អន្តរជាតិ
ដូណាល់ ត្រាំ បញ្ជូនអនុប្រធានាធិបតីខ្លួនមកបំពេញទស្សនកិច្ចមួយជុំតំបន់អាស៊ីនាខែក្រោយ 14, Mar 2017 , 10:39 pm
× អនុប្រធានាធិបតីអាមេរិកលោក Mike Pence នឹងបំពេញទស្សនកិច្ចមកកាន់តំបន់អាស៊ីនៅខែក្រោយនេះដោយលោកនឹងទៅប្រទេសឥណ្ឌូណេស៊ី, កូរ៉េខាងត្បូង, ជប៉ុននិងអូស្ត្រាលីផងដែរ។ ដំណើរទស្សនកិច្ចនេះកើតឡើងស្របពេលដែលភាពមិនច្បាស់លាស់ក្នុងនយោបាយការបរទេសមកកាន់តំបន់អាស៊ីរបស់ប្រធានាធិបតី ដូណាល់ ត្រាំ កើនឡើងខ្លាំង។
ស្របពេលដែលបណ្តាប្រទេសជាច្រើនព្រួយបារម្ភពីការចាកចេញរបស់រដ្ឋបាលអាមេរិក្រោមការដឹកនាំរបស់លោក ដូណាល់ ត្រាំ ពីតំបន់អាស៊ី គេឃើញមានសញ្ញាវិជ្ជមានមួយកើតឡើង។ នោះគឺដំណើរទស្សនកិច្ចរបស់អនុប្រធានាធិបតីអាមេរិកលោក Mike Pence មកកាន់តំបន់អាស៊ីប៉ាហ្វិកនៅខែក្រោយ។
យោងតាមទីភ្នាក់ងារព័ត៌មាន Reuters អនុប្រធានាធិបតីអាមេរិក Mike Pence នឹងអញ្ជើញមកបំពេញទស្សនកិច្ចនៅប្រទេសចំនួនបួន ក្នុងនោះមានឥណ្ឌូណេស៊ី, កូរ៉េខាងត្បូង, ជប៉ុន និងអូស្ត្រាលី។
យ៉ាងណាក៏ដោយគេមិនទាន់ទទួលបានព័ត៌មានលម្អិតពាក់ព័ន្ធដំណើរទស្សកិច្ចរបស់អនុប្រធានាធិបតីអាមេរិករូបនេះនៅឡើយទេ។តែគេរំពឹងថា ប្រធានបទជាច្រើននឹងត្រូវលើកឡើងក្នុងពេលដែលអនុប្រធានាធិបតីអាមេរិករូបនេះទៅដល់ជប៉ុន និងកូរ៉េខាងត្បូង ជាពិសេសបញ្ហានុយក្លេអ៊ែរកូរ៉េខាងជើងនិងការធ្វើយោធូបនីយកម្មតំបន់ជម្លោះសមុទ្រចិនខាងត្បូងរបស់មហាយក្សចិន។
កាលពីដើមខែមីនាកូរ៉េខាងជើងបានបាញ់សាកល្បងមីស៊ីលរបស់ខ្លួនចំនួន ៤គ្រាប់ ដោយកាំជ្រួច ៣គ្រាប់បានធ្លាក់ចូលដែនទឹករបស់ជប៉ុន ហើយកូរ៉េខាងជើងបានអះអាងថា វាជាប្រភេទមីស៊ីលបាលីស្ទីកអន្តរទ្វីបថែមទៀតផង។ ឆ្លើយតបសកម្មភាពបង្ករឿងនេះអាមេរិកបានសម្រេចបញ្ជូនប្រព័ន្ធខែលការពារមីស៊ីល THAAD ទៅកាន់កូរ៉េខាងត្បូងផង ហើយនិងបានពង្រាយយន្តហោះទម្លាក់គ្រាប់ B-52 ទៅកាន់កូរ៉េខាងត្បូងថែមទៀតផង។
នៅឥណ្ឌូណេស៊ី គេរំពឹងថា លោក Mike Pence នឹងជួបពិភាក្សាជាមួយប្រធានាធិបតីឥណ្ឌូណេស៊ី ចូកូ វីដូដូ (Joko Widodo) ដើម្បីពិភាក្សាពីកិច្ចសហប្រតិបត្តិការទ្វេភាគីផងនិងបញ្ហាតំបន់ផង។
បើតាមរដ្ឋមន្ត្រីសន្តិសុខឥណ្ឌូណេស៊ី អនុប្រធានាធិបតីអាមេរិកនឹងជជែកពីបញ្ហាប្រឆាំងភេរវកម្មនិងបញ្ហាសន្តិសុខផ្សេងទៀតជាមួយប្រធានាធិបតីឥណ្ឌូណេស៊ី។ លោកបានបញ្ជាក់ថា៖«យើងបានជជែកពិភាក្សាហើយពីគម្រោងមកបំពេញទស្សនកិច្ចរបស់អនុប្រធានាធិបតីអាមេរិកមកកាន់ឥណ្ឌូណេស៊ី ហើយយើងក៏បានពិភាក្សាពីបញ្ហាយុទ្ធសាស្ត្រដែលត្រូវដាក់ចូលក្នុងរបៀបវារៈនៃកិច្ចពិភាក្សាជាមួយប្រធានាធិបតីយើង»។
ឥណ្ឌូណេស៊ីត្រូវបានគេស្គាល់ថាប្រទេសម៉ូស្លីមធំបំផុតលើលោក ហើយប្រទេសនេះមានលទ្ធភាពក្នុងការរក្សាសន្តិសុខនិងទប់ស្កាត់ការវាយប្រហាររបស់ក្រុមភេរវជនបានយ៉ាងមានប្រសិទ្ធភាព។ ដូច្នេះ វាជារឿងសំខាន់សម្រាប់សហរដ្ឋអាមេរិកដែលត្រូវពង្រឹងកិច្ចសហប្រតិបត្តិការជាមួយឥណ្ឌូណេស៊ី។
តាមពិតទៅ វត្តមានលោក Mike Pence នៅក្នុងតំបន់កើតឡើងក្រោយពេលដែលប្រធានាធិបតី ដូណាល់ ត្រាំ សម្រេចដកអាមេរិកចេញពីកិច្ចព្រមព្រៀងភាពជាដៃគូអន្តរប៉ាស៊ីហ្វិក ហើយគេមិនដឹងច្បាស់ថា អាមេរិកនឹងបន្តក្រសោបតំបន់អាស៊ីអាគ្នេយ៍ដូចជំនាន់លោក បារ៉ាក់ អូបាម៉ាឬអត់ឡើយ។ ប៉ុន្តែយ៉ាងហោចណាស់ គេអាចឃើញពន្លឺខ្លះៗក្រោយទស្សនិច្ចរបស់លោក Mike Pence នេះ៕
Tag:
ដូណាល់ ត្រាំ
Mike Pence
បារ៉ាក់ អូបាម៉ា
ចូកូ វីដូដូ
© រក្សាសិទ្ធិដោយ thmeythmey.com