អន្តរជាតិ
មើលអ៊ីម៉ែលក្នុង Spam ឃើញឈ្នះរង្វាន់១៥ម៉ឺនដុល្លារ ស្មានតែបោកប្រាស់… 04, Mar 2016 , 8:39 am
×
អ្នកស្រី Helen Garner ដែលជាអ្នកនិពន្ធជនជាតិអូស្ត្រាលីម្នាក់ បានឆែកមើលអ៊ីម៉ែលក្នុង Spam ដើម្បីលុបសារដែលឥតប្រយោជន៍ចោល។ នៅពេលនោះ អ្នកស្រីបានឃើញសារមួយដែលសរសេរថា អ្នកស្រីឈ្នះប្រាក់រង្វាន់១៥០ ០០០ដុល្លារអាមេរិក។
ពេលឃើញសារដែលផ្ញើពីសាកលវិទ្យាល័យ Yale University របស់សហរដ្ឋអាមេរិក ដែលប្រាប់ថា «ដំណឹងល្អ» (Good News) ហើយថែមទាំងសុំលេខទូរសព្ទផងដែរនោះ អ្នកស្រី បានគិតថា វាជារឿងឥតប្រយោជន៍ និងបោកប្រាស់។ ប៉ុន្តែអ្នកស្រីបានយករឿងនេះ ប្រាប់នាយករបស់ខ្លួន ហើយបានសាកល្បងទាក់ទងទៅ Yale University។ វាជារឿងមួយដ៏គួរឲ្យភ្ញាក់ផ្អើល ដោយខាងសាកលវិទ្យាល័យបានអះអាងថា អ្នកស្រី បានឈ្នះពានរង្វាន់ Windham-Campbell សម្រាប់អ្នកនិពន្ធឆ្នើម ដែលមានទឹកប្រាក់១៥ម៉ឺនដុល្លារអាមេរិក។
អ្នកស្រី Helen Garner បានរៀបរាប់ប្រាប់សារព័ត៌មានអូស្ត្រាលី Sydney Morning Herald ថា៖ «ខ្ញុំស្ទើរតែសម្អាតអ៊ីម៉ែលនោះចោលទៅហើយ ពីព្រោះខ្ញុំមិនជឿទាល់តែសោះ»។
អ្នកស្រី Garner គឺជាអ្នកនិពន្ធម្នាក់ក្នុងចំណោម៩នាក់ដែលឈ្នះពានរង្វាន់ Windham-Campbell ប្រចាំឆ្នាំ។ ពានរង្វាន់នេះ ត្រូវបានបង្កើតឡើងអស់រយៈពេល៣ឆ្នាំមកហើយ ដែលវាជាកាដូរបស់អ្នកនិពន្ធ Donald Windham ដើម្បីឧទ្ទិសដល់ដៃគូរបស់ខ្លួនឈ្មោះ Sandy M។
ពានរង្វាន់នេះ មិនតម្រូវឲ្យមានការដាក់ពាក្យប្រឡងប្រកួតប្រជែងឡើយ តែជាការផ្តល់ភាពភ្ញាក់ផ្អើលដល់ជ័យលាភី។ ក្រៅពីអ្នកស្រី Garner ជ័យលាភីមួយចំនួនទៀតក៏មានប្រតិកម្មហួសចិត្តផងដែរនៅពេលទទួលបានដំណឹងដំបូង ដូចជាអ្នកនិពន្ធអៀរឡង់ Abbie Spallen និងអ្នកនិពន្ធកាណាដា Hannah Moscovitch ជាដើម ដោយពួកគាត់គិតថាជាការបោកប្រាស់។
អ្នកស្រី Garner ជាអ្នកនិពន្ធម្នាក់ដ៏ល្បីល្បាញរបស់អូស្ត្រាលី អស់រយៈពេលជាង២០ឆ្នាំមកហើយ។ ស្នាដៃដ៏គួរឲ្យកត់សម្គាល់របស់គាត់នោះ គឺរឿង «This House of Grief» កាលពីឆ្នាំ២០១៤ ដែលរៀបរាប់ពីសំណុំរឿងមួយនៅតុលាការ។
អ្នកនិពន្ធដែលឈ្នះរង្វាន់ទាំង៩រួមមាន Helen Garner (អូស្ត្រាលី), Abbie Spallen (អៀរឡង់), Hannah Moscovitch (កាណាដា) Branden Jacobs-Jenkins (អាមេរិក) Tessa Hadley (អង់គ្លេស), CE Morgan (អាមេរិក) Jerry Pinto (ឥណ្ឌា) Hilton Als (អាមេរិក) និង Stanley Crouch (អាមេរិក)៕
Tag:
ប្លែក
អ្នកនិពន្ធ
Yale University
© រក្សាសិទ្ធិដោយ thmeythmey.com