អន្តរជាតិ
រថភ្លើងអាកាសទី១ ត្រៀមបង្ហាញខ្លួននៅក្រុងហាណូយ សាងសង់ដោយក្រុមហ៊ុនចិន 14, Mar 2017 , 2:07 pm
ទូរថភ្លើង ត្រូវបានស្ទូចដាក់លើខ្សែរថភ្លើងអាកាសទី១ ក្នុងរដ្ឋធានីហាណូយ (រូបថត Xinhua)
× រដ្ឋធានីហាណូយ នៃសាធារណរដ្ឋសង្គមនិយមវៀតណាម នឹងបង្ហាញផ្លូវរថភ្លើងក្នុងទីក្រុងទី១ របស់ខ្លួននៅពេលខាងមុខនេះ។ ខ្សែរថភ្លើងក្នុងទីក្រុងនេះ សាងសង់ និងវិនិយោគដោយក្រុមហ៊ុនចិន សម្រាប់ភ្ជាប់ពីវីថី Cat Linh ទៅកាន់តំបន់ Hadong ។ ខ្សែរថភ្លើងថ្មីនេះ នឹងជួយសម្រួលចរាចរណ៍ក្នុងរដ្ឋធានីវៀតណាម ក៏ដូចជាការតភ្ជាប់ផ្នែកទាំងឡាយនៃទីក្រុងផងដែរ។
ខ្សែរថភ្លើងទី១ក្នុងរដ្ឋធានីហាណូយ នឹងលេចជារូបរាងក្នុងពេលខាងមុខ។ ខ្សែរថភ្លើងប្រវែង១៣គីឡូម៉ែត្រ ភ្ជាប់ពីតំបន់ Cat Linh ទៅកាន់ Hadong ត្រូវបានកសាងដោយការិយាល័យទី៦ នៃក្រុមហ៊ុនវិស្វកម្មផ្លូវដែករបស់ចិន (CREC)។ ទូទី១នៃរថភ្លើងនេះ ត្រូវបានស្ទូចដាក់ស្ថានីយ៍រួចរាល់ហើយសម្រាប់ការសាកល្បង។
ជាមួយគ្នានេះ ការដេញថ្លៃប្រព័ន្ធទំនាក់ទំនង និងការផ្គត់ផ្គង់ថាមពលសម្រាប់ខ្សែរថភ្លើងនេះ ក៏ត្រូវបញ្ចប់រួចហើយដែរ។ ខ្សែរថភ្លើងក្នុងទីក្រុងដំបូងគេរបស់ក្រុងហាណូយ នឹងចាប់ផ្ដើមការធ្វើដំណើរសាកល្បងនៅពាក់កណ្ដាលឆ្នាំ២០១៧ ក្រោយប្រព័ន្ធថាមពលសម្រាប់ការផ្គត់ផ្គង់ខ្សែរថភ្លើងនេះ ត្រូវបានតភ្ជាប់ចប់សព្វគ្រប់ដូចគ្នា។
ជាខ្សែរថភ្លើងមិនធ្លាប់មានសម្រាប់រដ្ឋធានីវៀតណាម រថភ្លើងនេះប្រើប្រាស់បច្ចេកវិទ្យា និងស្តង់ដាគុណភាពរបស់ចិនទាំងស្រុង។ ការស្ទូចទូទី១របស់រថភ្លើងដាក់លើផ្លូវរថភ្លើងនេះ ក៏មានន័យថាគម្រោងដ៏ធំនេះ កំពុងឈានទៅដំណាក់កាលបញ្ចប់នៅពេលខ្លីខាងមុខ និងត្រូវឲ្យប្រើប្រាស់ជាផ្លូវការនៅពេលបន្ទាប់។
គម្រោងរថភ្លើងលើអាកាសនេះ ជាគម្រោងកិច្ចសហប្រតិបត្តិការដ៏ធំរវាងវៀតណាម និងចិន ជាអ្នកជិតខាងគ្នា។ ខ្សែរថភ្លើងនេះ នឹងមាន១២ស្ថានីយ៍ និងស្ថានីយជំហប់ឱកាសមួយ (Train Depot)។ គម្រោងនេះ ទាក់ទាញចំណាប់អារម្មណ៍ប្រជាជនវៀតណាមយ៉ាងខ្លាំង តាំងពីការចេញផ្សាយគម្រោងនេះក្នុងឆ្នាំ២០១៥ ។ ប្រជាជនក្រុងហាណូយ កំពុងអន្ទះសារង់ចាំការដំណើរការផ្លូវការខ្សែរថភ្លើងនេះ។ លោក Bui Hai Nam ជាពលរដ្ឋម្នាក់និយាយថា លោកធ្លាប់តែឃើញរថភ្លើងនេះតាមទូរទស្សន៍ប៉ុណ្ណោះ ហើយលោកនឹងក្លាយជាអ្នកដំណើរដំបូងគេដែលជិះរថភ្លើងល្អ និងជួយបរិស្ថាន។
ខណៈដែលការរីកចម្រើនផ្នែកនគរោបនីយកម្មកើនឡើងខ្លាំង រដ្ឋធានីហាណូយ ដែលមានប្រជាជន៨លាននាក់ ប្រឈមមុខបញ្ហាកកស្ទះចរាចរណ៍យ៉ាងខ្លាំង។ បញ្ហានេះ ប៉ះពាល់ខ្លាំងដល់ការអភិវឌ្ឍសេដ្ឋកិច្ច និងការរស់នៅប្រចាំថ្ងៃរបស់ប្រជាជន។ ពួកគេភាគច្រើនជឿថា ខ្សែរថភ្លើងអាកាស នឹងជួយដោះស្រាយបញ្ហានេះ។ មិនតែប៉ុណ្ណោះ គុណភាពនៃសំណង់របស់ចិន ក៏ទាក់ទាញភាគីវៀតណាមខ្លាំងទៀតផង ទើបពួកគេជ្រើសរើសចិនសម្រាប់គម្រោងនេះ៕
© រក្សាសិទ្ធិដោយ thmeythmey.com