អន្តរជាតិ
បុរសតួកគីម្នាក់ប្តឹងភរិយាខ្លួនពីបទជេរប្រមាថប្រធានាធិបតី លោក Erdogan 24, Feb 2016 , 11:05 am
លោកប្រធានាធិបតីតួកគី Recep Tayyip Erdogan
×
បុរសតួកគីម្នាក់ដែលមានមុខរបរជាអ្នករត់តាក់ស៊ី បានសម្រេចប្តឹងប្រពន្ធរបស់ខ្លួនជាផ្លូវការពីបទជេរ និងនិយាយអាក្រក់ពីលោកប្រធានាធិបតេយ្យ Recep Tayyip Erdogan។ នេះបើតាមការរាយការណ៍របស់កាសែត Yeni Safak ដែលមាននិន្នាការគាំទ្ររដ្ឋាភិបាល។
លោក Ali D. អាយុ៤០ឆ្នាំ បានរៀបការជាមួយភរិយាឈ្មោះ G.D [ឈ្មោះកាត់] អស់រយៈពេល៣ឆ្នាំមកហើយ។ គាត់មិនដែលមានអារម្មណ៍ស្ងប់ចិត្តឡើយនៅពេលលឺភរិយារិៈគន់លោកប្រធានាធិបតី Recep Tayyip Erdogan ខណៈគាត់ឃើញព័ត៌មាននៅតាមទូរទស្សន៍។
លោក Ali D. បានថតសំឡេងភរិយារបស់ខ្លួន ដើម្បីធ្វើជាភស្តុតាងនៃពាក្យបណ្តឹងទៅកាន់តុលាការខេត្ត Izmir។ លោកបានពន្យល់ប្រាប់កាសែត Yeni Safak ថា៖ «ខ្ញុំតែងតែព្យាយាមណែនាំគាត់ [ភរិយា] ពីព្រោះលោកប្រធានាធិបតីជាមនុស្សល្អ និងជាអ្នកដែលនាំឲ្យតួកគីរីកចម្រើន»។
លោកបានបន្ថែមថា៖ «ទោះបីជាឪពុកខ្ញុំក៏ដោយ បើសិនគាត់ហ៊ានជេរប្រមាថលោកប្រធានាធិបតី ខ្ញុំក៏មិនលើកលែងដែរ ខ្ញុំនឹងដាក់ពាក្យប្តឹងដូចគ្នា»។
ជាមួយគ្នានេះ ភរិយារបស់បុរសបើកបរតាក់ស៊ី ក៏ដាក់ពាក្យបណ្តឹងទៅតុលាការផងដែរ ប៉ុន្តែជាពាក្យបណ្តឹងសុំលែងលះ៕
© រក្សាសិទ្ធិដោយ thmeythmey.com