កីឡាជាតិ
ជាតិ
ប្រាក់ មុន្នីឧត្តម, ហួយ ផល្លីន ជួយឲ្យស្វាយរៀងសងសឹកបានសម្រេច និងឡើងឈរលេខរៀងទី៤ 25, Aug 2016 , 1:30 pm
× ខ្សែប្រយុទ្ធដ៏ឆ្នើម ប្រាក់ មុន្នីឧត្តម និងខ្សែបម្រើកណ្តាល ហួយ ផល្លីន បានជួយឲ្យក្រុមព្រះខ័នរាជស្វាយរៀងសងសឹកបានសម្រេច និងឡើងទៅឈរលេខរៀងទី៤ ក្រោយពីពួកគេរកគ្រាប់បាល់ជ័យជម្នះ ៣-២ លើភ្នំពេញក្រោនក្នុងការប្រកួតពានរង្វាន់លីកកំពូលកម្ពុជានៅលើទឹកដីរបស់ខ្លួនកាលពីម្សិលមិញ។
ទីបំផុតក្រុមព្រះខ័នរាជស្វាយរៀងអាចជម្រះបញ្ជីចាស់ជាមួយក្រុមភ្នំពេញក្រោនបានសម្រេចនៅលើទឹកដីរបស់ខ្លួន បន្ទាប់ពីមានការជួយសម្រេចគ្រាប់បាល់ពីសំណាក់ខ្សែប្រយុទ្ធ ប្រាក់ មុន្នីឧត្តម ២គ្រាប់ និងកីឡាករ ហួយ ផល្លីន ១គ្រាប់ ក្នុងការប្រកួតពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ កាលពីម្សិលមិញ។
គ្រាប់បញ្ចូលទី២គ្រាប់របស់ ប្រាក់ មុន្នីឧត្តម នៅចំថ្ងៃប្រារព្ធខួបកំណើត២២ឆ្នាំ និង១គ្រាប់ទៀតរបស់ ហួយ ផល្លីន មិនត្រឹមតែជួយឲ្យព្រះខ័នរាជស្វាយរៀងអាចយកឈ្នះ ៣-២ លើភ្នំពេញក្រោនប៉ុណ្ណោះទេ លើសពីនេះជួយឲ្យក្រុមនេះឡើងទៅឈរលេខរៀងទី៤ ក្នុងតារាងនៃពានរង្វាន់លីកកំពូលកម្ពុជាដោយមាន២៨ពិន្ទុថែមទៀតផង។ ចំណែក២គ្រាប់របស់ភ្នំពេញក្រោនសម្រេចដោយកីឡាករ កែវ សុខផេង និង កុក បូរីស ម្នាក់១គ្រាប់។
លទ្ធផល ៣-២ នេះបានធ្វើឲ្យក្រុមភ្នំពេញក្រោនដែលឈរក្នុងលេខរៀងទី៤ធ្លាក់ទៅឈរលេខរៀងទី៥ ដោយមាន២៨ពិន្ទុ ទោះបីពិន្ទុនេះស្មើជាមួយស្វាយរៀងក៏ដោយ ប៉ុន្តែចាញ់គ្រាប់បាល់ចំណេញរបស់ព្រះខ័នរាជស្វាយរៀង។ ជំនួបនៅលើទឹកដីខេត្តស្វាយរៀងកាលពីថ្ងៃទី២៤ ខែសីហា ម្សិលមិញនេះជាការប្រកួតបញ្ចប់រដូវកាលរបស់ភ្នំពេញក្រោន ខណៈស្វាយរៀងនៅសល់មួយប្រកួតជាមួយវេស្ទើនភ្នំពេញ៕
Tag:
បាល់ទាត់
Cambodian League 2016
© រក្សាសិទ្ធិដោយ thmeythmey.com