អន្តរជាតិ
ក្មេងអាយុ៥ឆ្នាំត្រូវឪពុកចុងធ្វើបាបដល់ស្លាប់ដោយសារតែនោមដាក់គ្រែ 04, Apr 2017 , 8:19 am
× បារាំង៖ កាលពីខែកុម្ភៈ កុមារាម្នាក់ឈ្មោះ Yanis ត្រូវបានគេរកឃើញសាកសពនៅក្នុងបឹងមួយនៅតំបន់ Pas-de-Calais បន្ទាប់ពីរូបគេបានរងការពិន័យពីឪពុកចុង ដោយសារតែរូបគេបាននោមដាក់លើគ្រែគេង។
អ្នកភូមិប្រមាណ៤០០នាក់នៅ Aire-sur-la-Lys តំបន់ Pas-de-Calais ប្រទេសបារាំង កាលពីចុងសប្តាហ៍កន្លងមក បាននាំគ្នាជួបជុំគ្នាដើម្បីគោរពវិញ្ញាណក្ខន្ធកុមារា Yanis Courbot-Inglard ដែលបានស្លាប់ដ៏កម្សត់បំផុត ដោយរូបគេត្រូវបានឪពុកចុងពិន័យឲ្យរត់រាប់សិបគីឡូម៉ែត្រនៅពេលយប់ បន្ទាប់ពីរូបគេបាននោមដាក់លើគ្រែ។
បើតាមលទ្ធផលនៃការស៊ើបអង្កេតបឋម កុមារា Yanis បានរត់ជាច្រើនគីឡូម៉ែត្រ ដោយឪពុកចុងរត់តាមពីក្រោយ។ ការស្លាប់របស់ Yanis ត្រូវបានគេប៉ាន់ស្មានថា អាចបណ្តាលមកពីឪពុកចុងវាយជាច្រើនពិលផងដែរ។
បីសប្តាហ៍បន្ទាប់ពីការស្លាប់ លោក Xavier Courbot បានទទួលសពកូនប្រុសបង្កើតរបស់ខ្លួន។ ក្នុងបទសម្ភាសជាមួយសារព័ត៌មាន La Voix du Nord លោក Xavier បានថ្លែងការអរគុណចំពោះទឹកចិត្តរបស់អ្នកភូមិដែលមានការអាណិតអាសូរកូនប្រុសរបស់ខ្លួន។
Julien M. អាយុ៣០ឆ្នាំ ដែលជាឪពុកចុង ត្រូវតុលាការចោទប្រកាន់ពីឧក្រិដ្ឋកម្ម និងមនុស្សឃាតដោយចេតនាលើកុមារអាយុក្រោម១៥ឆ្នាំ ចំណែកឯ Emilie I. ជាម្តាយ ជាប់ចោទពីបទគ្មានចេតនាទប់ស្កាត់ឧក្រិដ្ឋកម្ម ឬអំពើសមគំនិត។
អ្នកទាំងពីរបានរស់នៅជាមួយគ្នាតាំងខែសីហា ឆ្នាំ២០១៥មក ដោយគ្មានកូនផ្សេងទៀតឡើយ។ បច្ចុប្បន្ន ជនល្មើសទាំងពីរស្ថិតនៅក្រោមការឃុំឃាំងបណ្តោះអាសន្ន ខណៈសវនាការមិនទាន់ត្រូវបានកំណត់ពេលនៅឡើយទេ៕
© រក្សាសិទ្ធិដោយ thmeythmey.com