អន្តរជាតិ
ដូណាល់ ត្រាំ កំពុង «វាយក្បាលអង្អែលខ្នង» សម្ព័ន្ធមិត្តរបស់អាមេរិករឿងថ្លៃចំណាយ
02, Mar 2017 , 9:39 am
ប្រធានាធិបតី ដូណាល់ ត្រាំ ថ្លែងទៅកាន់សភាទាំងពីរ (រូបថត CNN)
×![]()
ដោយ: តន ចាន់រិទ្ធារ៉ា
ឲ្យតែនិយាយរឿងទំនាក់ទំនងរវាងអាមេរិក និងសម្ព័ន្ធមិត្តជុំវិញពិភពលោក រដ្ឋបាលអាមេរិកថ្មី បញ្ជាក់ម្ដងហើយម្ដងទៀតថា អាមេរិក នឹងនៅជួយការពារពួកគេពីការគំរាមផ្សេងៗ ដោយមិនយកភ្នែកមើលមិនធ្វើអ្វីឡើយ។ ជាថ្នូរមកវិញ លោកប្រធានាធិបតី ដូណាល់ ត្រាំ បានប្រាប់ឲ្យសម្ព័ន្ធមិត្តដែលអាមេរិកការពារ ជួយចេញថ្លៃចំណាយផ្សេងផង ដ្បិតអាមេរិកចេញតែម្នាក់ឯងច្រើនពេកហើយ។ លោកគំរាមថា អាមេរិកអាចនឹងប្ដូរជំហរឈប់ជួយមិនខាន បើមិនជួយចេញវិភាគទានខ្លះទេនោះ។
ថ្លែងទៅកាន់សភាទាំងពីរនៅថ្ងៃទី២៨ ខែកុម្ភៈ ប្រធានាធិបតី ដូណាល់ ត្រាំ បានរម្លឹកម្ដងទៀតពីការប្ដេជ្ញាចិត្តរបស់អាមេរិក ក្នុងការជួយការពារសន្តិសុខសម្ព័ន្ធមិត្តអាមេរិកនៅជុំវិញពិភពលោក។ ដូចសព្វដង លោក ត្រាំ ក៏បានរម្លឹកមិត្តភក្តិ និងដៃគូរបស់អាមេរិកចាប់ពីអឺរ៉ុប មជ្ឈិមបូព៌ា ទៅដល់តំបន់ប៉ាស៊ីហ្វិក ឲ្យបង់ថ្លៃចំណាយសម្រាប់កងទ័ពអាមេរិក និងសម្រាលបន្ទុកហិរញ្ញវត្ថុនានា ដែលអាមេរិកចំណាយច្រើនជាងគេរហូតមក។
ប្រធានាធិបតីអាមេរិក បានឆ្លៀតឱកាសក្នុងពេលថ្លែងសុន្ទរកថាទៅកាន់សមាជិកសភាទាំងពីរ ដោយធានាសម្ព័ន្ធមិត្តរបស់ខ្លួន រឿងការពារសន្តិសុខនេះបន្ទាប់ពីពួកគេចាប់ផ្ដើមជ្រួលច្របល់ដោយសារការសន្យារបស់លោកផ្ទាល់ កាលពីយុទ្ធនាការស្វែងរកសំឡេងឆ្នោត។ លោក ត្រាំ ធ្លាប់គំរាមយកអាមេរិកចេញពីសម្ព័ន្ធយោធាណាតូ បើសមាជិកណាតូមិនព្រមបង្កើនថ្លៃចំណាយឲ្យបាន២ភាគរយនៃផលិតផលក្នុងស្រុកសរុបរបស់ខ្លួន ហើយលោកក៏ធ្វើឲ្យក្រុងតូក្យូបារម្ភ ជុំវិញការគំរាមដកទ័ពអាមេរិកចេញពីទឹកដីជប៉ុនដែរ។
រឿងថ្លៃចំណាយ ឬក៏អាចហៅថាថ្លៃការពារ គឺជារឿងរសើបរបស់រដ្ឋបាលប្រធានាធិបតី ត្រាំ និងសម្ព័ន្ធមិត្តរបស់ខ្លួន ហើយវាមានផលប៉ះពាល់យ៉ាងខ្លាំងលើតួនាទីអាមេរិកលើពិភពលោក។ មន្ត្រីជាន់ខ្ពស់អាមេរិកខ្លះដូចជាអនុប្រធានាធិបតី Mike Pence និងប្រមុខការពារជាតិ James Mattis ដែលឈានជើងទស្សនកិច្ចតាមប្រទេសមានកងទ័ពអាមេរិកដូចជាជប៉ុន និងអឺរ៉ុបជាដើម តែងតែលើកឡើងចំណុចនេះមិនដែលភ្លេចឡើយ លាយឡំដោយការប្ដេជ្ញាចិត្ត និងសារគំរាមឈប់គាំទ្រទៅជាមួយផង។
នៅតំបន់អឺរ៉ុប រដ្ឋមន្ត្រីការពារជាតិ Mattis បានប្រាប់សមាជិកណាតូថា សម្ព័ន្ធយោធាមួយនេះ មិនទាន់ហួសសម័យឡើយ ហើយអាមេរិកនៅតែមានប្ដេជ្ញាចិត្តខ្ពស់ចំពោះអង្គការមួយនេះ។ ឯលោក Pence វិញ ក៏ផ្ដល់ទំនុកចិត្តដែរថា អាមេរិក នឹងជួយអឺរ៉ុបក្នុងសំណុំរឿងនៅអ៊ុយក្រែនប្រឆាំងរុស្ស៊ី។ ប៉ុន្តែមន្ត្រីជាន់ខ្ពស់អាមេរិកទាំង២នេះ ក៏មិនភ្លេចលើករឿងចំណាយដែរ ដោយពួកគេប្រាប់សមាជិកណាតូធ្វើតាមសន្យាបង្កើនថ្លៃចំណាយ ដ្បិតប្រជាជនអាមេរិកមិនអាចស៊ូទ្រាំរហូតឡើយ។
ជាការពិត រដ្ឋបាលរបស់លោក ដូណាល់ ត្រាំ នឹងមិនបោះបង់សម្ព័ន្ធមិត្តជាច្រើនរបស់ខ្លួនឡើយ តែលោកក៏ចង់ឲ្យសម្ព័ន្ធមិត្តរបស់អាមេរិក ជួយរម្លែកអម្រែកហិរញ្ញវត្ថុដ៏ច្រើនសន្ធឹកសន្ធាប់។ ជាមួយនឹងការសន្យាជួយការពារផង និងនិយាយគំរាមផង លោក ត្រាំ បញ្ជាក់ថា៖ «យើងរំពឹងដៃគូរបស់យើង មិនថានៅណាតូ, មជ្ឈិមបូព៌ា និងតំបន់ប៉ាស៊ីហ្វិកឡើយ នឹងចូលរួមដោយផ្ទាល់ប្រកបដោយអត្ថន័យក្នុងប្រតិបត្តិការយោធា ព្រមទាំងជួយបង់វិភាគទានផង»៕
ថ្លែងទៅកាន់សភាទាំងពីរនៅថ្ងៃទី២៨ ខែកុម្ភៈ ប្រធានាធិបតី ដូណាល់ ត្រាំ បានរម្លឹកម្ដងទៀតពីការប្ដេជ្ញាចិត្តរបស់អាមេរិក ក្នុងការជួយការពារសន្តិសុខសម្ព័ន្ធមិត្តអាមេរិកនៅជុំវិញពិភពលោក។ ដូចសព្វដង លោក ត្រាំ ក៏បានរម្លឹកមិត្តភក្តិ និងដៃគូរបស់អាមេរិកចាប់ពីអឺរ៉ុប មជ្ឈិមបូព៌ា ទៅដល់តំបន់ប៉ាស៊ីហ្វិក ឲ្យបង់ថ្លៃចំណាយសម្រាប់កងទ័ពអាមេរិក និងសម្រាលបន្ទុកហិរញ្ញវត្ថុនានា ដែលអាមេរិកចំណាយច្រើនជាងគេរហូតមក។
ប្រធានាធិបតីអាមេរិក បានឆ្លៀតឱកាសក្នុងពេលថ្លែងសុន្ទរកថាទៅកាន់សមាជិកសភាទាំងពីរ ដោយធានាសម្ព័ន្ធមិត្តរបស់ខ្លួន រឿងការពារសន្តិសុខនេះបន្ទាប់ពីពួកគេចាប់ផ្ដើមជ្រួលច្របល់ដោយសារការសន្យារបស់លោកផ្ទាល់ កាលពីយុទ្ធនាការស្វែងរកសំឡេងឆ្នោត។ លោក ត្រាំ ធ្លាប់គំរាមយកអាមេរិកចេញពីសម្ព័ន្ធយោធាណាតូ បើសមាជិកណាតូមិនព្រមបង្កើនថ្លៃចំណាយឲ្យបាន២ភាគរយនៃផលិតផលក្នុងស្រុកសរុបរបស់ខ្លួន ហើយលោកក៏ធ្វើឲ្យក្រុងតូក្យូបារម្ភ ជុំវិញការគំរាមដកទ័ពអាមេរិកចេញពីទឹកដីជប៉ុនដែរ។
រឿងថ្លៃចំណាយ ឬក៏អាចហៅថាថ្លៃការពារ គឺជារឿងរសើបរបស់រដ្ឋបាលប្រធានាធិបតី ត្រាំ និងសម្ព័ន្ធមិត្តរបស់ខ្លួន ហើយវាមានផលប៉ះពាល់យ៉ាងខ្លាំងលើតួនាទីអាមេរិកលើពិភពលោក។ មន្ត្រីជាន់ខ្ពស់អាមេរិកខ្លះដូចជាអនុប្រធានាធិបតី Mike Pence និងប្រមុខការពារជាតិ James Mattis ដែលឈានជើងទស្សនកិច្ចតាមប្រទេសមានកងទ័ពអាមេរិកដូចជាជប៉ុន និងអឺរ៉ុបជាដើម តែងតែលើកឡើងចំណុចនេះមិនដែលភ្លេចឡើយ លាយឡំដោយការប្ដេជ្ញាចិត្ត និងសារគំរាមឈប់គាំទ្រទៅជាមួយផង។
នៅតំបន់អឺរ៉ុប រដ្ឋមន្ត្រីការពារជាតិ Mattis បានប្រាប់សមាជិកណាតូថា សម្ព័ន្ធយោធាមួយនេះ មិនទាន់ហួសសម័យឡើយ ហើយអាមេរិកនៅតែមានប្ដេជ្ញាចិត្តខ្ពស់ចំពោះអង្គការមួយនេះ។ ឯលោក Pence វិញ ក៏ផ្ដល់ទំនុកចិត្តដែរថា អាមេរិក នឹងជួយអឺរ៉ុបក្នុងសំណុំរឿងនៅអ៊ុយក្រែនប្រឆាំងរុស្ស៊ី។ ប៉ុន្តែមន្ត្រីជាន់ខ្ពស់អាមេរិកទាំង២នេះ ក៏មិនភ្លេចលើករឿងចំណាយដែរ ដោយពួកគេប្រាប់សមាជិកណាតូធ្វើតាមសន្យាបង្កើនថ្លៃចំណាយ ដ្បិតប្រជាជនអាមេរិកមិនអាចស៊ូទ្រាំរហូតឡើយ។
ជាការពិត រដ្ឋបាលរបស់លោក ដូណាល់ ត្រាំ នឹងមិនបោះបង់សម្ព័ន្ធមិត្តជាច្រើនរបស់ខ្លួនឡើយ តែលោកក៏ចង់ឲ្យសម្ព័ន្ធមិត្តរបស់អាមេរិក ជួយរម្លែកអម្រែកហិរញ្ញវត្ថុដ៏ច្រើនសន្ធឹកសន្ធាប់។ ជាមួយនឹងការសន្យាជួយការពារផង និងនិយាយគំរាមផង លោក ត្រាំ បញ្ជាក់ថា៖ «យើងរំពឹងដៃគូរបស់យើង មិនថានៅណាតូ, មជ្ឈិមបូព៌ា និងតំបន់ប៉ាស៊ីហ្វិកឡើយ នឹងចូលរួមដោយផ្ទាល់ប្រកបដោយអត្ថន័យក្នុងប្រតិបត្តិការយោធា ព្រមទាំងជួយបង់វិភាគទានផង»៕
Tag:
ដូណាល់ ត្រាំ
NATO
អាមេរិក
មជ្ឈិមបូព៌ា
© រក្សាសិទ្ធិដោយ thmeythmey.com
