អន្តរជាតិ
សមាជិកសភាអង់គ្លេសទំនងមិនឲ្យ ដូណាល់ ត្រាំ ចូលផ្តល់សុន្ទរកថាក្នុងសភា 07, Feb 2017 , 9:59 pm
× ប្រធានសភាអង់គ្លេសប្រឆាំងដាច់ខាតការផ្តល់សុន្ទរកថារបស់លោក ដូណាល់ ត្រាំ នៅសភាអង់គ្លេសនៅពេលដែលលោកមកបំពេញទស្សនកិច្ចនៅអង់គ្លេសចុងឆ្នាំនេះ។ ប្រជាជនអង់គ្លេសច្រើនជាង ១,៨លាននាក់ក៏បានទាមទារឲ្យមានការលុបចោលដំណើរទស្សនកិច្ចនេះឬធ្វើយ៉ាងណាបន្ថយកម្រិតនៃទស្សនកិច្ចដើម្បីបង្ការក្រែងមានការធ្វើឲ្យប៉ះពាល់ដល់កិត្តិនាមម្ចាស់ក្សត្រីយ៍ Elizabeth។
ប្រធានសភាអង់គ្លេសលោក John Bercow ( បឺកូវ) បានប្រាប់អង្គប្រជុំសភាថា លោកប្រឆាំងដាច់ខាតចំពោះការអនុញ្ញាតឲ្យប្រធានាធិបតីអាមេរិក ដូណាល់ ត្រាំ ផ្តល់សុន្ទរកថានៅក្នុងសភាអង់គ្លេស។ លោក ដូណាល់ ត្រាំ គ្រោងនឹងមកទស្សនកិច្ចនៅអង់គ្លេសនៅចុងឆ្នាំ ២០១៧ខាងមុខនេះ។
សូមស្តាប់សំឡេង
យោងតាមទីភ្នាក់ងារព័ត៌មាន Reuters នៅពេលដែលគណបក្សការងារដែលជាគណបក្សប្រឆាំងសួរថា តើការផ្តល់សុន្ទរកថាអាចកើតមានឬអត់ ប្រធានសភាខាងលើបានឆ្លើយតបវិញថា លោកបារម្ភចំពោះការផ្តល់សុន្ទរកថាដែរ។ លោកបានបញ្ជាក់បែបនេះ៖« ដរាបណាស្ថាប័នសភានេះស្ថិតនៅក្នុងក្តីបារម្ភរបស់យើង ខ្ញុំមានអារម្មណ៍ថា ការប្រឆាំងចំពោះការរើសអើងពូជសាសន៍ និងប្រឆាំងការមាក់ងាយលើស្ត្រីភេទ ក៏ដូចជាការគាំទ្រភាពស្មើគ្នាចំពោះមុខច្បាប់និងឯករាជ្យនៃស្ថាប័នតុលាការ នៅតែអ្វីដែលសំខាន់សម្រាប់យើងពិចារណា»។
លោកបន្ថែមថា លោកនៅតែប្រឆាំងរាល់ការអញ្ជើញលោក ដូណាល់ ត្រាំ ឲ្យមកផ្តល់សុន្ទរកថា ទោះនៅសភាមួយណាក៏ដោយ។ ហើយ លោក Bercow ក៏ជាអ្នកនយោបាយម្នាក់ក្នុងចំណោមមនុស្សបីនាក់ដែលមានសិទ្ធិសម្រេចផ្តល់ការអនុញ្ញាតឲ្យមានការថ្លែងសុន្ទរកថានៅសភាឬអត់។
កាលពីឆ្នាំ ២០១១ លោក បារ៉ាក់ អូបាម៉ា បានក្លាយជាប្រធានាធិបតីអាមេរិកដំបូងបំផុតដែលបានផ្តល់សុន្ទរកថាទៅកាន់សភាអង់គ្លេសទាំងពីរនៅ Westminster។ វាជាទីកន្លែងដែលមេដឹកនាំពិភពលោកដូចជាប្រធានាធិបតីអាហ្វ្រិកខាងត្បូងលោក Nelson Mandela និងប្រធានាធិបតីបារាំង លោក Charles de Gaulle ផ្តល់សុន្ទរកថាផងដែរ។
ត្រឡប់មកវិញលោក Bercow បានពន្យល់ថា លោកជំទាស់ការផ្តល់សុន្ទរកថាលោក ត្រាំ តាំងពីមុនពេលដែលប្រធានាធិបតីរូបនេះសម្រេចដាក់បទបញ្ជាហាមប្រាមប្រជាជនមកពីប្រទេស ៧ចូលដីអាមេរិកម្ល៉េះ ហើយលោករឹតតែជំទាស់ខ្លាំងទៀតក្រោយការដាក់បទបញ្ជានេះ។
សមាជិកសភាអង់គ្លេសប្រហែល ១៦៣ រូបបានចុះហត្ថលេខាលើញ្ញត្តិ ជំទាស់សុន្ទរកថារបស់លោកត្រាំ ដោយពួកគេលើកយកការហាមប្រជាជននិងជនអន្តោប្រវេសន៍ ក៏ដូចជាប្រើប្រាស់ពាក្យសម្តីចម្អាសចំអូង និងចង់ប្រើទារុណកម្មព្រៃផ្សៃឡើងវិញជាដើមជាសម្អាង។
កាលពីចុងខែមុនលោក ដូណាល់ ត្រាំ បានសម្រេចដាក់បទបញ្ជាហាមប្រជាជនមកពីប្រទេសម៉ូស្លីម៧ លើពិភពលោកចូលដីអាមេរិក ដោយសម្អាងលើហេតុផលសន្តិសុខ។ ប៉ុន្តែការសម្រេចរបស់លោកបានបង្កឲ្យមានការខឹងសម្បារនិងតវ៉ាខ្លាំងពីសំណាក់អ្នកនយោបាយ សកម្មជនសិទ្ធិមនុស្ស ក្រុមហ៊ុន និងសម្ព័ន្ធមិត្តខ្លួនផង។
ក្រៅមានការជំទាស់សុន្ទរកថារបស់លោកត្រាំ ក្នុងចំណោមសមាជិកសភា មកដល់ពេលនេះ ប្រជាជនអង់គ្លេសច្រើនជាង ១,៨ លាននាក់បានគាំទ្រញ្ញត្តិទាមទារឲ្យមានការលុបចោលដំណើរទស្សនកិច្ចរបស់លោក ដូណាល់ ត្រាំ មកកាន់អង់គ្លេស ឬអាចបន្ទាបកម្រិតទស្សនកិច្ចផង៕
© រក្សាសិទ្ធិដោយ thmeythmey.com