អន្តរជាតិ
Duterte៖ «ទុកជីវិតឲ្យឧក្រិដ្ឋជនម្នាក់រស់ ជាគ្រោះថ្នាក់សម្រាប់ជនស៊ីវិល»
14, Mar 2017 , 10:50 am
ប្រធានាធិបតីហ្វីលីពីន Rodrigo Duterte ដែលគាំទ្រការអនុវត្តទោសប្រហារជីវិតឡើងវិញ (រូបថត Xinhua)
×![]()
ដោយ: តន ចាន់រិទ្ធារ៉ា
ប្រធានាធិបតីហ្វីលីពីន Rodrigo Duterte នៅថ្ងៃទី១៣ ខែមីនា បានវាយបកលើអ្នករិះគន់ ដែលប្រឆាំងការអនុវត្តទោសប្រហារជីវិតឡើងវិញ។ សេចក្ដីស្នើអនុវត្តទោសប្រហារជីវិតនេះ កំពុងស្ថិតក្នុងដំណាក់កាលពិភាក្សានៅឯស្ថាប័ននីតិបញ្ញត្តិ មុននឹងធ្លាក់ដល់ដៃលោក Duterte ជាចុងក្រោយ។ លោកនិយាយការពារបំណងអនុវត្តទោសដ៏ធ្ងន់នេះថា ការរក្សាជីវិតឧក្រិដ្ឋជនម្នាក់ គឺជាការរឿងគ្រោះថ្នាក់សម្រាប់ជីវិតជនស្លូតត្រង់ដទៃទៀត។
ការវិលត្រឡប់មកវិញនៃការទោសប្រហារជីវិត រងការរិះគន់ខ្លាំងពីសំណាក់សកម្មជនសិទ្ធិមនុស្សនៅហ្វីលីពីន ខណៈរដ្ឋាភិបាលលោកប្រធានាធិបតី Rodrigo Duterte ចង់អនុវត្តទោសនេះឡើងវិញ ដើម្បីលុបបំបាត់អំពើឧក្រិដ្ឋនៅក្នុងប្រទេសដូចជាករណីជួញដូរគ្រឿងញៀន និងករណីរំលោភជាដើម។ ជារឿយៗលោក Duterte អះអាងថា ការអនុវត្តទោសនេះ នឹងជួយកាត់បន្ថយករណីឧក្រិដ្ឋកម្មធំៗក្នុងប្រទេស ព្រោះជនល្មើសខ្លាចជាប់ទោសស្លាប់។
ក្នុងសន្និសីទកាសែតមួយនៅវិមាន Malacañang ប្រធានាធិបតីរូបនេះបាននិយាយការពារការអនុវត្តទោសនេះថា ការសង្គ្រោះជីវិតជនឧក្រិដ្ឋម្នាក់ គឺដូចជាការប្រថុយគ្រោះថ្នាក់របស់ជីវិតជនស្លូតត្រង់ជាច្រើននាក់ដូច្នោះដែរ។ លោកបន្តថា៖ «យើងរវល់ការពារជនឧក្រិដ្ឋ ដល់ថ្នាក់គ្មានពេលដើម្បីបន់ស្រន់ឲ្យព្រលឹងជនស្លូតត្រង់ជាជនរងគ្រោះនៃឧក្រិដ្ឋកម្មទៅហើយ»។
បើទោះជាមានការលើកឡើងថា ទោសប្រហារជីវិតមិនគួរអនុវត្តដើម្បីទុកឱកាសឲ្យឧក្រិដ្ឋជនកែខ្លួនក្ដី លោកប្រធានាធិបតី Duterte នៅតែបញ្ជាក់ថា នេះជាកម្មពៀររបស់ពួកឧក្រិដ្ឋជនទាំងនោះ ហើយច្បាប់ត្រូវតែលើគ្រប់មនុស្សទាំងអស់។ បើសារព័ត៌មាន ABS-CBN News លោកក៏លើកជាសំណួរដែរថា អ្វីជាបំណងនៃច្បាប់ព្រហ្មទណ្ឌ? ចម្លើយគឺវាជាកម្មពៀរ ដូច្នេះឧក្រិដ្ឋជនត្រូវតែទទួលកម្មពៀររបស់ពួកគេ។
លោក Duterte បានលើកឡើងពីរបាយការណ៍របស់ការិយាល័យកែប្រែ ដែលបង្ហាញថា ចំនួនករណីឧក្រិដកម្មកើនឡើងខ្លាំង បន្ទាប់ទោសប្រហារជីវិតត្រូវបានលុបចោលមកនោះ។ កាលឆ្នាំ២០០៦ ចំនួនអ្នកជាប់ពន្ធនាគារមានទោសប្រព្រឹត្តបទឧក្រិដ្ឋមានដល់ទៅជាង៦ពាន់នាក់ឯណោះ ហើយចំនួននេះបានកើនឡើងរហូតមក។
ជាមួយនឹងជំហរចង់បានការអនុវត្តទោសប្រហារជីវិតឡើងវិញ លោក Duterte បានផ្ដល់ជម្រើសមួយសម្រាប់ប្រជាជនហ្វីលីពីនថា ពួកគេចង់ឲ្យនរណាស្លាប់ៈ ជនស្លូតត្រង់ ឬឧក្រិដ្ឋជន។ «អ្នកចង់ឲ្យនរណាស្លាប់! ប្រជាជនដែលមិនដឹងអី ឬឧក្រិដ្ឋជនដែលប្រព្រឹត្តបាបកម្ម។ រើសមួយទៅចង់ឲ្យអ្នកស្លាប់! កូនៗរបស់អ្នកដែលដើរទៅសាលារៀន ហើយត្រូវគេប្លន់សម្លាប់ ឬពួកឧក្រិដ្ឋជនទាំងនោះ»។ នេះជាការបញ្ជាក់បន្ថែមរបស់ប្រធានាធិបតីហ្វីលីពីន៕
Tag:
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com
