អន្តរជាតិ
នយោបាយអន្តរជាតិ
លោក Duterte ចង់ទះកំផ្លៀងអ្នកដែលបន្តរិះគន់«សង្គ្រាមគ្រឿងញៀន»
02, Apr 2017 , 9:59 pm
×![]()
ប្រធានាធិបតីហ្វីលីពីនលោក Rodrigo Duterte បានលើកឡើងថា លោកចង់ហៅអ្នកទាំងឡាយណាដែលរិះគន់សង្គ្រាមគ្រឿងញៀននិងណែនាំឲ្យលោកប្រើមណ្ឌលកែប្រែដោះស្រាយគ្រឿងញៀន មកជួបព្រោះលោកចង់ទះកំផ្លៀងពួកគេ។ 
សង្គ្រាមគ្រឿងញៀនរបស់ប្រធានាធិបតីហ្វីលីពីន Rodrigo Duterte នៅតែជាបញ្ហាចម្រូងចម្រាស ហើយវាក៏ទាក់ទាញការរិះគន់ខ្លាំងពីក្រុមសិទ្ធិមនុស្សនិងស្ថាប័នអន្តរជាតិដែរ។
ប៉ុន្តែលោក Duterte មិនប្តូរគោលដៅកម្ចាត់ឈ្មូញគ្រឿងញៀន ដើម្បីផ្គាប់ចិត្តអ្នករិះគន់ឡើយ ដោយផ្ទុយទៅវិញលោកជេរប្រទេចផ្តាសារអ្នករិះគន់លោកមិនសំចៃមាត់ទៀត។
នៅយប់ថ្ងៃសុក្រ ទី៣១ មីនានេះ ប្រធានាធិបតីមាត់ឆៅហ្វីលីពីនរូបនេះបានហៅរាល់អ្នករិះគន់សង្គ្រាមគ្រឿងញៀននិងផ្តល់យោបល់ឲ្យលោកប្រើប្រាស់មណ្ឌលកែប្រែនិងមធ្យោបាលព្យាបាលជាដើមដើម្បីដោះស្រាយបញ្ហាគ្រឿងញៀន ឲ្យមកជួបលោកផ្ទាល់។ ហៅមកជួយនេះគឺដោយសារ លោកចង់ទះកំផ្លៀងពួកគេ។
លោកបានលើកឡើងដូច្នេះថា៖ «មកទីនេះមក ហើយយើងនឹងជជែកគ្នាព្រោះខ្ញុំចង់ទះកំផ្លៀងអ្នក»។ លោក Duterte បានពន្យល់ថា លោកមិនពេញចិត្តចំពោះក្រុមអ្នករិះគន់លោកដែលបានផ្តល់យោបល់ណែនាំឲ្យលោកបញ្ឈប់សង្គ្រាមគ្រឿងញៀន ហើយត្រឡប់ទៅសង់គ្លីនិកឬមណ្ឌលកែប្រែដូចប្រទេសដទៃទៀតផង។
តាមពិតទៅ សង្គ្រាមគ្រឿងញៀនរបស់លោករងការរិះគន់និងថ្កោលទោសយូរមកហើយពីសំណាក់ប្រទេសលោកខាងលិចជាពិសេសអាមេរិកនិងសហភាពអឺរ៉ុប។ ប៉ុន្តែ តាមរបាយការណ៍ស្ទង់មតិ វាទទួលបានការគាំទ្រច្រើនពីសំណាក់ប្រជាជនហ្វីលីពីនខ្លួនឯងផ្ទាល់។
ដោយសារសង្គ្រាមបង្ហូរឈាមឈ្មួញគ្រឿងញៀននេះ ទំនាក់ទំនងរវាងហ្វីលីពីន និងសហភាពអឺរ៉ុបបានធ្លាក់ចុះខ្លាំង ហើយលោក Duterte ខ្លួនឯងក៏មិនបានទប់មាត់ មិនរិះគន់សហភាពអឺរ៉ុបដែរ។ កាលពីសប្តាហ៍មុន លោកបានជេរប្រទេចសហភាពអឺរ៉ុប ក្រោយពេលសហភាពអឺរ៉ុបនេះបានហៅគោលនយោបាយលោកថា ជាការអនុវត្តគោលឆ្កួតឡប់។
កាលពីខែមីនា សហភាពអឺរ៉ុបបានចេញដំណោះស្រាយថ្កោលទោសការសម្លាប់មនុស្សក្រៅប្រព័ន្ធតុលាការនៅហ្វីលពីនក្រោមរជ្ជកាលលោក Duterte ផងដែរ។ ឆ្លើយតបការថ្កោលទោសនេះ លោក Duterte មិនត្រឹមតែចោទ សហភាពអឺរ៉ុបថាលូកលាន់កិច្ចការផ្ទៃក្នុងហ្វីលីពីនប៉ុណ្ណោះទេ តែលោកបានគំរាមព្យួរកអ្នករិះគន់លោករាប់ទាំងមន្ត្រីសភាពអឺរ៉ុបផង។
នៅសប្តាហ៍នេះ តំណាងសហភាពអឺរ៉ុប Franz Jessen បានអំពាវនាវឲ្យរដ្ឋាភិបាលក្រុងម៉ានីលបន្តអនុវត្តគោលការណ៍នីតិរដ្ឋ និងធានាឲ្យបាននូវការគោរពសិទ្ធិមនុស្សផងដែរ បើមិនដូច្នេះទេហ្វីលីពីនអាចនឹងបាត់បង់ទំនាក់ទំនងពាណិជ្ជកម្មជាមួយសហភាពអឺរ៉ុបហើយ។
សូមបញ្ជាក់បន្តិចថា ចាប់ពីពេលដែលលោក Duterte ឡើងកាន់តំណែងនៅពាក់កណ្តាលឆ្នាំ ២០១៦ មកសង្គ្រាមគ្រឿងញៀនរបស់លោកឆក់យកជីវិតមនុស្សអស់ច្រើនជាង ៨ពាន់នាក់ក្នុងនោះមានអ្នកស្លាប់ដោយសារការបង្ក្រាបរបស់ប៉ូលិស និង ការសម្លាប់ក្រៅប្រព័ន្ធតុលាការផង៕
Tag:
Rodrigo Duterte
សហភាពអឺរ៉ុបុ
ហ្វីលីពីន
សង្គ្រាមប្រឆាំងគ្រឿងញៀន
© រក្សាសិទ្ធិដោយ thmeythmey.com
