អន្តរជាតិ
ជប៉ុន៖ អ្នករៀបចំអូឡាំពិកឆ្នាំ២០២០ ស្នើប្រជាជនបរិច្ចាគទូរសព្ទចាស់ៗដើម្បីយកធ្វើមេដាយ 03, Feb 2017 , 8:59 am
× អ្នករៀបចំព្រឹត្តិការណ៍អូឡាំពិកឆ្នាំ២០២០ និងបារ៉ាឡាំពិកឆ្នាំ២០២០ ដែលមានទីក្រុងតូក្យូធ្វើជាម្ចាស់ផ្ទះ បានស្នើឲ្យប្រជាជនរស់នៅជប៉ុនទាំងអស់បរិច្ចាគទូរសព្ទដែលលែងប្រើប្រាស់ ដើម្បីកែច្នៃជាមេដាយសម្រាប់អត្តពលិកចូលរួមព្រឹត្តិការណ៍ដ៍ធំទាំងពីរនេះ។ គោលដៅនៃការអំពាវនាវនេះ សំដៅជួយការពារបរិស្ថាន ស្របពេលដែលវត្ថុធាតុដើមសម្រាប់ធ្វើជាមេដាយក៏មិនសូវមានដូចមុនដែរ។
គណៈកម្មាធិការរៀបចំកីឡាអូឡាពិកឆ្នាំ២០២០ នៅថ្ងៃទី១ ខែកុម្ភៈ បានប្រកាសថា ខ្លួនសហការជាមួយក្រុមហ៊ុនទូរគមនគមន៍ NTT Docomo និងទីភ្នាក់ងារអនាម័យបរិស្ថានជប៉ុន ដើម្បីធ្វើយុទ្ធនាការប្រមូលទូរសព្ទចាស់ៗ ចាប់ពីខែមេសា។ គណៈកម្មាធិការនេះរំពឹងអាចប្រមូលលោហៈចំនួន៨តោនពីទូរសព្ទចាស់ៗ ដើម្បីចម្រាញ់ធ្វើមេដាយចំនួន៥ពាន់ សម្រាប់ត្រៀមកីឡាអូឡាំពិកឆ្នាំ២០២០ និងកីឡាប៉ារ៉ាឡាំពិកឆ្នាំ២០២០ ដូចគ្នា។
បើតាមសារព័ត៌មាន The Japan Times ប្រអប់បរិច្ចាគ នឹងត្រូវពង្រាយនៅតាមហាងច្រើនជាង២៤០០ របស់ក្រុមហ៊ុន NTT Docomo និងនៅតាមការិយាល័យសាធារណជាច្រើនកន្លែងទៀត។ គណៈកម្មាធិការរៀបចំអូឡាំពិក សង្ឃឹមថា ពួកគេអាចប្រមូលទូរសព្ទជាច្រើនលានគ្រឿង ដើម្បីទទួលបានសារធាតុលោហៈ៨តោន មុននឹងចម្រាញ់មកត្រឹម២តោន ក្នុងការផលិតមេដាយសម្រាប់អត្តពលិកទទួលជ័យជម្នះ។ យុទ្ធនាការនេះ នឹងត្រូវបញ្ចប់ពេលគណៈកម្មាធិការទទួលបានលោហៈ៨តោន។
នៅព្រឹត្តិការណ៍អូឡាំពិកលើកមុនៗ មេដាយសម្រាប់បំពាក់ឲ្យកីឡាករ ត្រូវបានផលិតចេញពីរបស់កែច្នៃដែរ។ ប៉ុន្តែសម្រាប់ព្រឹត្តិការអូឡាពិកក្រុងតូក្យូ គឺជាលើកទីមួយ ដែលមេដាយទាំងអស់ត្រូវបានផលិតចេញពីសម្ភារអេឡិចត្រូនិច។ អ្នករៀបចំព្រឹត្តិការណ៍នេះ បញ្ជាក់ថា មេដាយមាសទាំងអស់ នឹងត្រូវផលិតចេញពីសម្ភារកែច្នៃ១០០ភាគរយតែម្ដង។
ម្ចាស់មេដាយមាសអូឡាំពិកវិញ្ញាកាយវប្បកម្មបីជំនាន់ Kohei Uchimura បាននិយាយថា មេដាយកីឡាអូឡាពិកឆ្នាំ២០២០ និងកីឡាប៉ារ៉ាឡាំពិកឆ្នាំ២០២០ នឹងត្រូវផលិតចេញពីចិត្តរបស់ប្រជាជន ក្នុងការចៀសវាងផលិតកាកសំណល់។ លោកគិតថា សកម្មភាពនេះ ជាសារដ៏សំខាន់សម្រាប់មនុស្សជំនាន់ក្រោយ។
ទន្ទឹមគ្នានេះ អត្តពលិកអាមេរិក Ashton Eaton ដែលជាម្ចាស់មេដាយមាសពីរជំនាន់លើវិញ្ញាសា Decathlon ក៏បានបង្ហាញការយល់ស្របក្នុងការទាញយកវត្ថុកែច្នៃធ្វើជាមេដាយសម្រាប់កីឡាករជ័យលាភីដែរ។ លោកនិយាយថា៖ មេដាយដែលពាក់នៅលើក តែងតែមានអត្ថន័យខ្ពង់ខ្ពស់។ នៅពេលដែលអត្តពលិកណាមួយម្នាក់ឈ្នះមេដាយនៅតូក្យូ វាមិនមែនត្រឹមតែជាមេដាយមាស ប្រាក់ ឬសំរិទ្ធឡើយ តែជាមេដាយតំណាងជាតិទាំងមូល»៕
© រក្សាសិទ្ធិដោយ thmeythmey.com