អន្តរជាតិ
អ្នកនេសាទអ៊ីតាលីម្នាក់យកគ្រាប់បែកទៅលក់នៅភោជនីយដ្ឋាន 08, Apr 2017 , 8:19 am
× អ្នកនេសាទជនជាតិអ៊ីតាលីម្នាក់ បានប្រទះឃើញគ្រាប់បែកមួយគ្រាប់នៅក្រោមបាតសមុទ្រ ដែលបន្សល់ទុកកាលពីសម័យសង្គ្រាមលោកលើកទីពីរ។ គាត់បានស្រង់គ្រាប់បែកនោះឡើងគោក ហើយបម្រុងយកវាទៅលក់នៅក្នុងភោជនីយដ្ឋានមួយ។ បុរសរូបនេះប្រឈមជាប់ពន្ធនាគារ៨ឆ្នាំ។
កាលពីពេលថ្មីកន្លងមកនេះ អ្នកនេសាទអ៊ីតាលីវ័យ៥៦ឆ្នាំម្នាក់ ដែលរស់នៅតំបន់ Gallipoli បានយកទំនិញដ៏គ្រោះថ្នាក់មួយទៅលក់នៅភោជនីយដ្ឋានមួយកន្លែង។ តាមពិតទៅមិនមែនជាត្រីដូចដែលគាត់លក់សព្វដងនោះឡើយ តែវាជាគ្រាប់បែកដ៏គ្រោះថ្នាក់ដែលបន្សល់ទុកពីសម័យសង្គ្រាមលោកលើកទីពីរ។
តាមការផ្សាយរបស់កាសែត Lecce Sette កាលពីថ្ងៃទី៣ ខែមេសា បុរសដែលមិនត្រូវបានបញ្ចេញអត្តសញ្ញាណនោះ បានលីគ្រាប់បែកដែលគាត់រកឃើញនៅក្នុងបាតសមុទ្រ យកទៅលក់នៅភោជនីយដ្ឋានមួយក្បែរឆ្នេរ Lido Conchiglie ដែលសម្បូរទេសចរបំផុត។
មនុស្សទាំងអស់ដែលបានឃើញមានការស្លន់ស្លោរយ៉ាងខ្លាំង ដោយមិនមានអ្នកហ៊ានចូលតថ្លៃនោះឡើយ ខណៈអ្នកខ្លះ បានលួចទាក់ទងទៅកម្លាំងមានសមត្ថកិច្ច។ បន្ទាប់ពីរកអតិថិជនមិនបាន អ្នកនេសាទបានកាន់ទំនិញដ៏គ្រោះថា្នក់ចេញពីភោជនីយដ្ឋានវិញ។
កងកម្លាំងមានសមត្ថកិច្ច បានរកឃើញអ្នកនេសាទ ប៉ុន្តែភ្លាមៗ គេមិនឃើញមានគ្រាប់បែកនៅក្នុងដៃនោះឡើយ។ ក្រោយមក សមត្ថកិច្ច បានសម្រេចរៀបចំទីតាំងពិសេសមួយដើម្បីបំផ្ទុះ បន្ទាប់ពីបានរកឃើញគ្រាប់បែកដ៏គ្រោះថ្នាក់នោះ។
អ្នកនេសាទអ៊ីតាលីវ័យ៥៦ឆ្នាំរូបនោះ នឹងត្រូវរងការចោទប្រកាន់ពីបទកាន់កាប់អាវុធខុសច្បាប់ ដែលត្រូវប្រឈមជាប់ពន្ធនាគាររយៈពេល៨ឆ្នាំ៕
Tag:
ប្លែកៗ
អ៊ីតាលី
គ្រាប់បែក
© រក្សាសិទ្ធិដោយ thmeythmey.com