អន្តរជាតិ
បារាំង៖ ពេទ្យធ្មេញម្នាក់កាត់ឆ្អឹងម្រាមដៃខ្លួនព្រោះចង់បានប្រាក់ធានារ៉ាប់រង ប៉ុន្តែត្រូវក្រុមហ៊ុនប្តឹងវិញ 07, Apr 2017 , 8:39 am
×
គ្រូពេទ្យធ្មេញជនជាតិបារាំងម្នាក់ដែលរស់នៅតំបន់ Cote d’Azur ប្រទេសបារាំង ត្រូវបានផ្តន្ទាទោស១៨ខែ ប៉ុន្តែឲ្យនៅក្រៅពន្ធនាគារ និងតម្រូវឲ្យសងជំងឺចិត្តទៅក្រុមហ៊ុនធានារ៉ាប់រង បន្ទាប់ពីតុលាការសង្កាត់ Grasse រកឃើញថា បុរសនោះ បានភូតភរទាក់ទងនឹងករណីរបួសម្រាមដៃស្តាំរបស់ខ្លួន។
រឿងរ៉ាវបានកើតឡើងតាំងពីខែឧសភា ឆ្នាំ២០១៤ ដោយលោក Philippe T. ដែលជាគ្រូពេទ្យធ្មេញ បានរាយការណ៍ថា គាត់បានរងគ្រោះបាក់ឆ្អឹងម្រាមដៃស្តាំ នៅពេលជួសជុលទ្វារនៅផ្ទះរបស់ខ្លួន។ លោក Michel Valiergue ដែលជាមេធាវី បានអះអាងប្រាប់ចៅក្រមថា កូនក្តីរបស់ខ្លួនបានបែកឆ្អឹងដៃ ដោយសាររណារអគ្គិសនី។
កាសែត Nice-Matin បានផ្សាយថា លោក Philippe T. បានទាមទារប្រាក់ប្រមាណ៣៦ម៉ឺនដុល្លារអាមេរិក ដោយសារតែគាត់បានទិញកញ្ចប់ធានារ៉ាប់រងយ៉ាងត្រឹមត្រូវ។ មេធាវី បានអះអាងថា បើទោះបីវា គ្រាន់តែជាការបាក់ឆ្អឹងម្រាមដៃក៏ដោយ ប៉ុន្តែវាត្រូវបានចាត់ទុកថា ជាគ្រោះថ្នាក់ដៃទាំងមូល ដែលក្រុមហ៊ុនធានារ៉ាប់រងត្រូវទទួលខុសត្រូវ។
លោក Michel Valiergue បានបញ្ជាក់បន្ថែមថា កូនក្តីរបស់ខ្លួន បានទិញធានារ៉ាប់រងជាច្រើនផ្នែក ជាពិសេសតួខ្លួនគាត់ ផ្ទះសម្បែង និងសេវាកម្មផ្សេងៗទៀត។ ក្រោយការស៊ើបអង្កេត ភាគីផ្នែកធានារ៉ាប់រង៤នាក់ បានរួមគ្នាប្តឹងបកទៅគ្រូពេទ្យធ្មេញ ពីបទក្លែងបន្លំ ហើយទាមទារសំណងជាង ៣៦ម៉ឺនដុល្លារអាមេរិក វិញ។
នៅក្នុងបន្ទប់សវនាការ មេធាវីម្នាក់របស់ភ្នាក់ងារធានារ៉ាប់រង បានអះអាងថា ការធ្វើបាបខ្លួនឯងដើម្បីទទួលបានប្រាក់ធានារ៉ាប់រងមិនមែនជារឿងថ្មីនោះឡើយ ដោយពួកគេធ្លាប់ជួបបទពិសោធន៍បែបនេះ ពីមុនមកហើយ។
តុលាការសង្កាត់ Grasse ដែលដឹកនាំដោយលោកចៅក្រម Pierre Kuentz បានសម្រេចផ្តន្ទាទោស លោក Philippe T. ពីបទក្លែងបន្លំ និងមានគម្រោងក្លែងបន្លំ ដោយផ្តន្ទាទោស១៨ខែ ប៉ុន្តែឲ្យនៅក្រៅពន្ធនាគារ និងតម្រូវឲ្យសងជំងឺចិត្តទៅក្រុមហ៊ុនធានារ៉ាប់រងប្រមាណ៣៦ម៉ឺនដុល្លារអាមេរិក។
មេធាវីរបស់លោក Philippe T. បានសម្រេចបន្តប្តឹងឧទ្ធរណ៍ ដោយអះអាងថា កូនក្តីរបស់ខ្លួន មិនមានគំនិតខិលខូចអ្វីឡើយ តែវាជាគ្រោះថ្នាក់ដែលកើតឡើងដោយចៃដន្យ ហើយក្រុមហ៊ុនធានារ៉ាប់រងត្រូវតែទទួលខុសត្រូវ៕
© រក្សាសិទ្ធិដោយ thmeythmey.com