កីឡាជាតិ
កីឡាអន្តរជាតិ
ជាតិ
កីឡាករ និងកីឡាការិនីបាល់បោះដ៏ល្បីល្បាញរបស់អាមេរិកពីររូប នឹងមកកម្ពុជា 09, Jul 2016 , 7:39 am
× កីឡាករបាល់បោះរបស់អាមេរិក Wayne Ellington និងកីឡាការិនី Sue Wicks នឹងធ្វើដំណើរមកកម្ពុជា ចាប់ពីថ្ងៃទី ១២ ដល់ថ្ងៃទី ១៧ ខែកក្កដា ខាងមុខ។ គម្រោងមកកាន់កម្ពុជារបស់កីឡាករ កីឡាការិនី ផ្នែកបាល់បោះទាំងពីរ រៀបចំឡើងដោយក្រសួងការបរទេសអាមេរិកសហការជាមួយសមាគមកីឡាបាល់បោះបុរស និងសមាគមកីឡាបាល់បោះនារីនៅសហរដ្ឋអាមេរិក។
អ្នកទាំងពីរនេះ គឺជាបេសកជនកីឡាបាល់បោះបុរស និងនារី ដែលក្រសូងការបរទេសអាមេរិកជ្រើសរើសបញ្ជូនមកកម្ពុជា។ បើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជានៅថ្ងៃទី ៨ ខែកក្កដា កីឡាករ Wayne Ellington និងកីឡាការិនី Sue Wicks នឹងមកដល់កម្ពុជា នៅថ្ងៃទី ១២ ខែកក្កដា ។ ការងារបេសកជនកីឡាទាំងពីររូបនេះ នៅក្នុងប្រទេសកម្ពុជារហូតដល់ថ្ងៃទី ១៧ ខែកក្កដា ខាងមុខ ដើម្បីជួយពង្រឹងជំនាញកីឡាផ្នែកបាល់បោះដល់យុវជនកម្ពុជា និងធ្វើឲ្យពិភពលោកចាប់អារម្មណ៍មកលើកីឡាបាល់បោះនៅក្នុងប្រទេសកម្ពុជា។
ជាងនេះទៅទៀត ដំណើរមកកាន់កម្ពុជារបស់កីឡាករ Wayne Ellington និងកីឡាការិនី Sue Wicks ក៏នឹងផ្តោតលើការងារជាក្រុមរបស់យុវជន ការទំនាក់ទំនងជាមួយគ្នាបានល្អ ការបង្កើនការចេះឲ្យតម្លៃលើខ្លួនឯង និងមេរៀនដទៃទៀត ដែលនឹងបានរៀន តាមរយៈការលេងកីឡាបាល់បោះនេះ។
ស្របពេលដែលកីឡាករ កីឡាការិនីទាំងពីរមិនទាន់មកដល់កម្ពុជា ស្ថានទូតអាមេរិកប្រចាំនៅកម្ពុជាំ កំពុងធ្វើការជាមួយក្រសួងអប់រំ យុវជន និងកីឡា និងគណកម្មាធិការជាតិអូឡាំពិកកម្ពុជា សហព័ន្ធកីឡាបាល់បោះកម្ពុជា និងសមាគមអតីតនិស្សិតអាហារូបករណ៍ Fulbright នៃកម្ពុជា ដើម្បីទទួលបេសកជនកីឡា និងរៀបចំសកម្មភាពនានា។ ក្នុងចំណោមសកម្មភាពទាំងនេះ មានសកម្មភាព ២ ដែលនឹងត្រូវបានបើកឲ្យសាធារណជនចូលមើលដោយសេរី និងដោយមិនគិតថ្លៃនោះ មានដូចជា នៅម៉ោង ៩ ព្រឹក ថ្ងៃទី ១៤ កក្កដា នឹងមានកម្មវិធីជួបជុំដោយសេរី នៅសាលាវត្តកោះ ដើម្បីជួយដល់គំរោងជួសជុលទីលានលេងកីឡាបាល់បោះនៅក្នុងសាលានេះ។ ហើយនៅ ម៉ោង ៥ រសៀល ថ្ងៃទី ១៥ កក្កដា នឹងមានកម្មវិធីនៅពហុកីឡាដ្ឋានអូឡាំពិក ដោយមានការលេងបាល់បោះ ការប្រគំតន្ត្រី និងមានកម្មវិធីជាច្រើនទៀត។
កីឡាករ Wayne Ellington ត្រូវបានជ្រើសរើសជាកីឡាករ ទី ២៨ ដោយក្រុមកីឡា Minnesota Timberwolves ក្លាយជាសមាជិកក្រុមកីឡាបាល់បោះប្រចាំឆ្នាំនៅសហរដ្ឋអាមេរិក ក្នុងឆ្នាំ ២០០៩ ។ Ellington លេងឲ្យក្រុម Brooklyn Nets កាលពីឆ្នាំទៅ និងលេងឲ្យក្រុម Memphis Grizzlies, Cleveland Cavaliers, Dallas Mavericks និង Los Angeles Lakers ផងដែរ។ កីឡាករ Ellington ធ្លាប់ទទួលរង្វាន់ 2015-16 J. Walter Kennedy Citizenship Award។ ពានរង្វាន់នេះ សមាគមអ្នកនិពន្ធស្តីពីកីឡាបាល់បោះអាជីព ផ្តល់ឲ្យរាល់ឆ្នាំ ដល់កីឡាករនៅក្នុងសមាគមកីឡាបាល់បោះ គ្រូបង្ហាត់ ឬអ្នកបង្ហាត់កីឡាករ ដែលមានស្នាដៃឆ្នើមក្នុងការងារ។
ចំណែកកីឡាការិនី Sue Wicks បានជាប់ជាជម្រើសជុំដំបូងដោយក្រុម New York Liberty នៅក្នុងការជ្រើសរើសកីឡាការិនីជាលើកដំបូង ក្នុងឆ្នាំ ១៩៩៧ របស់សមាគមកីឡាការិនីបាល់បោះក្នុងសហរដ្ឋអាមេរិក។ កីឡាការិនីរូបនេះ លេងឲ្យសាកលវិទ្យាល័យ Rutgers University ហើយបានជាប់ជាកីឡាការិនីស្ម័គ្រចិត្តល្អជាងគេចំនួន ៣ លើក ក្នុងសហរដ្ឋអាមេរិក ព្រមទាំងនៅឆ្នាំ ១៩៨៨ បានក្លាយជាអ្នកលេងល្អបំផុតប្រចាំឆ្នាំក្នុងសហរដ្ឋអាមេរិក។ កីឡាការិនីឆ្នើមរូបនេះ ធ្លាប់ទទួលបានពានរង្វាន់ Kim Perrot Sportsmanship Award នៅឆ្នាំ ២០០០ ហើយបានបញ្ចប់អាជីពរបស់លោកស្រីនៅក្នុងសមាគមបាល់បោះនារីអាមេរិក ដោយជាប់លេខ ៨។ កីឡាការិនី Wicks ត្រូវបានបញ្ចូលទៅក្នុងក្រាំងមាសផ្នែកកីឡាការិនីបាល់បោះក្នុងសាកលវិទ្យាល័យ Rutgers នៅខែមិថុនា ឆ្នាំ ២០១៣៕
Tag:
កីឡា
ទូតអាមេរិក
បាល់បោះ
© រក្សាសិទ្ធិដោយ thmeythmey.com