អន្តរជាតិ
អស់តំណែងភ្លាម រដ្ឋអាជ្ញាកូរ៉េខាងត្បូងហៅលោកស្រី ប៉ាក ហ្គឺនហេ មកសួរនាំសំណុំរឿងពុករលួយ 15, Mar 2017 , 2:19 pm
លោកស្រី ប៉ាក ហ្គឺហេ ចាកចេញពីវិមានប្រធានធិបតី ក្រោយអស់តំណែង (រូបភាព Reuters)
× រដ្ឋអាជ្ញាកូរ៉េខាងត្បូង បានកោះហៅអតីតប្រធានាធិបតី ប៉ាក ហ្គឺនហេ ឲ្យចូលខ្លួនមកបំភ្លឺនៅសប្ដាហ៍ក្រោយ ជុំវិញសំណុំរឿងពុករលួយ ដែលនាំទៅដល់ការបោះឆ្នោតទម្លាក់តំណែងលោកស្រី។ លោកស្រី ប៉ាក ត្រូវបានសភាបោះឆ្នោតទម្លាក់ពីតំណែងនៅថ្ងៃទី៩ ខែធ្នូ ហើយមកដល់ថ្ងៃទី១០ ខែមីនា តុលាការធម្មនុញ្ញ ក៏បានបោះឆ្នោតយល់ព្រមរក្សាការសម្រេចរបស់សភា ដែលនាំឲ្យលោកស្រី បាត់បង់តំណែងជាផ្លូវការ។
មន្ត្រីការិយាល័យរដ្ឋអាជ្ញាប្រចាំតំបន់សេអ៊ូលកណ្ដាល បាននិយាយថា ក្រុមរដ្ឋអាជ្ញាបានបញ្ជូនដីកាកោះមកអតីតប្រធានាធិបតី ប៉ាក ហ្គឺនហេ ឲ្យបង្ហាញខ្លួនដើម្បីសាកសួរនៅថ្ងៃទី២១ ខែមីនា លើសំណុំរឿងពុករលួយ។ មន្ត្រីមេធាវីប្រធានាធិបតីអស់តំណែងរូបនេះ ក៏បានទទួលដីកាកោះថ្ងៃទី១៥ ខែមីនានេះរួចហើយដែរ ហើយក៏បានសន្យាចូលរួមសហការឲ្យពេញទំហឹងក្នុងការស៊ើបអង្កេតនេះទៀតផង។
លោកស្រី ប៉ាក ហ្គឺនហេ កូនស្រីអតីតមេដឹកនាំផ្ដាច់ការ ប៉ាក ជុងហ៊ី បានជាប់ឈ្មោះជាជនសង្ស័យលើករណីបំពានអំណាច និងសមគំនិតជាមួយមិត្តភក្តិជិតស្និទ្ធ Choi Soon-sil ក្នុងការប្រើប្រាស់ឥទ្ធិពលលោកស្រី គំរាមទារប្រាក់ពីក្រុមហ៊ុនក្នុងស្រុក។ លោកស្រី ប៉ាក បានទាត់ចោលការប្រកាន់ទាំងអស់នេះ ខណៈមនុស្សជំនិតលោកស្រីជាច្រើននាក់ ត្រូវបានរដ្ឋអាជ្ញាកោះហៅមកសួរនាំជុំវិញការពាក់ព័ន្ធរបស់ពួកគេ។
យ៉ាងណាក្ដី ក្រុមរដ្ឋអាជ្ញាមិនអាចកោះហៅលោកស្រីមកសាកសួបានឡើយ បើទោះជាត្រូវសភាបោះឆ្នោតទម្លាក់ពីតំណែងក៏ដោយ រហូតមកដល់ពេលដែលតុលាការធម្មនុញ្ញចាត់ទុកជាបានការលទ្ធផលបោះឆ្នោតសភា ដែលធ្វើឲ្យលោកស្រីក្លាយជាប្រធានាធិបតីជាប់ឆ្នោតទី១ ត្រូវបណ្ដេញចេញ។ ការសម្រេចរបស់តុលាការមានន័យថា អភ័យឯកសិទ្ធិរបស់លោកស្រី ប៉ាក ត្រូវបាត់បង់ ហើយអាចប្រឈមមុខការចាប់ខ្លួន ឬក៏ការកោះហៅបានគ្រប់ពេលទាំងអស់។
បើតាមទីភ្នាក់ងារព័ត៌មាន Yonhap ប្រសិនបើអតីតប្រធានាធិបតីរូបនេះ បដិសេធចូលខ្លួនតាមការកោះហៅដោយមិនមានមូលហេតុផ្លូវច្បាប់ត្រឹមត្រូវទេ រដ្ឋអាជ្ញាអាចប្រើអំណាចបង្ខំឲ្យលោកស្រីចូលខ្លួនតាមរយៈការចេញដីការបស់តុលាការ។ យ៉ាងណាក្ដី រដ្ឋអាជ្ញាកូរ៉េខាងត្បូង មិនបានពិនិត្យលទ្ធភាពចំណាត់ការនេះនៅឡើយទេ។
រឿងមួយទៀតនោះ ប្រសិនបើលោកស្រីចូលខ្លួនតាមការកោះហៅនេះ លោកស្រីនឹងក្លាយជាអតីតប្រធានាធិបតីកូរ៉េខាងត្បូងទី៤ ដែលត្រូវសាកសួរករណីឧក្រិដ្ឋរបស់ខ្លួន។ អតីតប្រធានាធិបតី៣រូបទៀតដែលធ្លាប់បង្ហាញមុខមាន លោក Roh Tae-woo, លោក Chun Doo-hwan និងលោក Roh Moo-hyun។ អតីតប្រធានាធិបតី Roh បានធ្វើអត្តឃាតក្នុងឆ្នាំ២០០៩ ក្រោយការចោទប្រកាន់ថាសមាជិកគ្រួសាររបស់លោកទទួលលុយខុសច្បាប់៕
Tag:
កូរ៉េខាងត្បូង
ប៉ាក ហ្គឺហេ
© រក្សាសិទ្ធិដោយ thmeythmey.com