អន្តរជាតិ
អាមេរិក ដឹកនាំកូរ៉េខាងត្បូងនិងជប៉ុន ធ្វើលំហាត់យោធាប្រឆាំងនាវាមុជទឹកកូរ៉េខាងជើង 03, Apr 2017 , 2:25 pm
× កងទ័ពជើងទឹកមកពីបីប្រទេសមាន គឺអាមេរិក, កូរ៉េខាងត្បូង និងជប៉ុន បានធ្វើសមយុទ្ធជើងទឹករួមគ្នាមួយដើម្បីត្រៀមទប់ទល់ការគំរាមកំហែងពីសំណាក់នាវាមុជទឹកកូរ៉េខាងជើង ដែលកើនឡើងខ្លាំងនារយៈពេលចុងក្រោយ។ សមយុទ្ធនេះ នឹងផ្ដោតសំខាន់លើការឆ្លើយតបប្រកបដោយប្រសិទ្ធភាពទល់នឹងការគំរាមរបស់ក្រុងព្យុងយ៉ាង ដែលប្រឹងប្រែងអភិវឌ្ឍកម្លាំងយោធារបស់ខ្លួនយ៉ាងខ្លាំងមិនថាជើងគោក ឬជើងទឹកអ្វីឡើយ។ ប្រទេសទាំងបីព្រួយបារម្ភយ៉ាងខ្លាំង និងបានរកផ្លូវដើម្បីការពារខ្លួនទុកមុនទៀតផង។
ក្រសួងការពារជាតិកូរ៉េខាងត្បូង បានប្រកាសនៅថ្ងៃទី៣ ខែមេសា ថា អាមេរិក, កូរ៉េខាងត្បូង និងជប៉ុន បានចាប់ផ្ដើមសមយុទ្ធជើងទឹក៣ថ្ងៃ ដើម្បីទប់ទល់ការគំរាមកំហែងពីសំណាក់កូរ៉េខាងជើង។ កងទ័ពច្រើនជាង៨០០នាក់ ចូលរួមក្នុងសមយុទ្ធរួមគ្នានេះ ដែលធ្វើឡើងនៅសមុទ្រចន្លោះកូរ៉េខាងត្បូង និងជប៉ុន ហើយក៏មានការពង្រាយនាវាពិឃាត ព្រមទាំងឧទ្ធម្ភាគចក្រជាច្រើនគ្រឿងមកពីប្រទេសទាំងបីផងដែរ។
ទីភ្នាក់ងារព័ត៌មាន Yonhap បានស្រង់សេចក្ដីប្រកាសខាងលើទៀតថា សមយុទ្ធរួមគ្នានេះ មានគោលដៅធានាការឆ្លើយតបប្រឆាំងការគំរាមរបស់កូរ៉េខាងជើង ជាពិសេសមីស៊ីលបាលីស្ទិកបាញ់ពីនាវាមុជទឹក (SLBM) តែម្ដង។ សមយុទ្ធនេះ ក៏បង្ហាញពីការប្ដេជ្ញាចិត្តរបស់សម្ព័ន្ធមិត្តទាំងបីប្រទេសក្នុងការជួយគ្នាទៅវិញទៅមកក្នុងគ្រាមានអាសន្នដែរ ដ្បិតអីប្រទេសទាំងបី ជាគោលដៅចម្បងនៃការវាយប្រហារពីសំណាក់កូរ៉េខាងជើងដែរ។
ទ័ពជើងទឹកកូរ៉េខាងត្បូង បញ្ជូននាវាពិឃាតទម្ងន់ធ្ងន់ Kang Gam Chan និងឧទ្ធម្ភាគចក្រមួយគ្រឿង ខណៈអាមេរិកបញ្ជូននាវាចម្បាំងពិឃាត USS McCampbell ដែលមានបំពាក់ប្រព័ន្ធការពារមីស៊ីលបាលីស្ទិក Aegis និងឧទ្ធម្ភាគចក្រប្រឆាំងនាវាមុជទឹក MH-60 និងយន្តហោះល្បាតប្រភេទ P-3 Orion ។ ជាមួយគ្នានោះ កងទ័ពជប៉ុនក៏បានបញ្ជូនឧទ្ធម្ភាគចក្រពិឃាតប្រភេទ Sawagiri មកចូលរួមសមយុទ្ធរួមគ្នានេះដែរ។
កងទ័ពជើងទឹកទាំងបីប្រទេស នឹងធ្វើលំហាត់ស្វែងរក និងតាមដាននាវាមុជទឹក ដែលតំណាងជានាវាមុជទឹករបស់កូរ៉េខាងជើង។ ក្រៅពីនោះ សមយុទ្ធនេះ ក៏មានអនុវត្តការផ្លាស់ប្ដូរព័ត៌មានឲ្យគ្នាទៅវិញទៅមកដែរ។ អ្វីគួរឲ្យកត់សម្គាល់ នេះជាសមយុទ្ធរួមគ្នាប្រឆាំងនាវាមុជទឹកលើកទីមួយរវាងប្រទេសទាំងបី បន្ទាប់ពីមានកិច្ចប្រជុំត្រីភាគីកាលពីខែធ្នូ ឆ្នាំ២០១៦ ដែលសំដៅបង្ហាញការសហការគ្នារវាងអាមេរិក កូរ៉េខាងត្បូង និងជប៉ុន។
សមយុទ្ធនេះ ក៏ធ្វើឡើងស្របពេលដែលកូរ៉េខាងជើងបង្កើនសមត្ថភាពយោធារបស់ខ្លួនយ៉ាងខ្លាំង តាមរយៈការបង្កើនការសាកល្បងមីស៊ីលជាច្រើនគ្រាប់នៅដើមឆ្នាំ២០១៧ ។ នៅដើមខែកុម្ភៈ កូរ៉េខាងជើង បាញ់មីស៊ីលបួនគ្រាប់ ហើយបីគ្រាប់ធ្លាក់ចូលដែនសមុទ្ររបស់ជប៉ុន។ កាលពីខែសីហាកន្លងទៅ រដ្ឋកុម្មុយនីស្តមួយនេះ ក៏បានសាកល្បងដោយជោគជ័យមីស៊ីលបាលីស្ទិកបាញ់ចេញពីនាវាមុជទឹកតម្រង់គោលដៅជប៉ុនដែរ៕
Tag:
អាមេរិក
កូរ៉េខាងត្បូង
ជប៉ុន
កូរ៉េខាងជើង
© រក្សាសិទ្ធិដោយ thmeythmey.com