អន្តរជាតិ
ដូណាល់ ត្រាំ ប្រាប់សភាអាមេរិកថា រដ្ឋបាល អូបាម៉ាបន្សល់តែរឿងអាក្រក់ឲ្យលោក 01, Mar 2017 , 9:19 pm
× ប្រធានាធិបតីអាមេរិកលោក ដូណាល់ ត្រាំ បានឆ្លៀតឱកាសទិតៀនរដ្ឋបាលលោក បារ៉ាក់ អូបាម៉ាឥតមានសំចៃមាត់ក្នុងពេលដែលលោកថ្លែងសុន្ទរកថាចំពោះមុខសមាជិកសភា អាមេរិកនាថ្ងៃ ២៨ កុម្ភៈ។ លោកបញ្ជាក់ថា រដ្ឋបាលមុនបន្សល់ទុកតែមរតកអាក្រក់ៗមានបំណុលច្រើនសន្ធឹកសន្ធាប់, ឱនភាពពាណិជ្ជកម្ម និង បរាជ័យនៃនយោបាយការបរទេសជាដើមផង។
ក្នុងសុន្ទរកថា ទៅកាន់សភាជាលើកដំបូង លោក ដូណាល់ ត្រាំ ចំណាយពេលវេលាយ៉ាងច្រើនរៀបរាប់ពីគោលនយោបាយដែលរដ្ឋបាលរបស់លោក ត្រូវអនុវត្តរយៈពេល ៤ឆ្នាំទៅមុខ។ ប៉ុន្តែមេដឹកនាំអាមេរិករូបនេះ បានឆ្លៀតឱកាសវាយប្រហារអតីតប្រធានាធិបតី ដែលកាន់អំណាចពីរអាណត្តិចាប់ពីវិបត្តិសេដ្ឋកិច្ចពិភពលោកកើតឡើងនោះ។
ប្រធានាធិបតី ដូណាល់ ត្រាំ បានលើកឡើងពីបញ្ហាជាច្រើនដែលលោករដ្ឋបាលលោក ត្រូវដោះស្រាយបន្ទាប់ពីពេលដែលរដ្ឋបាលមុនចាកចេញទៅ ។ បញ្ហាមានច្រើន មានទាំងសេដ្ឋកិច្ច សង្គម និងនយោបាយការបរទេសថែមទៀតផង។ តែការកើនឡើងនៃបំណុលអាមេរិកក្រោមរដ្ឋបាលលោក បារ៉ាក់ អូបាម៉ា ត្រូវបានលោក ដូណាល់ ត្រាំ ទិតៀនខ្លាំងជាងគេ។
«ក្នុងរយៈពេល៨ឆ្នាំមកនេះ រដ្ឋបាលមុន (មិនហៅឈ្មោះលោក អូបាម៉ា ចំៗ) បានបង្កើនបំណុលថ្មីច្រើនសន្ធឹកស្ទើរតែច្រើនជាងបំណុលដែលប្រធានាធិបតីអាមេរិកទាំងអស់មានរួមបញ្ចូលគ្នាទៅទៀត»។ នេះជាការបញ្ជាក់លោក ដូណាល់ ត្រាំ។
ប្រធានាធិបតីដែលសន្យាតម្កល់ប្រយោជន៍អាមេរិកជាធំរូបនេះបានបន្តថា៖ « យើងបានបាត់បង់ការងារក្នុងវិស័យផលិតកម្មចំនួន ១ភាគ ៤ ចាប់ពីពេលដែលកិច្ចព្រមព្រៀងពាណិជ្ជកម្មសេរី អាមេរិកខាងជើង (NAFTA)។ ហើយយើងបានបាត់បង់រោងចក្រប្រហែល ៦ម៉ឺនចាប់ពីពេលដែលចិនចូលរួមជាមួយអង្គការពាណិជ្ជកម្មពិភពលោកឆ្នាំ ២០០១។ នៅបរទេសវិញ មិនបាច់និយាយ យើងត្រូវបានគេផ្ទេរឲ្យនូវនយោបាយការបរទេសដែលជួបគ្រោះមហន្តរាយ»។
ក្រៅពីរិះគន់រដ្ឋបាលអាមេរិកអាណត្តិមុនហើយ លោក ដូណាល់ ត្រាំ បានប្រាប់សភាថា ទំព័រថ្មីនៃភាពអស្ចារ្យរបស់អាមេរិកកំពុងចាប់ផ្តើមហើយក្រោមអាណត្តិរបស់លោក ដែលសំដៅដល់ការធ្វើឲ្យអាមេរិកអស្ចារ្យជាថ្មីម្តងទៀតដូចដែលលោក បានសន្យាកន្លងមកដែរ។
លោក ដូណាល់ ត្រាំ បានសន្យាថា លោកនឹងដោះស្រាយបញ្ហាប្រឈមនានារបស់សហរដ្ឋអាមេរិកជាពិសេសបញ្ហាសន្តិសុខនិងសេដ្ឋកិច្ច។
លោក ត្រាំ បានសង្កត់ធ្ងន់ថា ដើម្បីកសាងសង្គមអាមេរិកឡើងវិញ រដ្ឋបាលលោក ដើរតាមគោលការណ៍ពីរគឺ ៖«មួយគឺជួលប្រជាជនអាមេរិក និង ទីពីរទិញរបស់អាមេរិក»។ បន្ថែមពីនេះ រដ្ឋបាលអាមេរិក នឹងកែទម្រង់ប្រព័ន្ធពន្ធដារសម្រាប់បន្ធូរបន្ទកម្រិតពន្ធក្នុងស្រុក,បង្កើតប្រព័ន្ធសុខភិបាលថ្មីដែលល្អជាង Obamacare, និងបន្តយុទ្ធនាការប្រឆាំងភេរវកម្មឲ្យបានខ្លាំងក្លាដើម្បីថែរក្សាសន្តិសុខអាមេរិកជារួមដូចគ្នា៕
Tag:
ដូណាល់ ត្រាំ
បារ៉ាក់ អូបាម៉ា
អាមេរិក
© រក្សាសិទ្ធិដោយ thmeythmey.com