អន្តរជាតិ
Brexit៖ នាយករដ្ឋមន្ត្រី May ជួបប្រធានក្រុមប្រឹក្សាអឺរ៉ុប និយាយគ្នារឿងលែងលះ 07, Apr 2017 , 8:39 pm
នាយករដ្ឋមន្ត្រីចក្រភពអង់គ្លេស Theresa May ទទួលប្រធានក្រុមប្រឹក្សាអឺរ៉ុប Donald Tusk នៅការិយាល័យ 10 Donwing Street (រូបភាពហ្វេសប៊ុក 10 Downing Street)
× ប្រធានក្រុមប្រឹក្សាអឺរ៉ុប Donald Tusk បានទៅជួបនាយករដ្ឋមន្ត្រីចក្រភពអង់គ្លេស Theresa May ដល់ 10 Downing Street ដើម្បីពិភាក្សារឿងការចរចាចាកចេញពីសហភាពអឺរ៉ុប។ នេះជាជំនួបទល់មុខលើកដំបូងរវាងមេដឹកនាំអង់គ្លេស និងសហភាពអឺរ៉ុប ចាប់តាំងពីនាយករដ្ឋមន្ត្រី May បានអនុវត្តតាមមាត្រា៥០ សន្ធិសញ្ញា Lisbon កាលពីថ្ងៃទី២៩ មីនា។ ជំនួបនេះ ផ្ដោតសំខាន់លើរយៈពេលនៃការចរចាលែងលះ ព្រោះមាត្រា៥០ នេះ ទុកពេលឲ្យតែ២ឆ្នាំប៉ុណ្ណោះ មុនអង់គ្លេសចាកចេញផ្លូវការ។
នាយករដ្ឋមន្ត្រី Theresa May បានគោះកណ្ដឹងប្រាប់សហភាពអឺរ៉ុបរួចហើយ ពីរឿងចាកចេញរបស់ ចក្រភពអង់គ្លេស។ ភ្លាមៗនោះ សហភាពអឺរ៉ុប ក៏ចាប់ផ្ដើមបង្កើតលក្ខខណ្ឌជាច្រើនត្រៀមយកទៅចរចាជាមួយអង់គ្លេស បន្ទាប់ពីសមាជិកសហភាព២៧ផ្សេងទៀត យល់ព្រមលើលក្ខខណ្ឌទាំងនេះក្នុងកិច្ចប្រជុំខែនេះ។ ចំណែកអង់គ្លេស ក៏បានប្រកាសជំហរចរចា និងអ្វីដែលខ្លួនចង់បានរួចរាល់ដែរ ប៉ុន្តែមានចំណុចផ្ទុយគ្នាពីជំហររបស់អឺរ៉ុប ដែលអាចបណ្ដាលឲ្យការចរចាជួបបញ្ហាមិនខាន។
នៅថ្ងៃទី៦ ខែមេសា នាយករដ្ឋមន្ត្រី May បានទទួលប្រធានក្រុមប្រឹក្សាអឺរ៉ុប Donald Tusk នៅការិយាល័យលោកស្រី ដើម្បីជជែកគ្នាលើការចរចាលែងលះ។ អង់គ្លេស និងសហភាពអឺរ៉ុប មានពេល២ឆ្នាំក្នុងការចរចាលក្ខខណ្ឌចែកផ្លូវគ្នា ហើយអង់គ្លេសចង់ឲ្យការចរចាចែកផ្លូវនេះ ធ្វើឡើងស្របគ្នានឹងការចរចាស្ដីពីទំនាក់ទំនងទ្វេភាគីតែម្ដង។ អង់គ្លេស ចង់ចរចារឿងពាណិជ្ជកម្មឲ្យហើយ ដើម្បីចៀសវាងការចំណាយច្រើនពេលក្រោយ។
ប៉ុន្តែការចង់បានរបស់អង់គ្លេស ត្រូវសហភាពអឺរ៉ុបបដិសេធ ដ្បិតរដ្ឋសមាជិកអឺរ៉ុបចង់ឲ្យការចរចាលែងលះចប់សិន មុននឹងនិយាយរឿងផ្សេងទៀត។ ក្នុងសេចក្ដីព្រាងលក្ខខណ្ឌចរចាដែលផ្ដួចផ្ដើមដោយលោក Tusk អឺរ៉ុបអាចនិយាយរឿងទំនាក់ទំនងអនាគតជាមួយអង់គ្លេស លុះត្រាតែអង់គ្លេសចាកចេញសិន។ បើរាប់ពីខែមីនា ឆ្នាំ២០១៧ អង់គ្លេសនឹងចាកចេញនៅខែដដែលនេះ ឆ្នាំ២០១៩ ។ ដូចនេះហើយបានជានាយករដ្ឋមន្ត្រី May ចង់ចរចាទាំង២ផ្លូវ។
ក្នុងជំនួបទល់មុខលើកដំបូងនេះ នាយករដ្ឋមន្ត្រី May និងប្រធានក្រុមប្រឹក្សាអឺរ៉ុប បានផ្ដោតការយកចិត្តទុកដាក់លើពេលវេលានៃការចរចា ជាជាងបញ្ហាដទៃទៀត។ ពេលវេលាចរចា ជារឿងសំខាន់ មុននឹងចាប់ផ្ដើមការចរចាផ្លូវការ ព្រោះរយៈពេល២ឆ្នាំដែលកំណត់ដោយមាត្រា៥០ សន្ធិសញ្ញា Lisbon ជារយៈពេលខ្លី ហើយបញ្ហាត្រូវចរចាមានច្រើនរាប់ទាំងទំនាក់ទំនងពាណិជ្ជកម្ម, សិទ្ធិប្រជាជនអឺរ៉ុបរស់នៅអង់គ្លេស និងបញ្ហាច្បាប់ជាដើម។
សភាអឺរ៉ុប ឯកភាពលើផែនការចរចាជាមួយចក្រភពអង់គ្លេស
នៅជំនួបរវាងលោកស្រី May និងលោក Tusk មួយថ្ងៃ សមាជិកសភាសហភាពអឺរ៉ុប បានលើបោះឆ្នោតយល់ព្រមដោយសំឡេងភាគច្រើនលើផែនការត្រៀមចរចាជាមួយចក្រភពអង់គ្លេស ដែលលើកឡើងដោយប្រធានអ្នកចរចាអឺរ៉ុប Guy Verhofstadt ។ ផែនការនេះ គឺជាគោលការណ៍របស់សមាជិកអឺរ៉ុប២៧ប្រទេស ក្នុងការចរចាលែងលះ។
ផែនការនេះ អាចចាត់ទុកជាបន្ទាត់ក្រហម ឬលក្ខខណ្ឌដែលអឺរ៉ុបចង់បានពីអង់គ្លេស។ សភាអឺរ៉ុប ចង់ឲ្យអង់គ្លេសបង់ប្រាក់ចំនួន៦៤ពាន់លានដុល្លារ ដែលខ្លួនត្រូវបង់មុនពេលចាកចេញ ព្រោះអំឡុងពេលចរចានេះ អង់គ្លេសនៅតែជាសមាជិកអឺរ៉ុបដដែល។ សភាអឺរ៉ុប ក៏យល់ព្រមឲ្យមានការចរចាជាដំណាក់កាល ដោយមិនត្រូវចរចាលើបញ្ហាផ្សេងគ្នាក្នុងពេលតែមួយឡើយ បើទោះជាការចរចាមានត្រឹម២ឆ្នាំក៏ដោយចុះ។
ជាងនេះទៅទៀត សភាអឺរ៉ុប ក៏ព្រមានដែរថា ការចរចាលែងលះនេះ នឹងមិនមានការដោះដូរផលប្រយោជន៍សន្តិសុខ ជាមួយនឹងទំនាក់ទំនងពាណិជ្ជកម្មឡើយ។ សហភាពអឺរ៉ុប ដែលប្រឈមមុខបញ្ហារួបរួមគ្នាដោយសរការចាកចេញរបស់អង់គ្លេស ហាក់មានជំហរតឹងរ៉ឹងរឿងចរចានេះ និងបានដាក់លក្ខខណ្ឌច្រើនទៀតផង។ ខណៈការចរចាមិនទាន់ចាប់ផ្ដើមផ្លូវការផងនោះ ភាគីទាំង២ មានជំហរមិនត្រូវគ្នាលើបញ្ហាជាច្រើនស្រេចទៅហើយ៕
Tag:
Brexit
Theresa May
Donald Tusk
អឺរ៉ុប
© រក្សាសិទ្ធិដោយ thmeythmey.com