អន្តរជាតិ
ទីក្រុង១០ដែលនឹងមានមនុស្សច្រើនជាងគេនៅឆ្នាំ២០៣០៖ តូក្យូ ញូវដេលី សៀងហៃ...
17, Apr 2017 , 11:09 am
×![]()
ដោយ: ធីតា
ចំនួនមនុស្សនៅលើពិភពលោក មានការកើនឡើងខ្ពស់យ៉ាងខ្លាំង បើគិតចាប់តាំងពីឆ្នាំ១៩៥០មក។ ឆ្នាំ១៩៥០ មានមនុស្សប្រមាណ៧៥០លាននាក់នៅលើផែនដី ហើយបច្ចុប្បន្នចំនួននេះ ឡើងគុណជាដប់ ពោលគឺប្រមាណ៧,៤ពាន់លាននាក់។ កាលពីពេលថ្មីកន្លងមកនេះ អង្គការសហប្រជាជាតិបានចេញផ្សាយរបាយការណ៍ទាក់ទងនឹងចំនួនពលរដ្ឋនៅក្នុងទីក្រុងនៅឆ្នាំ២០៣០ ខាងមុខ។
របាយការណ៍របស់ UN បង្ហាញថា កំនើនប្រជាជនមានច្រើនបំផុតនៅអាស៊ី និងអាហ្វ្រិក។ នៅឆ្នាំ១៩៥០ ញូវយ៉ក គឺទីក្រុងដែលមានមនុស្សច្រើនជាងគេ ប៉ុន្តែនៅឆ្នាំ២០៣០ ខាងមុខ តូក្យូ នឹងដណ្តើមយកចំណាត់ថ្នាក់នេះវិញ។
១. តូក្យូ៖ នៅឆ្នាំ២០១៧ តូក្យូ មានឈ្មោះរួចហើយជាទីក្រុងដ៏ធំបំផុតនៅលើពិភពលោក។ ឈានដល់ឆ្នាំ២០៣០ ក្រុងរបស់ជប៉ុនមួយនេះ នៅតែឈរចំណាត់ថ្នាក់លេខ១ ដោយនឹងមានមនុស្ស៣៧លាននាក់។
២. ញូវដេលី៖ ទីក្រុងរបស់ឥណ្ឌាមួយនេះ នឹងមានមនុស្ស៣៦លាននាក់នៅឆ្នាំ២០៣០ ខណៈកាលពីឆ្នាំ១៩៧០ មានតែ៣,៥លាននាក់ប៉ុណ្ណោះ។
៣. សៀងហៃ៖ ចំនួនអ្នករស់នៅសៀងហៃ នឹងកើនដល់៣០,៨លាននាក់នៅឆ្នាំ២០៣០ ខណៈកាលពីឆ្នាំ១៩៥០ ក្រុងមួយនេះ មានមនុស្សតែ៤,៣លាននាក់ប៉ុណ្ណោះ។
៤. ម៉ុមបៃ៖ ទីក្រុងឥណ្ឌាមួយនេះ នឹងមានមនុស្សរស់នៅ២៧,៨លាននាក់នៅឆ្នាំ២០៣០ ។
៥. ប៉េកាំង៖ ក្រុងរបស់មហាយក្សចិន នឹងមានមនុស្សប្រមាណ២៧,៧លាននាក់នៅឆ្នាំ២០៣០ ។
៦. ដាក្កា៖ ទីក្រុងរបស់បង់ក្លាដែស នឹងមានមនុស្ស២៧,៤លាននាក់នៅឆ្នាំ២០៣០ ។
៧. ការ៉ាឈី៖ ទីក្រុងរបស់ប៉ាគីស្ថាន នឹងមានមនុស្ស២៤,៨លាននាក់នៅឆ្នាំ២០៣០ ។
៨. គែរ៖ ទីក្រុងដ៏ចំណាស់របស់អេហ្ស៊ីប នឹងមានមនុស្ស២៤,៥លាននាក់នៅឆ្នាំ២០៣០ ខណៈកាលពីឆ្នាំ១៩៥០ មានមនុស្សតែជាង២,៤លាននាក់ប៉ុណ្ណោះ។
៩. ឡាកូស៖ ទីក្រុងរបស់នីហ្សេរីយ៉ា ចាត់ទុកជាក្រុងដែលមានមនុស្សច្រើនជាងគេនៅអាហ្វ្រិក។ ក្រុងនេះ នឹងកើនមនុស្សពី២៨៨ ០០០នាក់នៅឆ្នាំ១៩៥០ ដល់២៤,២លាននាក់នៅឆ្នាំ២០៣០ ។
ម៉ិកស៊ីកូ៖ ទីក្រុងនៃប្រទេសម៉ិកស៊ិកនឹងមានមនុស្ស២៣,៩លាននាក់នៅឆ្នាំ២០៣០ ខណៈនាពេលបច្ចុប្បន្នម៉ិកស៊ីកូ ស្ថិតក្នុងចំណោមទីក្រុងដែលអ៊ូអរជាងគេលើពិភពលោក៕
Tag:
ទីក្រុង
តូក្យូ
ឆ្នាំ២០៣០
© រក្សាសិទ្ធិដោយ thmeythmey.com
