អន្តរជាតិ
Duterte បណ្ដេញរដ្ឋមន្ត្រីមហាផ្ទៃចេញពីតំណែង ព្រោះពុករលួយ 04, Apr 2017 , 10:35 am
ប្រធានាធិបតីហ្វីលីពីន Rodrigo Duterte (ឆ្វេង) បណ្ដេញលោក Ismael Sueno (ស្ដាំ) ចេញពីតំណែងរដ្ឋមន្ត្រីមហាផ្ទៃ (រូបភាព Inquirer.net)
× ប្រធានាធិបតីហ្វីលីពីន Rodrigo Duterte បានបណ្ដេញរដ្ឋមន្ត្រីមហាផ្ទៃ Ismael Sueno ចេញពីតំណែង ជុំវិញករណីពាក់ព័ន្ធអំពើពុករលួយ និងការបាត់ទំនុកចិត្ត។ Ismael Sueno ជាមន្ត្រីជាន់ខ្ពស់ទី១ ដែលត្រូវបណ្ដេញចេញក្នុងយុទ្ធនាការប្រឆាំងអំពើពុករលួយរបស់លោក Duterte ខណៈរយៈពេលជាង១០ខែនៃការកាន់អំណាចមកនេះ លោកក៏បានបញ្ឈប់តំណែងមន្ត្រីរដ្ឋាភិបាលជាច្រើននាក់រួចមកហើយដែរ។
អ្នកនាំពាក្យប្រធានាធិបតីហ្វីលីពីន បានប្រកាសនៅថ្ងៃទី៤ ខែមេសា ថា រដ្ឋមន្ត្រីមហាផ្ទៃ Ismael Sueno ត្រូវបានលោក Rodrigo Duterte បណ្ដេញចេញពីតំណែងហើយ។ លោក Sueno ដែលជួយលោក Duterte ក្នុងយុទ្ធនាការបោះឆ្នោតកន្លងមក ក្លាយជាសមាជិកជាន់ខ្ពស់រដ្ឋាភិបាលដំបូងគេ ដែលអស់តំណែងដោយសាររឿងពុករលួយនេះ។ លោក Ernesto Abella ជាអ្នកនាំពាក្យនិយាយថា លោក Duterte សម្រេចចិត្តដូចនេះព្រោះលោកអស់ទំនុកចិត្តលោក Sueno ទៅហើយ។
លោក Abella បន្តថា ការដកតំណែងរដ្ឋមន្ត្រីមហាផ្ទៃនេះ គឺជាការព្រមានដល់មន្ត្រីដទៃទៀត ដែលត្រូវបានលោក Duterte តែងតាំងសម្រាប់តំណែងនានា។ បើតាមសារព័ត៌មាន Inquirer.net សម្រាប់ ករណី លោក Sueno វិញ លោក ត្រូវបានចោទប្រកាន់ថាបានប្រព្រឹត្តអំពើពុករលួយ និងមានជម្លោះ ជាមួយមន្ត្រីថ្នាក់ក្រោមរបស់លោកផងដែរ។ អតីតរដ្ឋមន្ត្រីរូបនេះ បានទាត់ចោលការចោទប្រកាន់ទាំង អស់លើរូបលោក ប៉ុន្តែលោកមិនបានផ្ដល់ការបកស្រាយឲ្យបានច្បាស់លាស់ដែរ។
លោក Sueno គឺជាបុគ្គលដ៏សំខាន់ដែលជួយជំរុញឲ្យលោក Duterte សម្រេចចិត្តចូលរួមប្រណាំងប្រជែងកៅអីប្រធានាធិបតីក្នុងឆ្នាំ២០១៦ ។ ប៉ុន្តែវាមិនអាចជួយឲ្យលោករួចផុតពីការអស់តំណែងបានឡើយ។ ចុងក្រោយ លោក Duterte ក៏បានបណ្ដេញរដ្ឋមន្ត្រីរូបនេះចេញពីតំណែង ដើម្បីការពារមុខមាត់រដ្ឋាភិបាលដែលលោកសន្យាថា ជារដ្ឋាភិបាលស្អាតស្អំ មិនពុករលួយ និងជារដ្ឋាភិបាលដែលគួរទុកចិត្តបាន។
បោសសម្អាតអំពើពុករលួយ ជាអ្វីដែលលោក Duterte បានសន្យា ពេលលោកធ្វើយុទ្ធានាការឃោសនារកសំឡេងឆ្នោត។ លោកប្រកាសថា លោកមិនអត់ឱនដាច់ខាតអ្នកណាដែលពាក់ព័ន្ធករណីពុករលួយ បើទោះជាក្រុមគ្រួសារសាច់ញាតិរបស់លោកក៏ដោយ។ គ្រាន់តែក្នុងខែមីនាមួយប៉ុណ្ណោះ លោកបណ្ដេញមន្ត្រីរដ្ឋាភិបាល៩២នាក់ចេញពីតំណែងពួកគេ ដោយសារតែរឿងពុករលួយនេះ ហើយមន្ត្រីម្នាក់ក្នុងចំណោម៩២នាក់ គឺជាមនុស្សដែលធ្លាប់ធ្វើការជាមួយលោកតាំងឆ្នាំ១៩៩៨ ទៀតផង។
រាប់តាំងពីចូលកាន់តំណែងនៅពាក់កណ្ដាលឆ្នាំ២០១៦ លោក Duterte បណ្ដេញមន្ត្រីច្រើននាក់មកហើយ ដើម្បីធានាថា រដ្ឋបាលលោកស្អាតស្អំតាំងពីថ្នាក់លើដល់ថ្នាក់ក្រោម។ មិនត្រឹមតែបណ្ដេញចេញពីតំណែងឡើយ លោក Duterte ថែមទាំងគំរាមសម្លាប់មន្ត្រីពុករលួយទៀតផង។ ចំណែកខ្លួនលោកផ្ទាល់វិញ ក៏មិនមែនជាករណីលើកលែងដែរ។ លោកប្រកាសជាសាធារណៈថា បើសមាជិកគ្រួសារ សាច់ញាតិរបស់ណាមួយជាប់ពាក់ព័ន្ធពុករលួយ លោកនឹងចុះចេញពីតំណែងប្រធាធិបតីភ្លាម៕
Tag:
ហ្វីលីពីន
Rodrigo Duterte
Ismael Sueno
© រក្សាសិទ្ធិដោយ thmeythmey.com