អន្តរជាតិ
នយោបាយអន្តរជាតិ
ដូណាល់ ត្រាំ៖ បើចិនមិនជួយ អាមេរិកនឹងដោះស្រាយបញ្ហាកូរ៉េខាងជើងតែម្នាក់ឯង
03, Apr 2017 , 10:06 am
×![]()
ដោយ: ថ្មីៗ
ប៉ុន្មានថ្ងៃមុនជំនួបជាមួយប្រធានាធិបតីចិន ស៊ី ជីនភីង លោកប្រធានាធិបតី ដូណាល់ ត្រាំ ប្រកាសថា អាមេរិកនឹងចាត់ការបញ្ហានុយក្លេអ៊ែរកូរ៉េខាងជើងតែម្នាក់ឯង បើចិនមិនព្រមជួយទេនោះ។ រដ្ឋបាលលោក ត្រាំ មិនស្ងប់ចិត្តឡើយចំពោះអាកប្បកិរិយាទម្រន់របស់ចិនជុំវិញបញ្ហាកូរ៉េខាងជើង បើទោះជាអាមេរិកស្នើម្ដងជាពីរដងឲ្យជួយដាក់សម្ពាធលើរដ្ឋឯកោមួយនេះឲ្យបោះបង់កម្មវិធីនុយក្លេអ៊ែរក្ដី។ គេមិនទាន់ដឹងថាលោក ត្រាំ នឹងធ្វើអ្វីលើកូរ៉េខាងជើងដែរ ហើយការប្រើប្រាស់យោធាក៏ស្ថិតក្នុងជម្រើសដែរ។ 
ប្រធានាធិបតីអាមេរិក ដូណាល់ ត្រាំ បានលើកឡើងពីលទ្ធភាពក្នុងការប្រើប្រាស់ពាណិជ្ជកម្មជាថ្នូរទៅឲ្យចិនក្នុងការសហការគ្នាដោះស្រាយបញ្ហានុយក្លេអ៊ែរកូរ៉េខាងជើង ដែលតែងបង្កទង្វើព្រហើនមិនខ្លាចនរណា។ ប៉ុន្តែ លោក ត្រាំ ក៏បញ្ជាក់ដែថា បើចិនដែលគេគ្រប់គ្នាចាត់ទុកជាបងធំរបស់កូរ៉េខាងជើង មិនព្រមសហការទេនោះ អាមេរិកនឹងរកផ្លូវដោះស្រាយនុយក្លេអ៊ែរ និងមីស៊ីលកូរ៉េខាងជើងដោយខ្លួនតែម្ដង។
ក្នុងបទសម្ភាសជាមួយសារព័ត៌មាន Financial Times របស់អង់គ្លេស លោក ត្រាំ ក៏បានលើកឡើងពីឥទ្ធិពលរបស់ចិនលើរបបកូរ៉េខាងជើង ហើយចិនពិតជាអាចជួយដោះស្រាយបញ្ហានុយក្លេអ៊ែរនេះបាន។ លោកបន្តថា បើចិនជួយ នោះវានឹងក្លាយជារឿងដ៏ប្រសើរ តែបើមិនព្រមជួយទេនោះ វាមិនមែនជារឿងល្អសម្រាប់គ្រប់គ្នាឡើយ។ យ៉ាងណាក្ដី លោក ត្រាំ ដែលគ្រោងជួបប្រធានាធិបតីចិននៅប៉ុន្មានថ្ងៃទៀតនេះ អាចយករឿងពាណិជ្ជកម្មដើម្បីអន្ទងចិត្តចិនឲ្យជួយដោះស្រាយបញ្ហានេះ។
លោក ត្រាំ នឹងជួបពិភាក្សាជាមួយលោក ស៊ី ជីនភីង នៅ Mar-a-Lago អំឡុងទស្សនកិច្ចរបស់ប្រធានាធិបតីចិននៅអាមេរិក ចាប់ពីថ្ងៃទី៦ ដល់ថ្ងៃទី៧ ខែមេសា។ ច្បាស់ណាស់ថា ប្រធានបទកូរ៉េខាងជើង នឹងត្រូវលើកឡើងមិនខាន ប៉ុន្តែបើជំនួបនេះនៅតែមិនអាចរកច្រកចេញសមស្របណាមួយនោះ លោក ត្រាំ ព្រមានថា អាមេរិកនឹងរកផ្លូវចេញដោយខ្លួនឯងមិនខាន ហើយថែមទាំងមិនសហការជាមួយចិនទៀតទេ ព្រោះចិននៅតែមានជំហរទម្រន់ដដែល។
បើទោះជាយ៉ាងណាក្ដី គេមិនដឹងថា អាមេរិក នឹងធ្វើអ្វីលើកូរ៉េខាងជើងដែរ។ ប៉ុន្តែកាលពីទស្សនកិច្ចរបស់រដ្ឋមន្ត្រីការបរទេស Rex Tillerson នៅអាស៊ី ប្រមុខការទូតអាមេរិករូបនេះក៏អះអាងហើយថា ក្រុងវ៉ាស៊ីនតោនគ្មានការអត់ធ្មត់លើកូរ៉េខាងជើងទៀតទេ ហើយដំណោះស្រាយទាំងអស់ គឺស្ថិតលើតុ រាប់ទាំងជម្រើសខាងយោធាផងដែរ។ នេះជាលើកដំបូងដែលអាមេរិកនិយាយដល់រឿងយោធា ខណៈការចរចាបានជាប់គាំងរាប់ឆ្នាំ ហើយទណ្ឌកម្មក៏មិនអាចរារាំងកូរ៉េខាងជើងបានដែរ។
តាំងពីយុទ្ធនាការស្វែងរកសំឡេងឆ្នោតមកនោះ លោក ត្រាំ តែងបានរិះគន់ចិនលើរឿងកូរ៉េខាងជើងនេះ ហើយជារឿយៗក៏ចោទចិនថានៅពីក្រោយសកម្មភាពនុយក្លេអ៊ែររបស់កូរ៉េខាងទៀតផង។ លោក ក៏ជឿថា សម្ដីរបស់ចិននៅតែប្រៃសម្រាប់ការរកច្រកចេញនៃកម្មវិធីនុយក្លេអ៊ែរកូរ៉េខាងជើង ប៉ុន្តែចិនដូចជាមិនខ្វល់នឹងអំពាវនាវរបស់អាមេរិកសោះ។ សម្រាប់លើកនេះ លោក ត្រាំ ប្រកាសហើយថា មាន ឬមិនមានចិន អាមេរិកនឹងដោះស្រាយបញ្ហានេះឲ្យបាន៕
Tag:
អាមេរិក
ចិន
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com
