កីឡាជាតិ
ជាតិ
មីយ៉ាន់ម៉ាជួបហ្វីលីពីនបង្គ្រប់កិច្ចមុន អូស្ត្រាលីប្រជែងជាមួយម៉ាឡេស៊ីដើម្បីឡើងទៅវគ្គ១/២
18, Jul 2016 , 11:25 am
កីឡាករអូស្ត្រាលី (លឿង) នាជំនួបកន្លងមកជាមួយវៀតណាម
×![]()
សម្រាប់ការប្រកួតដណ្តើមពានរង្វាន់ AFF U-16 Championship 2016 នៅក្នុងពហុកីឡដ្ឋានជាតិល្ងាចនេះ ក្រុមយុវជនជម្រើសជាតិអាយុក្រោម១៦ឆ្នាំមីយ៉ាន់ម៉ា ជួបប្រកួតបង្គ្រប់កិច្ចជាមួយក្រុមយុវជនជម្រើសជាតិអាយុក្រោម១៦ឆ្នាំហ្វីលីពីន ខណៈក្រុមយុវជនជម្រើសជាតិអូស្ត្រាលីត្រូវប្រជែងជាមួយយុវជនជម្រើសជាតិម៉ាឡេស៊ី ដើម្បីឡើងទៅវគ្គ១/២។ ចំណែកយុវជនជម្រើសជាតិសិង្ហបុរី ជួបជើងខ្លាំងយុវជនជម្រើសជាតិវៀតណាម។
ក្រុមបាល់ទាត់យុវជនជម្រើសជាតិមីយ៉ាន់ម៉ាខណៈដែលកំពុងឈរលំដាប់លេខ៤ដោយមាន៤ពិន្ទុក្រោយឆ្លងកាត់៤ប្រកួតឈ្នះ១ប្រកួតស្មើ១ប្រកួត និងចាញ់២ប្រកួតជួបប្រកួតបង្គ្រប់កិច្ចនៃពានរង្វាន់សហព័ន្ធកីឡាបាល់ទាត់អាស៊ាន AFF U-16 Championship ជាមួយក្រុមបាតតារាងដែលមិនស្គាល់ជ័យជម្នះយុវជនជម្រើសជាតិហ្វីលីពីន នាវេលាម៉ោង៣និង៣០នាទីល្ងាចនេះនៅក្នុងពហុកីឡដ្ឋានជាតិ។
ជាមួយគ្នានេះជំនួបរវាងក្រុមយុវជនជម្រើសជាតិអូស្ត្រាលី និងក្រុមយុវជនជម្រើសជាតិម៉ាឡេស៊ីនាវេលាម៉ោង៦ល្ងាចនៅក្នុងពហុកីឡដ្ឋានជាតិ និងក្លាយជាជំនួបមួយដ៏ស្វិតស្វាញបំផុត ព្រោះក្រុមទាំងពីរសុទ្ធតែត្រូវការឈ្នះដូចគ្នា ដើម្បីឡើងទៅប្រជែងនៅក្នុងវគ្គ១/២នៃពានរង្វាន់ AFF U-16 Championship ខណៈក្រុមទាំងពីរកំពុងមាន៧ពិន្ទុដូចគ្នានៅក្នុងពូលB។ សម្រាប់ការប្រកួតល្ងាចនេះប្រសិនបើក្រុមណាឈ្នះ ក្រុមនោះនឹងឡើងទៅកាន់វគ្គ១/២ជាមួយវៀតណាមតំណាងឲ្យពូលB។
ដោយឡែកក្រុមយុវជនជម្រើសជាតិអាយុក្រោម១៦ឆ្នាំសិង្ហបុរីនឹងប្រកួតបង្គ្រប់កិច្ចជាមួយជើងខ្លាំងដែលមិនធ្លាប់ស្គាល់បរាជ័យសម្រាប់៤ប្រកួតកន្លងនៃពានរង្វាន់ AFF U-16 Championship 2016 គឺក្រុមយុវជនជម្រើសជាតិវៀតណាម នាវេលាម៉ោង៨យប់នៅក្នុងពហុកីឡជាតិ។
គួរបញ្ជាក់ថា សម្រាប់ការប្រកួតក្នុងពូលBនៃពានរង្វាន់ AFF U-16 Championship 2016 កាលពីម្សិលមិញ ក្រុមម្ចាស់ផ្ទះកម្ពុជារងការបំបាក់យ៉ាងចាស់ដៃ ៦-០ របស់ក្រុមយុវជនជម្រើសជាតិអាយុក្រោម១៦ឆ្នាំ ក្រោយក្រុមយុវជនជម្រើសជាតិឡាវ លត់ ក្រុមយុវជនជម្រើសជាតិព្រុយណេ ៤-០៕
*កម្មវិធីប្រកួតថ្ងៃទី១៨ ខែកក្កដា ឆ្នាំ២០១៦ ៖
- ម៉ោង១៥:៣០នាទី៖ មីយ៉ាន់ម៉ា ជួប ហ្វីលីពីន នៅពហុកីឡដ្ឋានជាតិ
- ម៉ោង១៨:៣០នាទី៖ អូស្ត្រាលី ជួប ម៉ាឡេស៊ី នៅពហុកីឡដ្ឋានជាតិ
- ម៉ោង០៨:០០នាទី៖ សិង្ហបុរី ជួប វៀតណាម នៅពហុកីឡដ្ឋានជាតិ
Tag:
U16កម្ពុជា
AFF U16
© រក្សាសិទ្ធិដោយ thmeythmey.com
