កូរ៉េខាងជើង បាញ់មីស៊ីលជាថ្មី ផ្គើននឹងទណ្ឌកម្មថ្មីរបស់ក្រុមប្រឹក្សាសន្តិសុខ

អន្តរជាតិ

កូរ៉េខាងជើង បាញ់មីស៊ីលជាថ្មី ផ្គើននឹងទណ្ឌកម្មថ្មីរបស់ក្រុមប្រឹក្សាសន្តិសុខ

03, Mar 2016 , 9:47 am

រូបភាព

ដោយ:

កូរ៉េខាងជើង បានបាញ់មីស៊ីលចម្ងាយខ្លីទៅកាន់សមុទ្រខាងកើតជាថ្មីម្តងទៀតហើយនៅព្រឹកថ្ងៃព្រហ ស្បតិ៍នេះ ។ ការបាញ់មីស៊ីលនេះ ធ្វើឡើងក្រោយ តែប៉ុន្មានម៉ោងតែប៉ុណ្ណោះ ដែលក្រុមប្រឹក្សាសន្តិសុខអង្គការសហប្រជាជាតិ បានអនុម័តទណ្ឌកម្មថ្មីលើ ការសាកល្បងការបាញ់មីស៊ីលរបស់កូរ៉េខាងជើងជាបន្តបន្ទាប់ក្នុងរយៈពេលចុងក្រោយនេះ។

ចុចទីនេះដើម្បីទទួលបានព័ត៌មានរហ័ស

លោក Moon Sang-Kyun អ្នកនាំពាក្យក្រសួងការពារជាតិកូរ៉េខាងត្បូង ថ្លែងនៅក្នុងការសង្ខេបព័ត៌មានប្រចាំថ្ងៃ នៅថ្ងៃទី០៣ ខែកុម្ភៈ នេះថា ទាហានកូរ៉េខាងជើងបានបាញ់មីស៊ីលចម្ងាយខ្លីជាច្រើនគ្រាប់នៅព្រឹកនេះពីតំបន់ Wonsan ទៅកាន់សមុទ្រភាគខាងកើត។ នេះបើយោងតាមភ្នាក់ព័ត៌មាន Xinhua។

លោក Moon ក៏បានបន្ថែមទៀតថា គ្រាប់មីស៊ីលនោះ មិនទាន់ត្រូវបានកំណត់ច្បាស់លាស់នៅឡើយ នោះទេ ពោលគឺគេមិនទាន់ប្រាកដថាតើ វាជាប្រភេទមីស៊ីលចម្ងាយខ្លី ឬក៏ជាប្រភេទនៃការបាញ់គ្រាប់ ផ្លោងនោះទេ។ នេះបើយោងតាមប្រភពព័ត៌មានដដែល ដែលបានដកស្រង់សម្តីរបស់លោក Moon ដែលថា ទាហានកូរ៉េខាងត្បូង បានត្រៀមរួចរាល់ជាស្រេចហើយក្នុងការការពារដែនអធិបតេយ្យខ្លួន ពីការវិវត្តរបស់ទាហានកូរ៉េខាងជើង។

អ្វីដែលគួរកត់សម្គាល់នោះ ការបាញ់មីស៊ីលរបស់កូរ៉េខាងជើង ធ្វើឡើងក្រោយភ្លាមៗពីការអនុម័តទណ្ឌកម្មថ្មីរបស់ក្រុមប្រឹក្សាសន្តិសុខអង្គការសហប្រជាជាតិ។ ហើយនេះ ត្រូវបានគេចាត់ទុកជាសកម្ម ផ្គើនមួយរបស់កូរ៉េខាងជើង ដែលចង់បង្ហាញថាខ្លួន មិនមានអ្វីញញើតទៅនឹងទណ្ឌកម្មថ្មីអ្វីនោះទេ។

នៅថ្ងៃទី០២ ខែមីនា ម្សិលមិញ ក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆ័ន ដាក់ទណ្ឌកម្មដ៏ខ្លាំងមួយប្រឆាំងនឹងកូរ៉េខាងជើង ដែលបានសាកល្បងគ្រាប់បែកអ៊ីដ្រូសែននិងបាញ់រ៉ុក្កែតទៅលំហអាកាស។ ទណ្ឌកម្មនេះមានកម្រិតខ្លាំងបំផុតសម្រាប់បង្ខំឲ្យទីក្រុងព្យុងយ៉ាងបោះបង់កម្មវិធីនុយក្លេអ៊ែររបស់ខ្លួន៕

Tag:

កូរ៉េខាងជើង