អន្តរជាតិ
អាជ្ញាធរថៃ រឹបអូសកុយរមាសតម្លៃជិត៥លានដុល្លារ ពីអ្នកដំណើរចេញពីភ្នំពេញ និងវៀតណាម ទៅថៃ 15, Mar 2017 , 8:10 pm
រូបពី Bangkok Post
× អាជ្ញាធរថៃ បានរឹបអូសកុយរមាសតម្លៃជិត៥លានដុល្លារ ដែលនាំចូលពីទីផ្សារងងឹត ពីអ្នកដំណើរជនជាតិថៃម្នាក់ ដែលធ្វើដំណើរពីភ្នំពេញទៅថៃ។ អាជ្ញាធរថៃ ចាត់ទុកចំនួនកុយរមាសនេះ គឺជាទំហំដ៏ធំមួយ ដែលមិនធ្លាប់មានពីមុនមក។
អគ្គនាយកដ្ឋានគយថៃ បានឲ្យដឹងថា កុយរមាសដែលអាជ្ញាធរថៃ រឹបអូសបាននេះមានទម្ងន់ជាង១០០គីឡូក្រាម ដែលត្រូវបានស្ត្រីជនជាតិថៃពីរនាក់ នាំចូលមកនៅចំណុចព្រលានយន្តហោះប្រទេសថៃ ដោយមានការរៀបចំគេចវេសពីការចាប់ខ្លួនបានយ៉ាងល្អ។ អគ្គនាយកដ្ឋានគយថៃ បន្តថា ស្ត្រីជនជាតិថៃដែលជាឈ្មួញខុសច្បាប់ទាំងពីរនាក់នេះ គឺម្នាក់បានធ្វើដំណើរតាមជើងយន្តហោះពីភ្នំពេញ និងម្នាក់ទៀតធ្វើដំណើរតាមជើងយន្តហោះពីវៀតណាម ចូលទៅទឹកដីថៃ។
នៅពេលដែលជនសង្ស័យទាំងពីរនេះ បានទៅដល់ព្រលានយន្តហោះសុវណ្ណភូមិនោះ ពួកគេក៏បានជួបនិយាយជាមួយគ្នានៅទីនោះ។ ក្រោយពីមើលឃើញភាពមិនប្រក្រតីនៃការសន្ទនាគ្នានោះ អគ្គនាយកដ្ឋានគយ និងមន្ត្រីព្រលានយន្តហោះថៃ ក៏មានការសង្ស័យលើការបូបស្ពាយរបស់ពួកគេទាំងពីរ ហើយក៏សម្រេចចិត្តសុំត្រួតពិនិត្យ ដោយរកឃើញថា ហាក់ដូចជាមានវត្ថុអ្វីដែលធ្ងន់ៗនៅខាងក្នុង។
សារព័ត៌មានបាងកកប៉ុស្តិ៍ បានបញ្ជាក់ដូច្នេះថា៖«បន្ទាប់ពីត្រួតពិនិត្យ និងស្កេន (Scan) អីវ៉ាន់ស្ត្រីទាំងពីរនាក់នេះហើយ។ មន្ត្រីអគ្គនាយកដ្ឋានគយ បានរកឃើញថា វ៉ាលីទាំងនេះមានផ្ទុកកុយរមាសក្នុងមួយវ៉ាលី មានចំនួន ៥៧គីឡូក្រាម និង៦១គីឡូក្រាម។ កុយរមាសទាំងនេះអាចលក់បានតម្លៃជាង១៤៨លានបាត (ជិត៥លានដុល្លារអាមេរិក)»។
បើតាមអាជ្ញាធរថៃ ដែលទទួលបានរបាយការណ៍ពីអាជ្ញាធរបារាំងនោះ កុយរមាសដែលឈ្មួញនាំចូលប្រទេសថៃនេះ អាចមានប្រភពចេញពីប្រទេសបារាំង ខណៈដែលកូនរមាសមួយក្បាល ត្រូវបានព្រានព្រៃបាញ់សម្លាប់នៅក្នុងទីកន្លែង Thoiry Zoo នៃប្រទេសបារាំង។ មន្ត្រីនាយកដ្ឋានគយថៃ អះអាងថា ស្ត្រីជនជាតិថៃ ដែលរត់ពន្ធកុយរមាសខុសច្បាប់ទាំងពីរនេះ អាចជាសមាជិកនៃក្រុមបងធំរកស៊ីជួញដូរសត្វព្រៃខុសច្បាប់ផងដែរ។
តម្លៃកុយរមាសនៅក្នុងទីផ្សារងងឹតអាចលក់បានតម្លៃ៦ម៉ឺនដុល្លារក្នុងមួយគីឡូក្រាម ហើយមានតម្លៃថ្លៃជាងមាស និងសារធាតុ( CocaIne)ទៅទៀត ។ តម្រូវការកុយរមាសនេះភាគច្រើននាំទៅប្រទេសចិន និងវៀតណាម សម្រាប់ផលិតឱសថបុរាណ និងថ្នាំសម្រើបបង្កើនចំណងផ្លូវភេទ៕
Tag:
ថៃ
វៀតណាម
កម្ពុជា
កុយរមាស
© រក្សាសិទ្ធិដោយ thmeythmey.com