អន្តរជាតិ
ចិន ថាខ្លួនខ្វល់ខ្វាយស្ថានការណ៍នៅឧបទ្វីបកូរ៉េខ្លាំងជាងអ្នកណាទាំងអស់ 07, Apr 2017 , 7:39 pm
អ្នកនាំពាក្យក្រសួងការបរទេស Hua Chunying (រូបភាព Xinhua)
× ភាពតានតឹងនៅឧបទ្វីបកូរ៉េ បានកើនឡើងគួរឲ្យព្រួយបារម្ភ ក្រោយអាមេរិក និងកូរ៉េខាងជើង ផ្ដោះផ្ដងសង្គ្រាមពាក្យសម្ដីដាក់គ្នាទៅវិញទៅមក។ ចិនឯណេះវិញ ក៏រងសម្ពាធច្រើនពីប្រទេសផ្សេង មានអាមេរិក និងជប៉ុនជាដើម ហើយថែមទាំងរងការរិះគន់ថាមិនបានជួយបន្ធូរបន្ថយស្ថានការណ៍អ្វីទេ។ ប៉ុន្តែចិនអះអាងថា ខ្លួនធ្វើការច្រើនណាស់លើបញ្ហាឧបទ្វីបកូរ៉េនេះ ហើយក៏គ្មាននរណាខ្វល់ខ្វាយបញ្ហាសាំញាំនេះជាងខ្លួនទៀតទេ។
ស្របពេលអាមេរិក និងកូរ៉េខាងជើង គំរាមវាយប្រហារគ្នាទៅវិញទៅមក ស្ថានភាពនៅឧបទ្វីបកូរ៉េ ក៏ធ្លាក់ចុះតាមអាកប្បកិរិយានៃភាគីពាក់ព័ន្ធ។ អាមេរិក កូរ៉េខាងត្បូង និងជប៉ុន ខំប្រឹងសម្ព័ន្ធភាពត្រីភាគីរបស់ខ្លួន តាមរយៈការធ្វើសមយុទ្ធយោធារួមគ្នា ដើម្បីសម្ញែងឥទ្ធិពលដាក់កូរ៉េខាងជើង។ លើសពីនេះ អាមេរិក ក៏សន្យាជាមួយជប៉ុនក្នុងការសន្យាបង្កើនកម្លាំងទ័ពប្រឆាំងកូរ៉េខាងជើង ហើយនាយករដ្ឋមន្ត្រី ស៊ីនហ្សូ អាបេ ក៏និយាយថា ជប៉ុននឹងតាមមើលសកម្មភាពឆ្លើយតបរបស់ចិនលើបញ្ហានេះដែរ។
យ៉ាងណាក្ដី ចិន ដែលជាអ្នកជិតខាងរបស់កូរ៉េខាងជើង នៅបន្តជំហរស្នើឲ្យភាគីពាក់ព័ន្ធរក្សាស្ថិរភាពក្នុងតំបន់ និងចៀសវាងធ្វើសកម្មភាពដែលនាំឲ្យឧបទ្វីបកូរ៉េធ្លាក់ចូលក្នុងជ្រោះគ្រោះថ្នាក់។ អ្នកនាំពាក្យក្រសួងការបរទេសចិន Hua Chunying និយាយថា ចិនប្រឹងប្រែងខ្លាំងណាស់ក្នុងជួយដោះស្រាយបញ្ហានុយក្លេអ៊ែរកូរ៉េខាងជើង ហើយចិនពិតជាជាព្រួយបារម្ភខ្លាំងជុំវិញការរាលដាលនៃភាពតានតឹងនៅទីនោះ។
ក្នុងសន្និសីទកាសែតថ្ងៃទី៦ ខែមេសា អ្នកនាំពាក្យរូបនេះសង្កត់ធ្ងន់ថា ជាប្រទេសមានព្រំដែនជាប់ឧបទ្វីបកូរ៉េ ចិនខ្វល់ខ្វាយនឹងស្ថានភាពយ៉ាប់យ៉ឺននៅទីនោះខ្លាំងជាងនរណាទាំងអស់។ ចិនក៏សង្ឃឹមដែរថា ឧបទ្វីបកូរ៉េ នឹងមានសន្តិភាព និងស្ថិរភាពមិនខាន ព្រោះចិនក៏ព្យាយាមបន្ថយកម្ដៅនៃភាពតានតឹងណាស់ដែរ។ អ្នកនាំពាក្យខាងលើបន្តថា ដើម្បីដោះស្រាយបញ្ហានេះ គឺត្រូវដោះស្រាយឫសគល់បញ្ហា និងការព្រួយបារម្ភរបស់ភាគីពាក់ព័ន្ធទាំងអស់។
បន្ថែមពីលើនោះ ចិន ក៏សន្យាធ្វើការជាមួយភាគីផ្សេងទៀត ដើម្បីរំសាយនុយក្លេអ៊ែរនៅឧបទ្វីបកូរ៉េ និងជំរុញឲ្យមានសន្តិភាពយូរអង្វែងនៅក្នុងតំបន់។ ការសន្យាដូចនេះ ទំនងជាការឆ្លើយតបនឹងការរិះគន់របស់អាមេរិក ដែលចោទចិនថាមិនជួយធ្វើអ្វីសោះ បើទោះជាមានឥទ្ធិពលខ្លាំងលើរបបដឹកនាំក្រុងព្យុងយ៉ាងក៏ដោយ។ នរណាក៏ដឹងដែរថា ចិនតែងជួយកូរ៉េខាងជើងរហូតមក ស្របពេលរដ្ឋក្រីក្រមួយនេះ រងទណ្ឌកម្មពីសហគមន៍អន្តរជាតិមិនឈប់ឈរ។
ការមិនសូវជួយរបស់ចិន ធ្វើឲ្យអាមេរិកអន់ចិត្តយ៉ាងខ្លាំង។ ប្រធានាធិបតី ដូណាល់ ត្រាំ ប្រកាសហើយថា អាមេរិកនឹងចាត់ការបញ្ហានុយក្លេអ៊ែរកូរ៉េខាងជើងតែម្នាក់ឯង បើចិនមិនព្រមជួយទេនោះ។ រដ្ឋបាលលោក ត្រាំ ពិតជាមិនស្ងប់ចិត្តទាល់តែសោះចំពោះអាកប្បកិរិយាទម្រន់របស់ចិនជុំវិញបញ្ហាកូរ៉េខាងជើង បើទោះជាអាមេរិកស្នើម្ដងជាពីរដងឲ្យជួយដាក់សម្ពាធលើរដ្ឋឯកោមួយនេះឲ្យបោះបង់កម្មវិធីនុយក្លេអ៊ែរក្ដី៕
Tag:
ចិន
ឧបទ្វីបកូរ៉េ
នុយក្លេអ៊ែរ
ជប៉ុន
អាមេរិក
© រក្សាសិទ្ធិដោយ thmeythmey.com