អន្តរជាតិ
នយោបាយអន្តរជាតិ
អគ្គមេបញ្ជាការកំពូលអាមេរិក ត្រាំ បញ្ជាឲ្យគេបាញ់មីស៊ីលជាង៥០គ្រាប់កំញើញរបបអាសាដ
07, Apr 2017 , 9:59 am
×![]()
អគ្គមេបញ្ជាការកំពូលកងទ័ពអាមេរិក ដូណាល់ ត្រាំ បានបញ្ជាឲ្យកងទ័ពអាមេរិកបាញ់ផ្លោងមីស៊ីលលើព្រលានយន្តហោះនៅក្រុង Homs ប្រទេសស៊ីរី ដើម្បីកំញើញរបបដឹកនាំលោកបាសា អាល់អាសាដ។ មីស៊ីលចំនួន ៥៩ គ្រាប់ត្រូវបានគេប្រើប្រាស់ក្នុងការវាយប្រហារនេះ ហើយអាមេរិកបញ្ជាក់ថា ខ្លួនបានប្រាប់រុស្ស៊ីមុនពេលវាយប្រហារដែរ។ 
ដូចការសន្យាមែនពាក់ព័ន្ធការចាត់វិធានការប្រឆាំងរបបស៊ីរី លោក ដូណាល់ ត្រាំ ដែលជាអគ្គមេបញ្ជាការកំពូលកងទ័ពអាមេរិកនោះបានបញ្ជាឲ្យកងទ័ពអាមេរិកបើកការវាយប្រហារលើព្រលានយន្តហោះក្រុង Homs ប្រទេសស៊ីរីដោយប្រើមីស៊ីលអស់ ៥៩គ្រាប់។ មន្ត្រីក្រុងវ៉ាស៊ីនតោន បានអះអាងថា ការបាញ់ផ្លោងមីស៊ីលនេះជាការឆ្លើយតបរបបដឹកនាំផ្តាច់ការលោក បាសា អាល់អាសាដ នៅស៊ីរីដែលប្រើប្រាស់អាវុធគីមី។
The Pentagon has released video of Tomahawk missiles launching in tonight’s Syria strike pic.twitter.com/6YfwB5il83 — BuzzFeed News (@BuzzFeedNews) April 7, 2017
ដល់យប់ថ្ងៃព្រហស្បតិ៍លោក ដូណាល់ ត្រាំ បានទទួលស្គាល់ជាផ្លូវការពាក់ព័ន្ធរឿងបាញ់មីស៊ីលប្រឆាំងស៊ីរីដែរ ហើយលោកក៏អំពាវនាវឲ្យប្រទេសទាំងអស់ចូលរួមបញ្ចប់ការបង្ហូរឈាមនៅស៊ីរីនិងរាល់ការធ្វើទុកបុកម្នេញសម្លាប់រង្គាលពលរដ្ឋស្លូតត្រង់នៅស៊ីរីដែរ។
.@POTUS Trump delivers statement on targeted, military strike on airfield in #Syria from where chemical attack was launched. pic.twitter.com/N54VvI88sc — Department of State (@StateDept) April 7, 2017
លោក ដូណាល់ ត្រាំ បានលើកឡើងដូច្នេះ៖ «ថ្ងៃអង្គារ របបដឹកនាំផ្តាច់ការរបស់ បាសា អាល់អាសាដ បានប្រើប្រាស់អាវុធគីមីដ៏សាហាវប្រឆាំងជនស៊ីវិលស្លូតត្រង់។ ការប្រើប្រាស់ឧស្ម័នពុលដ៏គ្រោះថ្នាក់នេះ អាសាដ ឆក់យកជីវិតបុរស ស្ត្រី និងក្មេងៗដែលគ្មានអ្វីការពារខ្លួន។ សូម្បីតែក្មេងតូចស្អាតក៏ត្រូវគេសម្លាប់ក្នុងការវាយប្រហារដ៏ព្រៃផ្សៃនេះដែរ»។
ពាក់ព័ន្ធការវាយប្រហារនេះមន្ត្រីក្រុងវ៉ាស៊ីនតោនបានប្រាប់ទីភ្នាក់ងារព័ត៌មាន AFP ថា គេបានប្រាប់ភាគីរុស្ស៊ីរួចរាល់ហើយមុនពេលចាប់ផ្តើមបាញ់ផ្លោងមីស៊ីលលើព្រលានយន្តហោះស៊ីរីនោះ។ ការបាញ់ផ្លោងនេះបានកម្ទេចផ្លូវ អាគារ និងយន្តហោះដែលចតនៅក្នុងព្រលានយន្តហោះផងដែរ ប៉ុន្តែមិនមានអ្នកស្លាប់ឬរបួសឡើយ។
នៅថ្ងៃព្រហស្បតិ៍ដដែល រដ្ឋមន្ត្រីការបរទេសអាមេរិកលោក Rex Tillerson ក៏បានបន្ទោសរុស្ស៊ីផងដែរថា មហាអំណាចនេះបរាជ័យក្នុងការអនុវត្តកិច្ចព្រមព្រៀងឆ្នាំ ២០១៣ដែលសំដៅដល់ការកម្ទេចអាវុធគីមីនៅស៊ីរីនិងទប់ស្កាត់ការប្រើប្រាស់អាវុធប្រភេទនេះ។ លោកបានបន្ថែមថារុស្ស៊ីសមគំនិតជាមួយអំពើរំលោភច្បាប់អន្តរជាតិនេះ ឬក៏អសមត្ថភាពក្នុងការបំពេញតាមកិច្ចព្រមព្រៀង៕
© រក្សាសិទ្ធិដោយ thmeythmey.com
