អ្នកសាធារណរដ្ឋបារម្ភខ្លាំង នៅពេលដូណាល់ត្រាំបន្តឈ្នះការគាំទ្រ

អន្តរជាតិ

អ្នកសាធារណរដ្ឋបារម្ភខ្លាំង នៅពេលដូណាល់ត្រាំបន្តឈ្នះការគាំទ្រ

03, Mar 2016 , 8:59 pm

រូបភាព

ដោយ: ថ្មីៗ

ក្រោយ សេដ្ឋីអចលនទ្រព្យលោក ដូណាល់ ត្រាំ ទទួលជ័យជម្នះបន្តបន្ទាប់ សមាជិកបក្សសាធារណរដ្ឋបង្ហាញកង្វល់ខ្លាំង ខ្លាចថាលោកនឹងឈ្នះការជ្រើសតាំង ហើយក៏មានការបែកខ្ញែកគ្នាក្នុងចំណោមអ្នកសាធារណរដ្ឋដែរ។ ថេត គ្រុស ដែលជាបេក្ខជនមានលទ្ធភាពប្រជែង ដូណាល់ ត្រាំ ដង្ហើយឲ្យបេក្ខជនផ្សេងទៀតពួតដៃគ្នាផ្តួលលោក ខណៈ មេដឹកនាំបក្សសាធារណរដ្ឋមួយចំនួនក៏កំពុងថ្កោលទោសសេដ្ឋីនេះដែរឥតសំចៃ។

ចុចទីនេះដើម្បីទទួលបានព័ត៌មានរហ័ស

សូមស្ដាប់ព័ត៌មានលម្អិត៖

ខណៈដែល បេក្ខជនប្រធានាធិបតី ដូណាល់ ត្រាំ រីករាយនិងមានអំណួតកាន់តែខ្លាំងក្រោយពេលឈ្នះឆ្នោត ៧រដ្ឋក្នុងការបោះឆ្នោតនៅរដ្ឋចំនួន ១១នៅថ្ងៃអង្គារទី ១មីនា អ្នកសាធារណរដ្ឋជាពិសេសបណ្តាមេដឹកនាំបក្សនេះនាំគ្នាសម្តែងក្តីបារម្ភ ថា លោក ដូណាល់ ត្រាំ អាចឈ្នះការតែងតាំងពីបក្ស។

យោងតាមទីភ្នាក់ងារព័ត៌មានចិន Xinhua មជ្ឈដ្ឋានជាតិ និងអន្តរជាតិមិនពេញចិត្តឡើយនៅពេលដែលលឺថា សេដ្ឋីអចលនទ្រព្យនេះទទួលជ័យជម្នះបន្តបន្ទាប់ ផ្តួលរំលំគូប្រជែងក្នុងបក្សបានច្រើនដូច្នេះ។ គេខ្លាចថា អ្នកនយោបាយជ្រុលនិយម រើសអើងពូជសាសន៍និងសាសនានឹងក្លាយជាប្រធានាធិបតីអាមេរិកដែលជាមហាអំណាចពិភពលោក។

លោក ដូណាល់ ត្រាំ យកបញ្ហាចម្រូងចម្រាសទាក់ទងសាសនា និងពូជសាសន៍ ជាដើមនោះមកធ្វើប្រធានបទនៃការឃោសនា និងទាក់ទាញការគាំទ្រពីអ្នកសាធារណរដ្ឋ។ កន្លងមកលោកថ្លែងសុន្ទរកថារើសអើងប្រឆាំងអ្នកកាន់ សាសនាឥស្លាម ហើយក្រោយមក បេក្ខជនម្នាក់នេះបង្ហាញការគាំទ្រចំពោះនយោបាយជ្រុលនិយមរបស់ជនស្បែកស រើសអើងពូជសាសន៍ ប្រឆាំងប្រជាជនស្បែកខ្មៅជាដើមផង។
តាមពិតទៅ ការយកបញ្ហាសាសនានិងពូជសាសន៍ពណ៌សម្បុរមកធ្វើជាល្បែងនយោបាយដើម្បីទាញយកប្រជាប្រិយភាពជាគ្រោះថ្នាក់បំផុត បើអ្នកនយោបាយរូបនេះឡើងកាន់អំណាច។ រឿងនេះជារឿងធំ មិនមែនជាបញ្ហាតែក្នុងសង្គមអាមេរិកទេតែវាជាបញ្ហាសម្រាប់ពិភពលោកទាំងមូល។

បច្ចុប្បន្ននេះ បេក្ខជនផ្សេងទៀតដែលបានទទួលសំឡេងគាំទ្រគ្រាន់បើដែរនោះមាន ថេត គ្រុស និងលោក ម៉ាកូ រ៉ូប៊ីយ៉ូ បានប្រកាសថាខ្លួននឹងបន្តរួមដៃគ្នាប្រកួតប្រជែងផ្តួលលោក ដូណាល់ ត្រាំ។ នេះក៏ដោយសារ បេក្ខជនទាំងពីរនាក់នេះបានដណ្តើមជ័យជម្នះនៅរដ្ឋគ្រាន់បើដែលក្នុងការបោះឆ្នោតកន្លងមក ដែលមានន័យថាពួកគេនៅមានសង្ឃឹមដើម្បីប្រជែង ដូណាល់ ត្រាំ។ សមាជិកព្រឹទ្ធសភា ថេត គ្រុស ឈ្នះបានរដ្ឋចំនួនបី នៅតិចសាស, អូក្លាហូម៉ា និងអាកាន់សាស ខណៈ លោក ម៉ាកូ រ៉ូប៊ីយ៉ូ ឈ្នះនៅរដ្ឋមីណេសូតា។

លោក ថេត គ្រុស បាន អះអាងប្រាប់អ្នកគាំទ្រលោកថា មានតែលោកទេដែលអាចផ្តួល ដូណាល់ ត្រាំ បាន ហើយលោកក៏ឆ្លៀតឱកាសអំពាវនាវឲ្យបេក្ខជនផ្សេងទៀតដែលមិនទាន់រកជ័យជម្នះបានសូម្បីតែមួយរដ្ឋនោះចូលរួមជាមួយលោក។

ចំណែកខាងមេដឹកនាំបក្សសាធារណរដ្ឋនោះក៏មិនពេញចិត្ត និងមានអារម្មណ៍ទើសទាល់ខ្លាំងដែរ នៅពេលដែលដូណាល់ ត្រាំ ទទួលជ័យជម្នះភ្លូកទឹកភ្លូកដី។ សូម្បីតែប្រធានសភាអាមេរិក លោក Paul Ryan ដែលជាសមាជិកបក្សសាធារណរដ្ឋនោះបានបង្ហាញអារម្មណ៍មិនពេញចិត្តដែរចំពោះសកម្មភាពរបស់អុ្នកសាធារណរដ្ឋដូចគ្នាគឺលោក ដូណាល់ ត្រាំនេះសោះ ប៉ុន្តែលោកមិនបញ្ជាក់ឈ្មោះចំៗថា ដូណាល់ត្រាំឡើយ។

លោកថា៖«ខ្ញុំព្យាយាមនៅឆ្ងាយពីការបោះឆ្នោតសាកល្បងសម្រាប់រើសបេក្ខជនតំណាងបក្សនេះ។ ប៉ុន្តែដូចខ្ញុំធ្លាប់និយាយថា ពេលខ្ញុំឃើញសកម្មភាពអ្វីដែលប្រឆាំងបក្សនិងប្រទេសយើង ខ្ញុំនឹងបញ្ចេញយោបល់។ បើមនុស្សណាម្នាក់ចង់ឲ្យបក្សជ្រើសតាំង វាមិនអាចមានការប្រើប្រាសឧបាយកលនិងប្រើល្បែងនយោបាយ។ ហើយគេ ត្រូវបដិសេធរាល់ក្រុមមនុស្ស ឬ សកម្មភាពទាំងឡាយណាដែលបង្កឲ្យមានការរើសអើងនិងស្អប់ខ្ពើមនានា»។

គេដឹងច្បាស់ថា ប្រធានសភារូបនេះសំដៅទៅលើលោក ដូណាល់ ត្រាំ នេះឯង ដែលជាអ្នកនយោបាយតែម្តងគត់ដែលបញ្ឆេះការស្អប់ខ្ពើម ការរើសអើងពូជសាសន៍ និងសាសនា កន្លងមកនេះ ដើម្បីទាញប្រជាប្រិយភាពនយោបាយ។

តែយ៉ាងណាក៏ដោយ វាក្លាយជារឿងវិជ្ជមានសម្រាប់បក្សប្រជាធិបតេយ្យទៅវិញទេ ពេលដែលបេក្ខជនដូច ដូណាល់ត្រាំនេះត្រូវបក្សជ្រើសតាំងឲ្យតំណាងបក្សដើម្បីទៅប្រជែងការបោះឆ្នោតថ្ងៃ ៨ វិច្ឆិកាខាងមុខនេះ។ ប្រជាជនអាមេរិកប្រហែលជាឆ្លាតល្មមយល់ដឹងថា អ្នកណាគួរជាប្រធានាធិបតី អ្នកណាមិនគួរហើយពាក់ព័ន្ធការបោះឆ្នោតប្រធានាធិបតីនេះ៕