អន្តរជាតិ
អង់គ្លេស មិនទាន់ច្បាស់ថាត្រូវទទួលទស្សនកិច្ច ដូណាល់ ត្រាំ ឬយ៉ាងណានោះឡើយ 03, Feb 2017 , 8:39 pm
× គម្រោងទស្សនកិច្ចរបស់ប្រធានាធិបតីអាមេរិក ដូណាល់ ត្រាំ នៅចក្រភពអង់គ្លេស កំពុងក្លាយជាចម្រូងចម្រាស់។ ទស្សនកិច្ចនេះ ទទួលបានទាំងការគាំទ្រ និងការប្រឆាំង ព្រោះអាមេរិក ជាសម្ព័ន្ធស្អិតល្មួតរបស់អង់គ្លេសតាំងពីយូរមកហើយ ដែលដំណើរទស្សនកិច្ចលើកនេះបង្ហាញពីទំនាក់ទំនងល្អរវាងប្រទេសទាំងពីរ។ ប៉ុន្តែគោលនយោបាយហាមឃាត់ជនអន្តោប្រវេសន៍មូស្លីមរបស់លោក ត្រាំ គឺជាបញ្ហាដែលធ្វើឲ្យប្រជាជនអង់គ្លេសជាច្រើន មិនសប្បាយចិត្តឡើយ។ ចំណែកសភាអង់គ្លេស ក៏នឹងពិភាក្សាលើរឿងនេះដើម្បីសម្រេចថា ទទួលលោក ត្រាំ ឬអត់។
អំឡុងទស្សនកិច្ចក្នុងរដ្ឋធានីវ៉ាស៊ីនតោនកាលពីសប្ដាហ៍មុន នាយករដ្ឋមន្ត្រីអង់គ្លេស Theresa May បានអញ្ជើញដោយផ្ទាល់ប្រធានាធិបតី ដូណាល់ ត្រាំ មកទស្សនកិច្ចផ្លូវរដ្ឋនៅចក្រភពអង់គ្លេស។ ការិយាល័យនាយករដ្ឋមន្ត្រីអង់គ្លេស បញ្ជាក់ថា លោកស្រី May អញ្ជើញលោក ត្រាំ ក្នុងព្រះនាមមហាក្សត្រីយ៍ Elizabeth II ដែលជាប្រមុខរដ្ឋនៃចក្រភពអង់គ្លេស ហើយលោកស្រីពិតជារីករាយដែលធ្វើការងារនេះ។
សូមស្តាប់សំឡេង
យ៉ាងណាក្ដី នៅក្រោយការអញ្ជើញនេះ ប្រជាជនអង់គ្លេសរាប់លាននាក់ផ្ទុះការតវ៉ាប្រឆាំងគម្រោងទស្សនកិច្ចរបស់ប្រធានាធិបតីអាមេរិករូបនេះមកកាន់អង់គ្លេស។ នេះ ក៏ដោយសារពួកគេខឹងសម្បារបញ្ជាហាមឃាត់លំហូរជនអន្តោប្រវេសន៍មកពីប្រទេសឥស្លាមចំនួន៧ ដែលពួកគេចាត់ទុកជាការរើសអើងពូសាសន៍ និងបានរំលោភសិទ្ធិមនុស្សយ៉ាងធ្ងន់ធ្ងរ។ ពួកគេ ក៏បានដាក់ញត្តិស្នើរដ្ឋាភិបាលឲ្យផ្អាកទស្សនកិច្ចនេះសិន។
សារព័ត៌មាន The Guardian ផ្សាយថា មិនត្រឹមតែប្រជាជនសាមញ្ញឡើយ សូម្បីតែតារាល្បីឈ្មោះ អ្នកនយោបាយប្រឆាំង និងបុគ្គលលេចមុខមាត់ជាច្រើន ក៏មិនពេញការអញ្ជើញលោក ត្រាំ មកអង់គ្លេសដែរ។ ពួកគេ បានគំរាមធ្វើបាតុកម្មដ៏ធំមិនធ្លាប់មានក្នុងប្រវត្តិសាស្ត្រអង់គ្លេស ដើម្បីប្រឆាំងដំណើរទស្សនកិច្ចរបស់នេះ។ ដោយសំដៅលើការហាមប្រាមជនអន្តោប្រវេសន៍ ក្រុមប្រឆាំងទាំងនេះ បានហៅបទបញ្ជារបស់លោក ត្រាំ ជាគ្រោះថ្នាក់ និងរើសអើង។
ប៉ុន្តែនាយករដ្ឋមន្ត្រី May ដែលជាមេដឹកនាំបរទេសទីមួយទៅជួបលោក ដូណាល់ ត្រាំ ដល់សេតវិមាននោះ នៅតែទទូចបន្តរៀបចំទស្សនកិច្ចលើកនេះដដែល។ ការិយាល័យ 10 Downing Street ក៏បានចេញមកបញ្ជាក់ដែរថា ទស្សនកិច្ចរបស់ប្រធានាធិបតីអាមេរិក អាចនឹងរៀបចំឡើងនៅឆមាសទីពីរ ឆ្នាំ២០១៧ ។
១. សភាអង់គ្លេស នឹងពិភាក្សាញត្តិប្រឆាំងទស្សនកិច្ចលោក ត្រាំ នៅចុងខែកុម្ភៈ
គ្រាន់តែឮដំណឹងថា នាយករដ្ឋមន្ត្រី May អញ្ជើញប្រធានាធិបតី ដូណាល់ ត្រាំ មកទស្សនកិច្ចនោះ ប្រជាជនចក្រភពអង់គ្លេសជិត២លាននាក់ បានធ្វើញត្តិមួយប្រឆាំងទស្សនកិច្ចនេះ ជាការឆ្លើយតបនឹងបម្រាមរបស់លោក ត្រាំ ។ ទន្ទឹមនឹងការប្រឆាំង ទស្សនកិច្ចនេះ ក៏ទទួលបានការគាំទ្រពីប្រជាជនជាច្រើនម៉ឺននាក់ផងដែរ ហើយពួកគេស្នើឲ្យរដ្ឋាភិបាលបន្តទទួលប្រធានាធិបតីដូចការគ្រោងទុក ព្រោះសម្ព័ន្ធមិត្តទាំងពីរ ត្រូវធ្វើការជាមួយគ្នាដោយចៀសមិនផុត។
ក្នុងស្ថានភាពបែបនេះ សភាអង់គ្លេស នឹងពិភាក្សាលើញត្តិទាំងពីរនេះនៅចុងខែកុម្ភៈ ព្រោះច្បាប់អង់គ្លេសកំណត់ឲ្យសភាពិភាក្សាលើបញ្ហាណាមួយកាលបើមានសំណើពីប្រជាជនច្រើនបែបនេះ។ គេរំពឹងថា សភាអង់គ្លេស ទំនងជាមិនប្រឆាំងទស្សនកិច្ចរបស់លោក ត្រាំ ឡើយ ព្រោះអង់គ្លេស និងអាមេរិក ជាមិត្តល្អនឹងគ្នាស្រាប់ហើយ។
សមាជិកសភាមកពីប្រឆាំង ដែលមិនពេញចិត្តគោលនយោបាយលោក ត្រាំ ដែរនោះ ប្រហែលជាបោះឆ្នោតគាំទ្រញត្តិប្រឆាំងទស្សនកិច្ចប្រធានាធិបតី បើទោះជាមិនអាចរារាំងទស្សនកិច្ចនេះក៏ដោយ។ ជាងនេះទៅទៀត សមាជិកសភាច្រើនជាងមួយរយនាក់ ក៏បានចុះហត្ថលេខាលើញត្តិមួយដែលសំដៅរារាំងប្រធានាធិបតី ដូណាល់ ត្រាំ ពីការថ្លែងសុន្ទកថាចំពោះមុខសភា ក្នុងករណីដែលគម្រោងទស្សនកិច្ចរៀបចំតាមគម្រោងមែន។
២. ដំណើររបស់ ដូណាល់ ត្រាំ មកអង់គ្លេស អាចមានកម្រិតត្រឹមទស្សនកិច្ចផ្លូវការ
ការអញ្ជើញលោក ត្រាំ មកទស្សនកិច្ចនៅអង់គ្លេស មិនមែនជាបញ្ហារដ្ឋាភិបាលលោកស្រី May តែមួយឡើយ។ គម្រោងទស្សនកិច្ចរបស់ប្រធានាធិបតីអាមេរិក កំពុងធ្វើឲ្យរាជវាំង Buckingham ស្ថិតក្នុងស្ថានភាពលំបាកខ្លាំង ព្រោះតែនយោបាយចម្រូងចម្រាស់ និងរើសអើងរបស់លោក ត្រាំ លើជនភៀសខ្លួនតែម្ដង។
អតីតប្រមុខការិយាល័យការបរទេសអង់គ្លេស លោក Peter Ricketts បានសរសេរសំបុត្រមួយទៅកាន់សារព័ត៌មាន Times ដោយបានហៅការអញ្ជើញលោក ត្រាំ ជារឿងខ្វះការពិចារណា។ លោកសង្កត់ធ្ងន់ថា លោកប្រធានាធិបតី ត្រាំ មិនគួរត្រូវបានអញ្ជើញមកទស្សនកិច្ចនៅអង់គ្លេសនៅពេលនេះឡើយ ព្រោះលោកទើបតែចូលកាន់តំណែងប៉ុណ្ណោះ។ លោក ត្រាំ ទើបតែចូលកាន់តំណែងនៅថ្ងៃទី២០ ខែមករា ហើយបើគិតដល់ពេលទស្សនកិច្ចនោះ លោកមិនទាន់កាន់តំណែងបានមួយឆ្នាំស្រួលផង។
ដោយឡែកក្នុងញត្តិប្រឆាំងដែលចុះហត្ថលេខាដោយប្រជាជនច្រើនជាង១លាន៨សែននាក់ ក៏បានដាក់លក្ខខណ្ឌមួយសម្រាប់ទស្សនកិច្ចប្រធានាធិបតីអាមេរិក។ ញត្តិបានទាមទារឲ្យកំណត់កម្រិតទស្សនកិច្ចនេះនៅត្រឹមថ្នាក់ប្រមុខរដ្ឋាភិបាលបានហើយ។ ពោល គឺលោក ត្រាំ មកអង់គ្លេសក្នុងនាមជាប្រមុខរដ្ឋាភិបាលអាមេរិក មិនមែនជាប្រធានាធិបតីឡើយ ព្រោះអាចប៉ះពាល់ចេស្ដាមហាក្សត្រីយ៍ Elizabeth II ៕
Tag:
ដូណាល់ ត្រាំ
អង់គ្លេស
អាមេរិក
© រក្សាសិទ្ធិដោយ thmeythmey.com