អន្តរជាតិ
មន្ត្រីសន្តិសុខ៖ វត្តមានលោក ពូទីន អាចជាមូលហេតុនៃការវាយប្រហារភេរវកម្មនៅក្រុង St Petersburg 04, Apr 2017 , 2:14 pm
× ការបំផ្ទុះគ្រាប់បែកនៅក្នុងរថភ្លើងនាក្រុង St Petersburg បានសម្លាប់មនុស្ស១១នាក់និងបង្កឲ្យមនុស្សជាច្រើននាក់ផ្សេងទៀតរងរបួសធ្ងន់និងស្រាលផង។ ការស៊ើបអង្កេតកំពុងបន្តទៅមុខ តែគេវាយតម្លៃថាការវាយប្រហារនេះពាក់ព័ន្ធករណីភេរវកម្មច្រើនជាហេតុផលផ្សេង។ យ៉ាងណាក៏ដោយក្រុមប្រឹក្សាសហព័ន្ធរុស្ស៊ីយល់ថា ករណីនេះអាចទាក់ទងនឹងវត្តមានរបស់លោក វ៉្លាឌីមៀ ពូទីន នៅក្រុង St Petersburg ផងដែរ។ រុស្ស៊ីរងគ្រោះច្រើនដងមកហើយដោយសារករណីភេរវកម្ម ប៉ុន្តែប្រទេសនេះប្រឈមមុខកាន់តែខ្លាំងដោយសារការគំរាមកំហែងសន្តិសុខបង្កឡើងដោយចលនាភេរវកម្មអន្តរជាតិចាប់ពីពេលលោក ពូទីន បញ្ជូនទ័ពទៅអន្តរាគមន៍នៅស៊ីរីប្រឆាំងក្រុមដែស្ហឬក្រុមរដ្ឋឥស្លាម។
ទីក្រុងធំបំផុតទីពីររបស់រុស្ស៊ី St Petersburg រងការវាយប្រហារដោយសារការបំផ្ទុះគ្រឿងផ្ទុះច្នៃមួយនាថ្ងៃ ៣ខែមេសា ដោយសម្លាប់មនុស្ស ១១នាក់និងបង្កឲ្យមនុស្សច្រើននាក់ផ្សេងទៀតរងរបួសផងដែរ។ យោងតាមទីភ្នាក់ងារព័ត៌មានរុស្ស៊ី TASS ដែលបានស្រង់សម្តីសាក្សីដែលស្ថិតនៅក្នុងកន្លែងកើតហេតុ រថភ្លើងនេះធ្វើដំណើរពី Sennaya Ploshchad ទៅកាន់ ស្ថានីយ៍Tekhnologichesky។ ហើយពេលផ្ទុះភ្លាមអ្នកបើករថភ្លើងមិនបានឈប់ភ្លាមឡើយដោយអ្នកបើកនោះបន្តដំណើរទៅមុខឲ្យដល់ស្ថានីយ៍មួយទៀតសិនដើម្បីសម្រួលដល់ការជម្លៀសមនុស្ស និងរងរបួស។
ក្រោយការផ្ទុះភ្លាម អាជ្ញាធររុស្ស៊ី និងគណៈកម្មការជាតិប្រឆាំងភេរវកម្មរុស្ស៊ីបានចាប់ផ្តើមដំណើរការស្រាវជ្រាវនិងស៊ើបអង្កេតករណីនេះភ្លាមដើម្បីវែកមុខជនបង្កនិងមេខ្លោងផងដែរ។ ពាក់ព័ន្ធគ្រឿងផ្ទុះនេះ ក្រុមស៊ើបអង្កេតមិនទាន់អាចវាយតម្លៃបានឡើយថា វាផលិតចេញពីអ្វីឲ្យប្រាកដនោះ ប៉ុន្តែគេរកឃើញថាគ្រឿងផ្ទុះនោះត្រូវបានគេច្នៃដោយដាក់ម្សៅ TNT ច្រើន។ ក្រុមអ្នកជំនាញគ្រាប់បែកកំពុងសិក្សាបន្ថែមទៀតដើម្បីកំណត់ឲ្យបាននូវប្រភេទគ្រឿងផ្ទុះនោះ។ ក្រៅពីគ្រាប់ដែលផ្ទុះនោះ អាជ្ញាធរបានរកឃើញគ្រឿងផ្ទុះមួយទៀតដែលធំជាងមុននៅស្ថានីយ៍រថភ្លើងមួយផ្សេងទៀត ហើយអាជ្ញាធរក៏បានដោះគ្រាប់នោះចេញដោយសុវត្ថិភាពដែរ។ អាជ្ញាធរបានសម្រេចផ្អាកធ្វើដំណើរការរថភ្លើងក្រោមដីទាំង ៥ខ្សែរបណ្តោះអាសន្នដើម្បីធានាសុវត្ថិភាពប្រជាជន ហើយជាធម្មតាមនុស្ស ២,៣លាននាក់ធ្វើដំណើរតាមរថភ្លើងក្រោមដីនេះ។
១.នាយករដ្ឋមន្ត្រីរុស្ស៊ីហៅ ការបំផ្ទុះគ្រាប់នេះជាករណីភេរវកម្ម
ប្រធានាធិបតីរុស្ស៊ីលោក វ៉្លាឌីមៀ ពូទីន ដែលកំពុងស្ថិតនៅទីក្រុង St Petersburg ស្រាប់នោះបានលើកឡើងថា លោកចាត់ទុករាល់ករណីទាំងអស់ជាមូលហេតុនៃការបង្កប់គ្រឿងផ្ទុះក្នុងរថភ្លើងនោះក្នុងនោះមានទាំងសកម្មភាពភេរវកម្មផង។ ប៉ុន្តែលោកសង្កត់ធ្ងន់ថា វារហ័សពេកដែលត្រូវសន្និដ្ឋានថា វាជាករណីអ្វីពិតប្រាកដនោះព្រោះអាជ្ញាធរកំពុងបន្តការស៊ើបអង្កេតនោះ។ ប៉ុន្មានម៉ោងក្រោយសោកនាដកម្មកើតឡើង លោក ពូទីន បានចេញទៅដាក់បាច់ផ្កាគោរពវិញ្ញាណក្ខ័ន្ធអ្នកស្លាប់ក្នុងការបំផ្ទុះគ្រាប់នេះផងដែរ។
ទោះប្រធានាធិបតីមិនទាន់សន្និដ្ឋានថាវាជាករណីអ្វីឲ្យប្រាកដក្តី នាយករដ្ឋមន្ត្រីរុស្ស៊ី Dmitry Medvedev បានសរសេរបង្ហោះក្នុងគណនីហ្វេសប៊ុកផ្លូវការរបស់ខ្លួនដោយហៅការបំផ្ទុះគ្រឿងផ្ទុះនេះថាជាសកម្មភាពភេរវកម្ម។ លោកបានចូលរួមរម្លែកទុកជាមួយក្រុមគ្រួសារអ្នកស្លាប់និងអ្នករងរបួសផងដែរ ហើយនិងប្រកាសផ្តល់ជំនួយគ្រប់យ៉ាងដល់រាល់ជនរងគ្រោះ។
ដោយឡែក ប្រធានាធិបតីអាមេរិក លោក ដូណាល់ ត្រាំ ដែលកំពុងរៀបចំយុទ្ធសាស្ត្រកម្ចាត់ភេរវកម្មនិងអនុវត្តគោលនយោបាយរ៉ឹងត្អឹងចំពោះជនអន្តោប្រវេសន៍និងជនភៀសខ្លួននោះ បានចូលរួមសោកស្តាយចំពោះករណីនេះដែរ ហើយលោកក៏ចាត់ទុកករណីបំផ្ទុះគ្រាប់នេះជាសកម្មភាពភេរវកម្មដូចគ្នា។
ចំណែកប្រមុខរដ្ឋាភិបាលអាល្លឺម៉ង់លោកស្រី អែនជេឡា មឺហ្កែល បានថ្កោលទោសការវាយប្រហារនេះ ដោយចាត់ទុកថា វាជាសកម្មភាពព្រៃផ្សៃបំផុត។ ចំណែកប្រមុខការបរទេសសហភាពអឺរ៉ុបលោកស្រី Federica Mogherini បានសរសេរបង្ហោះតាមគណនី Twitter ផ្លូវការរបស់ខ្លួនផងដែរថា សហភាពអឺរ៉ុបនៅឈរជាមួយប្រជាជនរុស្ស៊ីក្នុងស្ថានភាពអាក្រក់នេះ។
២.ការវាយប្រហារជួននឹងពេលលោក ពូទីន នៅក្រុង St Petersburg
ដូចបានបញ្ជាក់ខាងដើមស្រាប់ហើយ លោក វ្វ៉្លាឌីមៀ ពូទីន កំពុងស្ថិតនៅទីក្រុងដែលរងគ្រោះថ្នាក់នេះ ដោយលោកត្រូវផ្តល់សុន្ទរកថាទៅកាន់អ្នកកាសែតផង។ ដូច្នេះហើយគេវាយតម្លៃថា ការវាយប្រហារនេះអាចមានពាក់ព័ន្ធវត្តមានរបស់មេដឹកនាំកំពូលរុស្ស៊ីរូបនេះនៅក្នុងទីក្រុង St Petersburg ក៏អាចថាបាន។
ប្រធានគណៈកម្មាធិការការពារជាតិនៃក្រុមប្រឹក្សាសហព័ន្ធរុស្ស៊ី Viktor Ozerov បានថ្លែងប្រាប់សារព័ត៌មាន CNN ថា ការកំណត់យកទីក្រុង St. Petersburg ប្រហែលជាពាក់ព័ន្ធទស្សនកិច្ចរបស់លោក វ៉្លាឌីមៀ ពូទីន មែន។
«ជម្រើសនៃការកំណត់ទីកន្លែង និងពេលវេលានៃការបំផ្ទុះគ្រាប់នេះមិនមែនជារឿងគាប់ជួនគ្នាទេ។ ប្រធានាធិបតីរុស្ស៊ីស្ថិតនៅទីក្រុងនេះ ហើយកម្មវិធីជួបអ្នកកាសែតនោះក៏កើតឡើងនៅពេលនោះ រួមទាំងមានអ្នកកាសែតច្រើនចូលរួមផងដែរ»។ នេះជាការបញ្ជាក់របស់ប្រមុខគណៈកម្មាធិការខាងលើ។
តាំងពីយូរមកហើយ រុស្ស៊ីក្លាយជាគោលដៅចម្បងមួយនៃការវាយប្រហារភេរវកម្ម ប៉ុន្តែវាមិនសូវញឹកញាប់ដូចពេលនេះឡើយ។ ការវាយប្រហារហាក់ដូចញឹកញាប់ជាងមុនរាប់ចាប់ពីពេលដែលប្រធានាធិបតី វ៉្លាឌីមៀ ពូទីន បញ្ជូនកងទ័ពទៅអន្តរាគមន៍នៅស៊ីរីដើម្បីកម្ចាត់ក្រុមភេរវជនរដ្ឋឥស្លាមឬក្រុមដែស្ហនិងការពាររបបដឹកនាំស៊ីរីរបស់លោក បាសា អាល់អាសាដផង។
ក្រោយអន្តរាគមន៍ចាប់ពីខែកញ្ញាឆ្នាំ ២០១៥ រុស្ស៊ីរងការគំរាមកំហែងពីក្រុមភេរវជនរដ្ឋឥស្លាមខ្លាំង។ ជាក់ស្តែង យន្តហោះរុស្ស៊ីមួយគ្រឿងដឹកអ្នកដំណើរ២២៤នាក់ពីព្រលានយន្តហោះអេហ្ស៊ីប Sharm el-Sheikh បានធ្លាក់នៅខែតុលាឆ្នាំ ២០១៥ ដោយស្នាដៃក្រុមភេរវជនរដ្ឋឥស្លាម។ ក្រោយមកនៅចុងឆ្នាំ ២០១៦ ឯកអគ្គរដ្ឋទូតរុស្ស៊ីប្រចាំតួកគីត្រូវបានជនជ្រុលនិយមម្នាក់បាញ់សម្លាប់ពេលកំពុងថ្លែងសុន្ទរកថា។
ចំណែកមុនចូលអន្តរាគមន៍នៅស៊ីរី គេឃើញមានករណីវាយប្រហារភេរវកម្មច្រើនដងដូចជា ឆ្នាំ ២០១៣, ឆ្នាំ ២០១០ និងឆ្នាំ ២០០២។ ឆ្នាំ ២០១៣នោះ វាមានការវាយប្រហារដោយគ្រាប់បែកអត្តឃាតមួយនៅស្ថានីយ៍រថភ្លើង Volgograd ដែលបានស្លាប់មនុស្សជាង ១០នាក់។ មួយថ្ងៃក្រោយមក វាមានករណីវាយប្រហារគ្រាប់បែកអត្តឃាតនៅទីក្រុងដដែលបានសម្លាប់មនុស្ស ១៤នាក់ផ្សេងទៀត។
ចំណែកឆ្នាំ ២០១០ អ្នកដាក់គ្រាប់បែកអត្តឃាតស្ត្រីពីរនាក់បានបំផ្ទុះខ្លួនឯងនៅស្ថានីយ៍រថភ្លើងក្រោមដីនារដ្ឋធានីម៉ូស្កូ ដោយសម្លាប់មនុស្ស៤០នាក់។ អ្នកទាំងពីរជាបណ្តាក្រុមឧទ្ទាម ឆេឆិន(Chechen)។ ហើយឆ្នាំ ២០០២ ក្រុមឧទ្ទាមឆេឆិននោះបានសម្លាប់មនុស្ស១៧០នាក់ដោយវាយប្រហារនិងចាប់មនុស្សនៅរោងភាពយន្តមួយស្ថិតនៅរដ្ឋធានីមូស្គូ៕
Tag:
St. Petersburg
រុស្ស៊ី
វ្ល៉ាឌីមៀ ពូទីន
Dmitry Medvedev
© រក្សាសិទ្ធិដោយ thmeythmey.com