនេះ លោក ពូទីន និងលោក បារ៉ាក់ អូបាម៉ា បានចំណាយពេលវេលាយូរល្មមដែរដើម្បីជជែកគ្នាតាមទូរស័ព្ទពីបញ្ហាស៊ីរីនេះ។ ហើយលោក ពូទីន បានសង្កត់ធ្ងន់ថា៖« កិច្ចព្រមព្រៀងរវាងអាមេរិកនិងរុស្ស៊ីស្តីពីបទឈប់បាញ់នៅស៊ីរី និងការសហការគ្នាជាមួយភាគីពាក់ព័ន្ធជាសមាជិកក្រុមគាំទ្រស៊ីរីអន្តរជាតិ អាចជាគោលនយោបាយប្រកបដោយទំនួលខុសត្រូវ ដោយពឹងលើច្បាប់អន្តរជាតិ និងគោលការណ៍អង្គការសហប្រជាជាតិផង»។
ក្រៅពីនេះ លោក ពូទីន បានបង្ហាញការប្តេជ្ញាចិត្តដោយធ្វើគ្រប់យ៉ាងក្នុងនាមជាភាគីមួយដែលលូកដៃក្នុងជម្លោះស៊ីរី ដើម្បីជំរុញឲ្យការអនុវត្តកិច្ចព្រមព្រៀងសន្តិភាពនៅស៊ីរីនេះជោគជ័យ។ តែលោកក៏រំពឹងផងដែរថា សហរដ្ឋអាមេរិកនឹងដាស់តឿនឲ្យបណ្តាក្រុមឧទ្ទាមគោរពឲ្យកិច្ចព្រមព្រៀងនេះឲ្យបានខ្ជាប់ខ្ជួនដែរ។
គេរំពឹងថា ការឯកភាពគ្នារវាងរុស្ស៊ី និងអាមេរិកដើម្បីគាំទ្របទឈប់បាញ់នៅស៊ីរីនឹងក្លាយជាចំណាត់ការសំខាន់ដើម្បីជួយបញ្ចប់ជម្លោះប្រដាប់អាវុធ បង្កើនសមត្ថភាពប្រឆាំងភេរវកម្ម និងអាចធានាឲ្យបាននូវអន្តរកាលនយោបាយនៅស៊ីរីដើម្បីត្រួសត្រាយផ្លូវឲ្យមានការកសាងសន្តិភាពនៅស៊ីរី។ ហើយបទឈប់បាញ់នេះនឹងចូលជាធរមាននៅថ្ងៃសៅរ៍ទី២៧ ខែកុម្ភៈខាងមុខនេះ។
សូមបញ្ជាក់ថា ដោយសារជម្លោះស៊ីរី សហរដ្ឋអាមេរិកនិងរុស្ស៊ីកាន់តែប្រឈមមុខដាក់គ្នាខ្លាំងកន្លងមក ហើយអាមេរិកបានចោទរុស្ស៊ីថាគាំទ្ររដ្ឋាភិបាលក្រុងដាម៉ាសដោយបន្តទម្លាក់គ្រាប់បែកលើក្រុមឧទ្ទាមនៅស៊ីរីនិងជនស៊ីវិលស្លូតត្រង់៕
© រក្សាសិទ្ធិដោយ thmeythmey.com
