អន្តរជាតិ
តួកគីចោទថា សហភាពអឺរ៉ុបរើសអើងពេលអនុវត្តគោលការណ៍ប្រជាធិបតេយ្យ 15, Mar 2017 , 10:39 am
ប្រធានាធិបតីតួកគី លោក Tayyip Erdogan
× រដ្ឋាភិបាលក្រុងអង់ការ៉ា បានទិតៀនសហភាពអឺរ៉ុបខ្លាំងៗដោយចោទថា អង្គការតំបន់នេះអនុវត្តគោលការណ៍ប្រជាធិបតេយ្យដោយមានលក្ខណៈរើសអើង។ ការចោទប្រកាន់នេះធ្វើឡើងបន្ទាប់រដ្ឋមន្ត្រីការបរទេសសហភាពអឺរ៉ុបស្នើតួកគីឲ្យឈប់ប្រើពាក្យសម្តីវាយប្រហារគេឯងទៀតដើម្បីកុំឲ្យបញ្ហាការទូតផ្ទុះឡើងកាន់តែខ្លាំង ។
តួកគីបានចោទសហភាពអឺរ៉ុបត្រង់ៗថា អង្គការតំបន់នេះអនុវត្តគោលគោលការណ៍ប្រជាធិបតេយ្យមានស្តង់ដារច្រើនជាន់ ហើយតួកគីសោកស្តាយដែលសហភាពអឺរ៉ុបនៅតែឈរជាមួយហូឡង់ដោយព្រងើយកន្តើយចំពោះខ្លួន។
តួកគីខឹងសម្បារជាមួយរដ្ឋាភិបាលហូឡង់ ហើយប្រទេសនេះបានព្យួរទំនាក់ទំនងការទូតកម្រិតខ្ពស់ជាមួយហូឡង់ទៀតក្រោយពេលដែលរដ្ឋមន្ត្រីរបស់ខ្លួនត្រូវបានហាមមិនឲ្យចូលថ្លែងសុន្ទរកថាទៅកាន់ប្រជាជនតួកគីនៅហូឡង់នោះ។ បន្ថែមពីនេះ មន្ត្រីទូតហូឡង់ និងជើងហោះហើរការទូតទាំងអស់ពីហូឡង់ត្រូវបានហាមឃាត់មិនឲ្យចូលដីតួកគីវិញដែរ។
យោងតាមទីភ្នាក់ងារព័ត៌មាន Reuters ក្រសួងការបរទេសតួកគីបានបញ្ជាក់ក្នុងសេចក្តីថ្លែងការណ៍ខ្លួននៅថ្ងៃអង្គារទី ១៤ ខែមីនានេះថា៖« សមភាគីនៅសហភាពអឺរ៉ុបកំពុងអនុវត្តគោលការណ៍ប្រជាធិបតេយ្យ និងមូលដ្ឋានគ្រឹះសិទ្ធិមនុស្សដែលមានស្តង់ដារច្រើនជាន់។ វាជាបញ្ហាធំដែលសហភាពអឺរ៉ុបលាក់បាំងខ្លួនពីក្រោយការសាមគ្គីគ្នានិងឈរជាមួយប្រទេសហូឡង់ដែលបានបំពានសិទ្ធិមនុស្សនិងតម្លៃអឺរ៉ុបផងនោះ»។
ក្រសួងការបរទេសតួកគីចេញសេចក្តីថ្លែងការណ៍ទិតៀនសហភាពអឺរ៉ុប ក្រោយពេលដែលរដ្ឋមន្ត្រីការបរទេសសហភាពអឺរ៉ុបលោកស្រី Federica Mogherini និង ស្នងការអឺរ៉ុបទទួលបន្ទុកកិច្ចការងារទទួលសមាជិកថ្មី Johannes Hahn បាននាំគ្នាទទូចសុំឲ្យរដ្ឋាភិបាលតួកគីបញ្ឈប់រាល់ការចេញសេចក្តីថ្លែងការណ៍ឬប្រើសម្តីវាយប្រហារនានាដើម្បីបញ្ចៀសនូវការប្រឈមមុខគ្នាកាន់តែខ្លាំងរវាងភាគីហូឡង់និងតួកគីនោះ។
តាមពិតទៅរដ្ឋាភិបាលតួកគីក្រោមការដឹកនាំរបស់ប្រធានាធិបតី Tayyip Erdogan កំពុងស្វះស្វែងរកការគាំទ្រពីប្រជាជនតួកគីនៅក្រៅប្រទេសរួមទាំងនៅហូឡង់ផង ចំពោះការរៀបចំប្រជាមតិវិសោធនកម្មរដ្ឋធម្មនុញ្ញបង្កើតអំណាចឲ្យប្រធានាធិបតីឬនិយាយម្យ៉ាងទៀតថាដើម្បីប្តូរប្រព័ន្ធដឹកនាំបច្ចុប្បន្នទៅជាប្រព័ន្ធប្រធានាធិបតីនិយមដូចនៅអាមេរិកវិញ។ ពេលអាជ្ញាធរហូឡង់ហាមរដ្ឋមន្ត្រីខ្លួនចូលថ្លែងសុន្ទរកថា លោក Edogan ក៏ប្រដូចសកម្មភាព ហូឡង់ទៅនឹងសកម្មភាពក្រុមណាស៊ីអាល្លឺម៉ង់ផងដែរ។
យោងតាមស្ថានភាពបច្ចុប្បន្ន អាជ្ញាធរហូឡង់សម្រេចហាមរដ្ឋមន្ត្រីតួកគីរហូតបង្កឲ្យមានការប្រឈមមុខគ្នាផ្នែកការទូតនេះ ក៏ដោយសារតែការបោះឆ្នោតប្រទេសនេះជិតមកដល់ដែរ។ រដ្ឋាភិបាលហូឡង់ខ្លាចថា ការបើកឲ្យទ្វារឲ្យមន្ត្រីតួកគីចូលជួបថ្លែងសុន្ទរកថាទាញយកការគាំទ្រពីប្រជាជនតួកគីនៅហូឡង់នឹងជួយឲ្យក្រុមអ្នកនយោបាយស្តាំនិយមជ្រុលមានប្រៀបក្នុងការបោះឆ្នោតនេះ៕
Tag:
តួកគី
សហភាពអឺរ៉ុប
ហូឡង់
© រក្សាសិទ្ធិដោយ thmeythmey.com