អន្តរជាតិ
ពេលណាក៏បាន! រដ្ឋាភិបាលអង់គ្លេស ទទួលភ្លើងខៀវពីសភាដើម្បីផ្ដើមការចរចាចាកចេញ
14, Mar 2017 , 8:39 pm
សភាជាន់ខ្ពស់ចក្រភពអង់គ្លេស ផ្ដល់ភ្លើងខៀវឲ្យនាយករដ្ឋមន្ត្រី Theresa May បើកការចរចាលែងលះជាមួយសហភាអឺរ៉ុប (រូបភាព Xinhua)
×![]()
ដោយ: តន ចាន់រិទ្ធារ៉ា
សភាជាន់ខ្ពស់របស់ចក្រភពអង់គ្លេស បានផ្ដល់ភ្លើងខៀវឲ្យរដ្ឋាភិបាលលោកស្រីនាយករដ្ឋមន្ត្រី Theresa May ដើម្បីចាប់ផ្ដើមការចរចាលែងលះជាមួយសហភាពអឺរ៉ុប។ ក្នុងកិច្ចប្រជុំថ្ងៃទី១៣ ខែមីនា សភាជាន់ខ្ពស់អង់គ្លេស បានបោះឆ្នោតដោយសំឡេងភាគច្រើនគាំទ្រសេចក្ដីព្រាងច្បាប់ស្ដីពីការជូនដំណឹងនៃការចាកចេញ បើទោះជាស្កុតឡែនប្រឆាំងក្ដី។ ចាប់ពីពេលនេះ លោកស្រី May អាចផ្ដើមការចរចាពេលណាក៏បាន ប៉ុន្តែលោកស្រីទំនងជារង់ចាំដល់ចុងខែមីនា។
សូមស្តាប់សំឡេង៖
សភាជាន់ខ្ពស់ចក្រភពអង់គ្លេស បានបោះឆ្នោតអនុម័តសេចក្ដីស្នើច្បាប់ Brexit ដើម្បីបើកផ្លូវឲ្យរដ្ឋាភិបាលនាយករដ្ឋមន្ត្រី Theresa May អនុវត្តតាមមាត្រា៥០ សន្ធិសញ្ញា Lisbon ដែលជាការចាកចេញពីសហភាពអឺរ៉ុប។ អង្គសភា បានទាត់ចោលបញ្ហាសិទ្ធិប្រជាជននៃរដ្ឋសមាជិកអឺរ៉ុបរស់នៅអង់គ្លេស ក្រោយសភាជាន់ទាបប្រឆាំងការទាមទារនេះ និងបានបោះឆ្នោតដោយមិនមានការកែប្រែអ្វីសោះ ដោយសំឡេងគាំទ្រ២៧៤ ទល់សំឡេងប្រឆាំង១១៨ ។
បន្ទាប់ពីនេះ គេរំពឹងថា ច្បាប់នេះនឹងទទួលបានការយល់ព្រមពីមហាក្សត្រីយ៍ Elizabeth II មុននឹងចូលជាធរមាន។ ចំណែកនាយករដ្ឋមន្ត្រី May ក៏អាចអនុវត្តតាមមាត្រា៥០ សន្ធិសញ្ញា Lisbon បានភ្លាមៗដែរ ដើម្បីចាប់ផ្ដើមការចរចាលែងលះជាមួយសហភាពអឺរ៉ុបដែលត្រូវចំណាយពេល២ឆ្នាំ។ ហើយអង់គ្លេស នឹងក្លាយជាប្រទេសទី១ ដែលចាកចេញពីសហភាពអឺរ៉ុប ចាប់តាំងពីការបង្កើតកាលពីជិត៦០ឆ្នាំមុន។
តាមពិតទៅ លោកស្រី May អាចចុចប៊ូតុងចរចាបាននៅថ្ងៃទី១៣ ខែមីនាតែម្ដង។ ប៉ុន្តែបើតាមសារព័ត៌មាន BBC ប្រភពពីការិយាល័យនាយករដ្ឋមន្ត្រី May និយាយថា លោកស្រី May នឹងមិនចាប់ផ្ដើមការចរចាក្នុងពេលនេះឡើយ ហើយលោកស្រីអាចរង់ចាំរហូតដល់ដំណាច់ខែមីនា ដើម្បីផ្ដល់ដំណឹងឲ្យក្រុមប្រឹក្សាអឺរ៉ុបស្ដីពីការចាកចេញនេះ។ លោកស្រី May ធ្លាប់ប្រកាសហើយថា លោកស្រីនឹងជូនដំណឹងនៃការចាកចេញនៅថ្ងៃទី៣១ ខែមីនា។
អ្វីដែលជាបញ្ហាផ្ទៃក្នុងនោះ គឺស្កុតឡែន ដែលបោះឆ្នោតប្រឆាំងការចាកចេញក្នុងប្រជាមតិខែមិថុនា ឆ្នាំ២០១៦ កំពុងស្វែងរកលទ្ធភាពនៃការផ្ដាច់ខ្លួនពីចក្រភពអង់គ្លេស។ នេះក៏ព្រោះតែលោកស្រី May សម្រេចចិត្តមិននៅក្នុងទីផ្សាររួមគ្នារបស់អឺរ៉ុប ជាថ្នូនឹងការគ្រប់គ្រងលំហូរអន្តោប្រេវេសន៍។ ដោយសាររឿងនេះ ស្កុតឡែនចង់បានអនាគតផ្សេងពីចក្រភពអង់គ្លេស បើទោះជាលោកស្រី May ព្រមានហើយថា ប្រជាមតិស្ដីពីឯករាជ្យនេះ នឹងបង្កើតភាពមិនច្បាស់លាស់កាន់តែខ្លាំង។
អ្វីដែលគួរឲ្យចាប់អារម្មណ៍នោះ រដ្ឋាភិបាលនាយករដ្ឋមន្ត្រី May ក៏មិនចាំបាច់សុំការយល់ព្រមពីសភាលើកិច្ចព្រមព្រៀងណាមួយសម្រេចបានជាមួយសហភាពអឺរ៉ុបក្នុងពេលចរចាដែរ។ លោកស្រី May ធូរទ្រូងមិនតិចលើរឿងនេះ ព្រោះកាលពីខែមករា តុលាការកំពូលអង់គ្លេសសម្រេចឲ្យសភាជាអ្នកមានសិទ្ធិសម្រេចចុងក្រោយលើកិច្ចព្រមព្រៀងទាំងនោះ។ តាមពិតទៅ សភាជាន់ខ្ពស់ក៏ធ្លាប់បញ្ចូលចំណុចនេះក្នុងសំណើច្បាប់នេះ តែត្រូវសភាជាន់ទាបទាត់ចោល។ ចុងក្រោយនេះ សភាជាន់ខ្ពស់ក៏អនុម័តទាំងផ្ទុយពីការសម្រេចរបស់តុលាការតែម្ដង៕
សូមស្តាប់សំឡេង៖
សភាជាន់ខ្ពស់ចក្រភពអង់គ្លេស បានបោះឆ្នោតអនុម័តសេចក្ដីស្នើច្បាប់ Brexit ដើម្បីបើកផ្លូវឲ្យរដ្ឋាភិបាលនាយករដ្ឋមន្ត្រី Theresa May អនុវត្តតាមមាត្រា៥០ សន្ធិសញ្ញា Lisbon ដែលជាការចាកចេញពីសហភាពអឺរ៉ុប។ អង្គសភា បានទាត់ចោលបញ្ហាសិទ្ធិប្រជាជននៃរដ្ឋសមាជិកអឺរ៉ុបរស់នៅអង់គ្លេស ក្រោយសភាជាន់ទាបប្រឆាំងការទាមទារនេះ និងបានបោះឆ្នោតដោយមិនមានការកែប្រែអ្វីសោះ ដោយសំឡេងគាំទ្រ២៧៤ ទល់សំឡេងប្រឆាំង១១៨ ។
បន្ទាប់ពីនេះ គេរំពឹងថា ច្បាប់នេះនឹងទទួលបានការយល់ព្រមពីមហាក្សត្រីយ៍ Elizabeth II មុននឹងចូលជាធរមាន។ ចំណែកនាយករដ្ឋមន្ត្រី May ក៏អាចអនុវត្តតាមមាត្រា៥០ សន្ធិសញ្ញា Lisbon បានភ្លាមៗដែរ ដើម្បីចាប់ផ្ដើមការចរចាលែងលះជាមួយសហភាពអឺរ៉ុបដែលត្រូវចំណាយពេល២ឆ្នាំ។ ហើយអង់គ្លេស នឹងក្លាយជាប្រទេសទី១ ដែលចាកចេញពីសហភាពអឺរ៉ុប ចាប់តាំងពីការបង្កើតកាលពីជិត៦០ឆ្នាំមុន។
តាមពិតទៅ លោកស្រី May អាចចុចប៊ូតុងចរចាបាននៅថ្ងៃទី១៣ ខែមីនាតែម្ដង។ ប៉ុន្តែបើតាមសារព័ត៌មាន BBC ប្រភពពីការិយាល័យនាយករដ្ឋមន្ត្រី May និយាយថា លោកស្រី May នឹងមិនចាប់ផ្ដើមការចរចាក្នុងពេលនេះឡើយ ហើយលោកស្រីអាចរង់ចាំរហូតដល់ដំណាច់ខែមីនា ដើម្បីផ្ដល់ដំណឹងឲ្យក្រុមប្រឹក្សាអឺរ៉ុបស្ដីពីការចាកចេញនេះ។ លោកស្រី May ធ្លាប់ប្រកាសហើយថា លោកស្រីនឹងជូនដំណឹងនៃការចាកចេញនៅថ្ងៃទី៣១ ខែមីនា។
អ្វីដែលជាបញ្ហាផ្ទៃក្នុងនោះ គឺស្កុតឡែន ដែលបោះឆ្នោតប្រឆាំងការចាកចេញក្នុងប្រជាមតិខែមិថុនា ឆ្នាំ២០១៦ កំពុងស្វែងរកលទ្ធភាពនៃការផ្ដាច់ខ្លួនពីចក្រភពអង់គ្លេស។ នេះក៏ព្រោះតែលោកស្រី May សម្រេចចិត្តមិននៅក្នុងទីផ្សាររួមគ្នារបស់អឺរ៉ុប ជាថ្នូនឹងការគ្រប់គ្រងលំហូរអន្តោប្រេវេសន៍។ ដោយសាររឿងនេះ ស្កុតឡែនចង់បានអនាគតផ្សេងពីចក្រភពអង់គ្លេស បើទោះជាលោកស្រី May ព្រមានហើយថា ប្រជាមតិស្ដីពីឯករាជ្យនេះ នឹងបង្កើតភាពមិនច្បាស់លាស់កាន់តែខ្លាំង។
អ្វីដែលគួរឲ្យចាប់អារម្មណ៍នោះ រដ្ឋាភិបាលនាយករដ្ឋមន្ត្រី May ក៏មិនចាំបាច់សុំការយល់ព្រមពីសភាលើកិច្ចព្រមព្រៀងណាមួយសម្រេចបានជាមួយសហភាពអឺរ៉ុបក្នុងពេលចរចាដែរ។ លោកស្រី May ធូរទ្រូងមិនតិចលើរឿងនេះ ព្រោះកាលពីខែមករា តុលាការកំពូលអង់គ្លេសសម្រេចឲ្យសភាជាអ្នកមានសិទ្ធិសម្រេចចុងក្រោយលើកិច្ចព្រមព្រៀងទាំងនោះ។ តាមពិតទៅ សភាជាន់ខ្ពស់ក៏ធ្លាប់បញ្ចូលចំណុចនេះក្នុងសំណើច្បាប់នេះ តែត្រូវសភាជាន់ទាបទាត់ចោល។ ចុងក្រោយនេះ សភាជាន់ខ្ពស់ក៏អនុម័តទាំងផ្ទុយពីការសម្រេចរបស់តុលាការតែម្ដង៕
Tag:
Brexit
អឺរ៉ុប
អង់គ្លេស
© រក្សាសិទ្ធិដោយ thmeythmey.com
