អន្តរជាតិ
លោក ស៊ី-ត្រាំ ជួបគ្នាផឹកតែលំហែកាយនិងពិភាក្សាពីទំនាក់ទំនងទ្វេភាគីនៅរមណីយដ្ឋាន Mar-a-Lago 06, Apr 2017 , 5:28 pm
× ប្រមុខរដ្ឋចិនលោក ស៊ី ជិនពីង ជួបជាមួយប្រមុខរដ្ឋអាមេរិកលោក ដូណាល់ ត្រាំ ជាលើកដំបូង នៅថ្ងៃព្រហស្បតិ៍ទី ៦ ខែមេសានេះ។ ជំនួបដ៏សំខាន់ មិនចំលក្ខណៈផ្លូវការហើយមានលក្ខណៈលំហែកាយនេះរៀបចំឡើង រមណីយដ្ឋាន Mar-a-Lago នាក្រុង Palm Beach រដ្ឋ Florida។ មេដឹកនាំមហាអំណាចទាំងពីរនឹងចំណាយពេលជជែកពិភាក្សាលើបញ្ហាច្រើនមានទាំងសហប្រតិបត្តិការទ្វេភាគីលើផ្នែកសេដ្ឋកិច្ច ពាណិជ្ជកម្ម និងយោធា ក៏ដូចជាបញ្ហាសន្តិសុខតំបន់ដូចជាកូរ៉េខាងជើងថែមទៀតផង។
បន្ទាប់ពីចាកចេញពីហ្វាំងឡង់ ប្រធានាធិបតីចិនលោក ស៊ី ជិនពីង អញ្ជើញទៅដល់សហរដ្ឋអាមេរិកដើម្បីជួបជាមួយប្រធានាធិបតី ដូណាល់ ត្រាំ។ លោក ស៊ី ជិនពីង ត្រូវអមដំណើរដោយស្ត្រីទី ១ លោកស្រី Peng Liyuan ទៅជួបពិភាក្សាជាមួយលោក ដូណាល់ ត្រាំ នៅរមណីយ ដ្ឋាន Mar-a-Lago នាក្រុង Palm Beach រដ្ឋ Florida។
អ្វីដែលគួរឲ្យចាប់អារម្មណ៍ លោក ដូណាល់ ត្រាំ ក៏នឹងនាំភរិយាខ្លួនជាស្ត្រីទីមួយ Melania Trump ដែលរស់នៅក្រុងញូវយ៉កដើម្បីគ្រប់គ្រង Trump Tower ទៅជាមួយដើម្បីជួប ប្រធានាធិបតីចិននិងភរិយាផងដែរ។
១.ជំនួបមានលក្ខណៈលំហែរកាយ តែប្រធានបទសុទ្ធតែក្តៅ
វាជាពេលវេលាពិសេសព្រោះមេដឹកនាំទាំងពីរទើបតែអាចមានឱកាសជួបគ្នាជាលើកដំបូង ហើយអ្នកទាំងពីរអាចស្វែងយល់និងស្គាល់គ្នាបានច្បាស់លាស់ជាងឆ្លងឆ្លើយតាមទូរសព្ទដូចកន្លងមកនេះ។ មេដឹកនាំទាំងពីរ, ស្ត្រីទីមួយចិន និងអាមេរិក រួមទាំងមន្ត្រីជាន់ខ្ពស់នៃរដ្ឋាភិបាលទាំងពីរនឹងមានឱកាសផឹកតែ លំហែកាយ, បរិភោគអាហារថ្ងៃត្រង់ និងល្ងាចជុំគ្នាផងដែរក្នុងរយៈពេលពីរថ្ងៃនេះ។
ឧបការីរងរដ្ឋមន្ត្រីការបរទេសអាមេរិក Thornton បានថ្លែងក្នុងសន្និសីទសារព័ត៌មានថ្ងៃ ៥មេសាថា ជំនួបរវាងមេដឹកនាំចិន និងអាមេរិកនេះចាប់ផ្តើមនៅរសៀលថ្ងៃព្រហស្បតិ៍ទី ៦មេសា ហើយបន្តដោយកិច្ចប្រជុំជាបន្តបន្ទាប់រវាងមន្ត្រីជាន់ខ្ពស់នៃប្រទេសទាំងពីរនេះ។ ប្រធានបទនៃកិច្ចពិភាក្សាមានច្រើនក្នុងនោះមានទំនាក់ទំនងទ្វេភាគី បញ្ហាតំបន់ និងបញ្ហាប្រឈមក្នុងការអភិវឌ្ឍសម្ព័ន្ធភាពរវាងចិននិងអាមេរិកផងដែរ។
ជារួម ប្រធានបទនៃកិច្ចពិភាក្សាប្រហែលជាក្តៅនិងបរិយាយកាសប្រហែលជាអាប់អួរដូចគ្នា ប៉ុន្តែគេរំពឹងថា ប្រធានាធិបតីទាំងពីរនឹងអាចបង្កើតទំនាក់ទំនងស្និទ្ធស្នាលជាលក្ខណៈឯកជនផងដែរ ព្រោះ វាមិនមែនជាជំនួបផ្លូវការមែនហើយមានលក្ខណៈលំហែរកាយជាងជំនួបធម្មតា។ វាក៏នឹងក្លាយជាពេលវេលាដែលមេដឹកនាំអាមេរិកនិងចិនស្តារឡើងវិញនូវទំនាក់ទំនងល្អក់កករនិងតានតឹងកន្លងមកឲ្យប្រសើរឡើងវិញដែរ ថ្វីបើដូណាល់ ត្រាំ និងស៊ី ជិនពីង មានគំនិតផ្ទុយគ្នាលើបញ្ហាច្រើនដែរនោះ។
សេដ្ឋកិច្ចពាណិជ្ជកម្មរវាងអាមេរិក និងចិន ជាប្រធានបទសំខាន់ ដែលគូភាគីមិនអាចមិននិយាយឡើយ។ ប្រធានាធិបតីចិនប្រហែលជាសុំចិត្តឲ្យអាមេរិកបញ្ចៀសឲ្យបាននូវសង្គ្រាមពាណិជ្ជកម្មដែលគ្រប់គ្នាបារម្ភផង។ បញ្ហាសំខាន់នៅពេលនេះ គឺជំហររបស់ប្រមុខរដ្ឋអាមេរិកដែលយកវោហាស័ព្ទនយោបាយ «ដម្កល់ប្រយោជន៍អាមេរិកជាធំ» ។ប៉ុន្តែគេនៅរំពឹងថា អាមេរិក និងចិនក៏អាចនឹងបន្តបង្កើតវេទិកាពិភាក្សា ប្រឹក្សាយោបល់ដើម្បីបន្តត្រួសត្រាយផ្លូវដល់ការលើកស្ទួយចំណងពាណិជ្ជកម្ម និងសេដ្ឋកិច្ចរវាងមហាអំណាចសេដ្ឋកិច្ចទីមួយ និងទីពីរដែរនាពេលអនាគត។
២.កូរ៉េខាងជើង!!!!!!!
ប៉ុន្តែយ៉ាងណាមិញ បញ្ហានុយក្លេអ៊ែរកូរ៉េខាងជើង នឹងក្លាយប្រធានបទក្តៅនិងសំខាន់ជាងគេ។ ដូចឃើញស្រាប់ហើយ ជំនួបមេដឹកនាំទាំងពីរស្វាគមន៍ដោយការបាញ់សាកល្បងមីស៊ីលនាថ្ងៃអង្គារផ្គើនសហគមន៍អន្តរជាតិដែលរៀបចំឡើងដោយក្រុងព្យុងយ៉ាងនោះ។
គេឆ្ងល់ដែលថា តើលោក ដូណាល់ ត្រាំ និងលោក ស៊ី ជិនពីង នឹងជជែកអ្វីខ្លះក្នុងជំនួបនេះ និងអាចឈានទៅធ្វើអ្វីរួមគ្នាដើម្បីដោះស្រាយបញ្ហាកូរ៉េខាងជើង?
តាមស្ថានភាពបច្ចុប្បន្ន លោក ដូណាល់ ត្រាំ ទំនងជានឹងស្នើឲ្យប្រមុខរដ្ឋចិនដែលមានទឹកមាត់ប្រៃក្នុងសំណុំរឿងនុយក្លេអ៊ែរឧបទ្វីបកូរ៉េនោះ ជួយរិះរកវិធានការសមស្រប ឬអាចកំណត់វិធានការណាមួយដែលបង្កើតឡើងក្រោមការសហការរវាងអាមេរិកនិងចិនផងដើម្បីដោះស្រាយជាមួយកូរ៉េខាងជើង។
ប៉ុន្តែគេនៅចាំច្បាស់ថា កាលពីសប្តាហ៍មុន រដ្ឋបាល ដូណាល់ ត្រាំ បានប្រកាសហើយថា បើចិនមិនជួយដោះស្រាយ អាមេរិកនឹងធ្វើសកម្មភាពម្នាក់ឯង។ ធ្វើសកម្មភាពម្នាក់ឯងនេះ អាចជាការដាក់ទណ្ឌកម្ម ហើយបើធ្ងន់ធ្ងរជាងនេះគឺប្រើប្រាស់ទ័ពបង្ក្រាបក្រុងព្យុងយ៉ាងតែម្តង។ គេមើលឃើញដូច្នេះដោយសារតែក្រុងវ៉ាស៊ីនតោននិយាយម្តងហើយម្តងទៀតថា រាល់មធ្យោបាយទាំងអស់ស្ថិតនៅក្នុងជម្រើសរបស់ខ្លួនទាំងអស់រួមទាំងការប្រើប្រាស់កងទ័ពផង។ ប៉ុន្តែអាមេរិកចិត្តសឿងកម្រិតណានោះ គ្មានអ្នកណាអាចទស្សន៍ទាយបានឡើយ។
ខាងភាគីចិនវិញប្រហែលជាបង្ហាញជំហរជួយដោះស្រាយ ប៉ុន្តែវាច្បាស់ណាស់ថាលោក ស៊ី ជិនពីង នឹងតម្អូញប្រាប់មេដឹកនាំអាមេរិកពីក្តីកង្វល់របស់ខ្លួនពាក់ព័ន្ធរឿងមីស៊ីលអាមេរិក THADD ដែលដំឡើងនៅកូរ៉េខាងត្បូងផង។
រឿងមួយទៀតគឺបញ្ហាកោះតៃវ៉ាន់។ លោក ស៊ី ជិនពីន ប្រហែលជាស្នើសុំឲ្យអាមេរិករក្សាសម្តីនិងគោរពតាមរាល់សេចក្តីថ្លែងការណ៍ដែលខ្លួនបានចុះជាមួយចិនរឿង «គោរពគោលនយោបាយចិនតែមួយ»ផង។ ដូណាល់ ត្រាំ បានធ្វើឲ្យចិនខឹងក្តៅក្រហាយច្រើនដងព្រោះរឿងតៃវ៉ាន់នេះបន្ទាប់ពីខ្លួនជាប់ឆ្នោត។ ប៉ុន្តែដូណាល់ ត្រាំ ហាក់យល់ច្រើនថា គោលជំហរដែលមានតុល្យភាពរបស់អាមេរិកក្នុងបញ្ហាតៃវ៉ាន់សំខាន់កម្រិតណា ក្នុងការរក្សាប្រយោជន៍អាមេរិកដែលមានក្នុងទំនាក់ទំនងជាមួយចិនក៏ដូចជាពិភពលោកទាំងមូលផង៕
Tag:
ដូណាល់ ត្រាំ
ស៊ី ជិនពីង
Peng Liyuan
Melania Trum
© រក្សាសិទ្ធិដោយ thmeythmey.com