វិទ្យាសាស្រ្ត និង បច្ចេកវិទ្យា
អន្តរជាតិ
អារ៉ាប់រួមអេមីរ៉េតនឹងដាក់រ៉ូបូតធ្វើជាជំនួយការបង្រៀននៅសាលាមួយចំនួន 15, Mar 2017 , 8:39 pm
× ក្រុមហ៊ុនបច្ចេកវិទ្យាដែលមានជំនាញផ្នែកអប់រំ ATLAB របស់អារ៉ាប់រួមអេមីរ៉េត បានប្រកាសពីការដាក់ដំណើរមនុស្សយន្តរ៉ូបូតនៅតាមសាលារៀនមួយក្នុងទីក្រុងឌូបៃ និងក្រុងផ្សេងទៀត នាចុងឆ្នាំ២០១៧នេះ។
មនុស្សយន្តរ៉ូបូត ATLAB TeachAssist នឹងក្លាយជាគ្រូ និងជាជំនួយការដ៏ល្អរបស់សិស្សនៅតាមសាលាក្នុងប្រទេសអារ៉ាប់រួមអេមីរ៉េត។ នេះបើតាមការចុះផ្សាយរបស់កាសែត Arabian Business កាលពីថ្ងៃទី១៣ ខែមីនា។
ប្រព័ន្ធបច្ចេកវិទ្យា រ៉ូបូត នឹងដើរតួនាទីពិសេស ក្នុងនាមជាបណ្ណារក្ស ដែលជួយដល់សិស្សក្នុងការស្វែងរកសៀវភៅ ក៏ដូចជារៀបចំឲ្យសិស្សខ្ចីសៀវភៅផងដែរ។ ក្រុមហ៊ុន ATLAB បានបញ្ជាក់បន្ថែមថា រ៉ូបូត អាចកត់ត្រាពីការចូលរួមរបស់សិស្ស ក៏ដូចជាធ្វើជាមគ្គុទេសក៏សម្រាប់ភ្ញៀវនានានៅសាលាផងដែរ។
ក្រុមហ៊ុន ATLAB ដែលបានបង្ហាញបច្ចេកវិទ្យាថ្មីរបស់ខ្លួនក្នុងព្រឹត្តិការណ៍អប់រំ Global Education Supplies and Solutions (GESS) នៅទីក្រុងឌូបៃ បានអះអាងថា សាលាជាច្រើនក្នុងប្រទេសអារ៉ាប់រួមអេមីរ៉េត បានបង្ហាញពីចំណាប់អារម្មណ៍ក្នុងការប្រើប្រាស់រ៉ូបូតរបស់ខ្លួន។
បើតាមការអះអាងរបស់លោក S Senthil Kugan នាយកក្រុមហ៊ុន ATLAB រ៉ូបូតក៏អាចមានសមត្ថភាពផ្តល់ជំនួយការដល់សិស្សលើមុខវិជ្ជាឯកទេសផងដែរ ហើយពួកវានឹងផ្តល់ចម្លើយភ្លាមៗ ។ លោកបានបន្ថែមថា ការបំពាក់បច្ចេកវិទ្យាថ្មីនេះ ក៏ត្រូវមានការរៀបចំថ្នាក់រៀនពិសេស រួមទាំងការពង្រឹងសមត្ថភាពរបស់សិស្សផងដែរ៕
Tag:
អប់រំ
រ៉ូបូត
ATLAB TeachAssist
បច្ចេកវិទ្យា
© រក្សាសិទ្ធិដោយ thmeythmey.com