អន្តរជាតិ
មង្គលការកូនស្រីប្រធានសភាមីយ៉ាន់ម៉ា មិនទទួលចំណងដៃ 06, Feb 2017 , 3:34 pm
លោក Win Myint ជាប្រធានសភាជាន់ទាបមីយ៉ាន់ម៉ា ប្រកាសមិនទទួលយកចំណងដៃក្នុងមង្គលការកូនស្រីឡើយ
× ជាប្រពៃណី ជនជាតិមីយ៉ាន់ម៉ាតែងតែផ្ដល់វត្ថុអនុស្សាវរីយ៍ ឬចំណងដៃ ពេលចូលរួមពិធីអាពាហ៍ពិពាហ៍ ដើម្បីឲ្យគូស្រករថ្មីមានលទ្ធភាពកសាងជីវិតថ្មី។ យ៉ាងណាមិញ ពិធីមង្គលការរបស់កូនស្រីលោក Win Myint ជាប្រធានសភាជាន់ទាបមកពីគណបក្សសម្ព័ន្ធភាពដើម្បីប្រជាធិបតេយ្យ បានប្រកាសមិនទទួលយកចំណងដៃពីអ្នកចូលរួមកម្មវិធីនេះឡើយ។ គេអាចយល់បានថា នេះជាការអនុវត្តតាមការណែនាំរបស់លោកស្រីអ៊ុងសាន ស៊ូជី ក្នុងលុបបំបាត់អំពើពុករលួយ។
«សូមកុំចងដៃ!» នេះជាពាក្យស្នើសុំដែលសរសេរលើសំបុត្រការរបស់កូនស្រីប្រធានសភាជាន់ទាបមីយ៉ាន់ម៉ា Win Myint ដែលគ្រោងធ្វើនៅថ្ងៃទី១១ ខែកុម្ភៈ ក្នុងរដ្ឋធានីណៃពិដោរ។ ការស្នើសុំនេះ គឺខុសពីទម្លាប់របស់ប្រជាជនមីយ៉ាន់ម៉ា ដែលតែងផ្ដល់វត្ថុអនុស្សាវរីយ៍ដល់គូស្រករថ្មី ក្នុងការចាប់ផ្ដើមជីវិតថ្មីរបស់ខ្លួន។
ជាទូទៅ បងប្អូន ឬសាច់ញាតិគូស្រករថ្មី តែងតែឲ្យចំណងដៃដោយក្ដីមេត្តា ឯគូស្រករថ្មី ក៏ទទួលដោយការដឹងគុណវិញ។ នៅមីយ៉ាន់ម៉ា គូស្រករថ្មីតែងទទួលបានការចងដៃជាឡាន ឬក៏ជាទឹកប្រាក់ក្នងចំនួនច្រើនពីភ្ញៀវចូលរួម ជាពិសេសករណីពួកគេមានឪពុកម្ដាយជាមន្ត្រីមានអំណាចក្នុងរដ្ឋាភិបាល ឬស្ថាប័នរដ្ឋផ្សេងទៀត ដោយសង្ឃឹមថានឹងទទួលបានផលប្រយោជន៍។
បើតាមសារព័ត៌មាន The Irrawaddy លោក Soe Moe ដែលជាកូនកំលោះ និងជាសមាជិកសភាជាន់ខ្ពស់មីយ៉ាន់ម៉ាដែរនោះ បានប្រាប់អ្នកសារព័ត៌មានថា គ្រួសារទាំងពីរ បានសម្រេចចិត្តមិនទទួលវត្ថុអនុស្សាវរីយ៍អ្វីទាំងអស់។ លោកនិយាយថា៖ «នេះមិនមែនជារឿងធំដុំឡើយ។»
បើទោះជាគេមិនដឹងច្បាស់ពីគោលបំណងនៃការប្រកាសមិនទទួលចំណងដៃនេះ គេអាចយល់បានថា នេះជាការអនុវត្តតាមគោលការណ៍របស់ទីប្រឹក្សារដ្ឋ អ៊ុងសាន ស៊ូជី ដែលកំណត់ប្រភេទនៃវត្ថុអនុស្សាវរីយ៍ណា ដែលមន្ត្រីស៊ីវិលអាចទទួលបាន ដើម្បីកាត់បន្ថយអំពើពុករលួយ។ គោលការណ៍នេះកំណត់ថា មន្ត្រីរដ្ឋាភិបាល មិនអាចទទួលវត្ថុអនុស្សាវរីយ៍មានតម្លៃច្រើនជាង២៥០០០ម៉ឺនក្យាត (ស្មើនឹង២១ដុល្លារ) ឡើយ។
គោលការណ៍ណែនាំនេះ ជាវិធានការរដ្ឋាភិបាលលោកស្រី ស៊ូជី ដើម្បីបង្ហាញពីភាពស្អាតស្អំរបស់ខ្លួន ខណៈអំពើពុករលួយកំពុងក្លាយជាមូលហេតុនៅពីក្រោយការាំងស្ទះការអភិវឌ្ឍ និងការធ្វើវិនិយោគ។ វិធានការថ្មីនេះ សំដៅបែងចែកកាដូដែលត្រូវបានផ្ដល់សម្រាប់ការងារនិងកាដូដែលមានបំណងសូកប៉ាន់។ នៅក្នុងអាណត្តិរបស់អតីតប្រធានាធិបតីលោក ថេន សេន ក៏ធ្លាប់មានការកំណត់តម្លៃកាដូដែលត្រូវទទួលដូចគ្នា តែមន្ត្រីពេលនោះអាចទទួលដែលមានតម្លៃរហូតដល់៣សែនក្យាត។
លុយ គ្រឿងមាសប្រាក់ សំបុត្រយន្តហោះ ការទទួលទានអាហារដោយសេរី ព្រមទាំងការចូលជាសមាជិកក្លឹបវាយហ្គោល សុទ្ធតែស្ថិតក្រោមការហាមឃាត់របស់វិធានការថ្មីទាំងអស់។ មួយវិញទៀត មន្ត្រីសាធារណៈទាំងអស់មិនត្រូវទទួលកាដូពីស្ថាប័ន ឬបុគ្គលដែលចង់បានប្រយោជន៍ពីខ្លួននោះទេ ទោះជាកត្តាពាណិជ្ជកម្ម ឬអ្វីផ្សេងក៏ដោយ៕
Tag:
មីយ៉ាន់ម៉ា
Win Myint
© រក្សាសិទ្ធិដោយ thmeythmey.com