អន្តរជាតិ
ដូណាល់ ត្រាំ ប្រើវិធីសាស្ត្រព្រួញមួយបាញ់សត្វពីរ «ដោយសំពងស៊ីរីគំរាមកូរ៉េខាងជើង»? 07, Apr 2017 , 10:39 pm
× លោក ដូណាល់ ត្រាំ បានឆ្លៀតឱកាសប្រាប់សមភាគីចិនលោកស៊ី ជិនពីង ដោយផ្ទាល់ពីការប្រើប្រាស់កម្លាំងទ័ពប្រឆាំងស៊ីរី ពេលអ្នកទាំងពីរទទួលទានអាហារល្ងាចជាមួយជុំគ្នានាល្ងាចថ្ងៃព្រហស្បតិ៍ទី ៧ មេសា នៅរមណីយដ្ឋាន Mar-a-Lago។ អ្នកជំនាញមើលឃើញថា ប្រធានាធិបតីអាមេរិកបញ្ជាទ័ពឲ្យវាយស៊ីរីនៅពេលនេះជាយុទ្ធសាស្ត្រមួយដែលគំរាមស៊ីរីផង និងផ្ញើសារឲ្យក្រុងប៉េកាំងដែលជួយការពារក្រុងព្យុងយ៉ាងផងថា អាមេរិកក្រោមការដឹកនាំរបស់លោក ដូណាល់ ត្រាំ មិនរារែកនឹងប្រើកម្លាំងឡើយឲ្យតែចាំបាច់។ ហើយវារឹតតែមានទម្ងន់ទៀតតព្រោះលោក ត្រាំ បានគំរាមប្រើវិធានការឯកតោភាគីដើម្បីដោះស្រាយបញ្ហាកូរ៉េខាងជើងដោយគ្មានចិនរួចហើយ។
ពេលយន្តហោះទៅដល់ក្រុង Palm Beach នាថ្ងៃព្រហស្បតិ៍ ប្រធានាធិបតីចិន ស៊ី ជិនពីង ត្រូវបានទទួលស្វាគមន៍ដោយរដ្ឋមន្ត្រីការបរទេសអាមេរិកលោក Rex Tillerson ហើយមិនត្រឹមតែប៉ុណ្ណោះលោកក៏ទទួលបានការស្វាគមន៍យ៉ាងកក់ក្តៅពីសំណាក់ក្រុមគាំទ្រផង និងក្រុមបាតុករប្រឆាំងលោកមានប្រជាជនចិនផង, ទីបេផងនិងវៀតណាមផងដែរ។ បាតុករទិតៀនរបបដឹកនាំចិនដែលរំលោភបំពានសិទ្ធិមនុស្ស ហើយបាតុករបីនាក់ត្រូវបានចាប់ខ្លួនដោយសារតែពួកគេរត់សំដៅក្បួនរថយន្តរបស់ប្រធានាធិបតីចិន។
ទោះជាយ៉ាងណាក៏ដោយ ជំនួបលើកដំបូងនេះហាក់មានភាពល្អប្រសើរ ដោយមេដឹកនាំទាំងពីរនាក់បង្ហាញភាពស្និទ្ធស្នាលដាក់គ្នា។ ស្ត្រីទីមួយអាមេរិកលោកស្រី Melania Trump និងស្ត្រីទីមួយចិនលោកស្រី Peng Liyuan សុទ្ធតែមានវត្តមាននៅក្នុងជំនួបប្រវត្តិសាស្ត្រនេះដែរ។ មេដឹកនាំទាំងពីរបានបរិភោគអាហារពេលល្ងាចជុំគ្នា ដោយលោក ត្រាំ បាននិយាយពេញៗមាត់ថា មិត្តភាពរវាងលោក និងលោក ស៊ី វិវត្តទៅរកភាពប្រសើរឡើង ទោះជាកន្លងមកលោករិះគន់ចិនមិនសំចៃមាត់ក៏ដោយ។
អ្វីដែលគួរឲ្យសាទរនោះ គឺប្រធានាធិបតីចិន អញ្ជើញលោក ត្រាំ ទៅទស្សនកិច្ចនៅចិន ដោយលោក ត្រាំ ទទួលយកការអញ្ជើញនេះដោយរីករាយ។ ប៉ុន្តែកាលបរិច្ឆេទនៃការទស្សនកិច្ចនេះមិនទាន់មានការកំណត់ជាផ្លូវការនៅឡើយទេ។
ក្នុងជំនួបលើកដំបូងរវាងមេដឹកនាំអាមេរិក និងចិននេះជាក្តីរំពឹងមួយសម្រាប់ពិភពលោកព្រោះត្រាំ និងស៊ី អាចនឹងបញ្ចៀសសង្គ្រាមពាណិជ្ជកម្ម និងសហការគ្នាដោះស្រាយបញ្ហាពិភពលោកផងដែរ។ ថ្វីបើប្រធានបទសំខាន់មានច្រើនក្នុងជំនួបពីរថ្ងៃរវាងលោក ដូណាល់ ត្រាំ និងលោក ស៊ី ជិនពីង មានច្រើនក៏ដោយ ការប្រើប្រាស់កម្លាំងយោធាព្រមានរបបដឹកនាំស៊ីរីដោយបាញ់មីស៊ីលផ្លោងនោះគ្របដណ្តប់កិច្ចពិភាក្សា ទាំងមូល។
១.មីស៊ីលបាញ់ផ្លោងចូលស៊ីរី ចំពេល ស៊ី ជិនពីង និងដូណាល់ ត្រាំ បរិភោគអាហារល្ងាចជុំគ្នា
តាមពិតទៅ លោក ដូណាល់ ត្រាំ បញ្ជាឲ្យគេបាញ់ផ្លោងមីស៊ីលចូលដីស៊ីរីនោះមុនពេលដែលលោកបរិភោគអាហារល្ងាចជាមួយប្រធានាធិបតី ស៊ី ជិនពីង ហើយកងទ័ពអាមេរិកបាញ់មីស៊ីលនោះចំពេលដែលមេដឹកនាំទាំងពីរកំពុងបរិភោគអាហាល្ងាចជុំគ្នាផង។
ឆ្លៀតក្នុងការឱកាសនោះ លោក ដូណាល់ ត្រាំ បានប្រាប់ដំណឹងពាក់ព័ន្ធការបាញ់មីស៊ីលដោយផ្ទាល់ទៅកាន់លោក ស៊ី ជីនពីងក្នុងពេលហូបអាហារល្ងាចនោះតែម្តង។ មន្ត្រីក្រុងវ៉ាស៊ីនតោនបានអះអាងថា អាមេរិកបានផ្តល់ដំណឹងទៅឲ្យដៃគូច្រើនដែរ រួមទាំងរុស្ស៊ីផងដែរដើម្បីកុំឲ្យមានការភ្ងាក់ផ្អើល។
មេដឹកនាំចិនប្រហែលជាទើសទាល់ខ្លះដែរ ព្រោះចិននិងរុស្ស៊ីតែប្រើសិទ្ធិវេតូជំទាស់ដំណោះស្រាយណាដែលថ្កោលទោសរបបដឹកនាំស៊ីរី។ ប៉ុន្តែដោយហេតុផលចង់បង្កើតទំនាក់ទំនាក់ទំនងល្អជាមួយក្រុងវ៉ាស៊ីនតោនផង ក្រុងប៉េកាំងមិនបញ្ចេញប្រតិកម្មឡើយពាក់ព័ន្ធការប្រើកម្លាំងទ័ពរបស់លោក ដូណាល់ ត្រាំ នៅស៊ីរី ខណៈដែលលោក ពូទីន ថ្កោលទោសអាមេរិមនិងកោះប្រជុំក្រុមប្រឹក្សាសន្តិសុខថែមទៀត។
ក្រសួងការបរទេសចិនមិនបានថ្កោលទោសឬរិះគន់សកម្មភាពក្រុងវ៉ាស៊ីនតោនដូចសព្វដងឡើយ ទោះជាអាមេរិកបំពានអធិបតេយ្យនិងប្រើប្រាស់យោធាទាំងកំរោលនៅស៊ីរីក៏ដោយ។ ផ្ទុយទៅវិញ មហាយក្សចិនគ្រាន់តែថ្កោលទោសការប្រើប្រាស់អាវុធគីមី នៅស៊ីរីប៉ុណ្ណោះ។
២.ព្រួញមួយបាញ់សត្វពីរ៖ វាយស៊ីរីគំរាមកូរ៉េខាងជើង
ដោយឡែក ថ្ងៃសុក្រទី ៧ខែមេសានេះ មេដឹកនាំទាំងពីរនឹងជជែកគ្នាពាក់ព័ន្ធបញ្ហានុយក្លេអ៊ែរកូរ៉េខាងជើងដែលជាប្រធានបទស្នូល។ តាមស្ថានភាពបច្ចុប្បន្ន លោក ដូណាល់ ត្រាំ ទំនងជានឹងស្នើឲ្យប្រមុខរដ្ឋចិនដែលមានទឹកមាត់ប្រៃក្នុងសំណុំរឿងនុយក្លេអ៊ែរឧបទ្វីបកូរ៉េនោះ ជួយរិះរកវិធានការសមស្រប ឬអាចកំណត់វិធានការណាមួយដែលបង្កើតឡើងក្រោមការសហការរវាងអាមេរិកនិងចិនផងដើម្បីដោះស្រាយជាមួយកូរ៉េខាងជើង។
នៅចាំច្បាស់ថា កាលពីសប្តាហ៍មុន រដ្ឋបាល ដូណាល់ ត្រាំ បានប្រកាសហើយថា បើចិនមិនជួយដោះស្រាយ អាមេរិកនឹងធ្វើសកម្មភាពម្នាក់ឯង។ ធ្វើសកម្មភាពម្នាក់ឯងនេះ អាចជាការដាក់ទណ្ឌកម្ម ហើយបើធ្ងន់ធ្ងរជាងនេះគឺប្រើប្រាស់ទ័ពបង្ក្រាបក្រុងព្យុងយ៉ាងតែម្តង។ គេមើលឃើញដូច្នេះដោយសារតែក្រុងវ៉ាស៊ីនតោននិយាយម្តងហើយម្តងទៀតថា រាល់មធ្យោបាយទាំងអស់ស្ថិតនៅក្នុងជម្រើសរបស់ខ្លួនទាំងអស់រួមទាំងការប្រើប្រាស់កងទ័ពផង។ កន្លងមកគេនៅចោទសួរថា តើអាមេរិកចិត្តសឿងកម្រិតណាក្នុងការប្រើប្រាស់កងទ័ពប្រឆាំងក្រុងព្យុងយ៉ាងនោះ។
ដូច្នេះ ជាមួយការបាញ់មីស៊ីលផ្លោងចូលស៊ីរី គេអាចមើលឃើញថា ត្រាំ ទះកំភ្លៀងក្រុងម៉ូស្គូផង កំញើញរបបដឹកនាំក្រុងដាម៉ាសផង និងក្រើនរម្លឹកក្រុងប៉េកាំងនិងព្យុងយ៉ាងផងដែរ។
ជារួម ប្រធានាធិបតី ដូណាល់ ត្រាំ មានគោលបំណងផ្ញើសារមួយទៅកាន់ក្រុងប៉េកាំងផង និងក្រុងព្យុងយ៉ាងផងថា អាមេរិកមិននិយាយបានតែមាត់ឡើយ។ វាមានន័យថា បើដូណាល់ ត្រាំ គំរាមហើយ គឺមានន័យថា ដូណាល់ ត្រាំ ប្រាកដជានឹងធ្វើ។
តិចឬច្រើន វាជាជួងដាស់មហាយក្សចិនឲ្យពិចារណាសារជាថ្មីពាក់ព័ន្ធចំណាត់ការដែលចិនអាចដាក់ចេញដើម្បីជួយដោះស្រាយបញ្ហាកូរ៉េខាងជើង បើមិនចង់ឃើញអាមេរិកប្រើធម៌ក្តៅបង្ក្រាបកូរ៉េខាងជើងជំនួសចិន។
ពាក់ព័ន្ធបញ្ហានេះ សាស្ត្រាចារ្យវិទ្យាសាស្ត្រនយោបាយ Zhang Baohui បានថ្លែងប្រាប់សារព័ត៌មាន CNN ថា ការវាយប្រហារលើវាលយន្តហោះស៊ីរី ជាការពង្រឹងអំណាចចរចារបស់អាមេរិក។ វាមិនមែនពាក់ព័ន្ធជំនួបរវាងលោក ត្រាំ និងលោក ស៊ី ទេ ប៉ុន្តែវាសារមួយសម្រាប់ឲ្យក្រុងប៉េកាំងពិចារណាចំពោះការឈានទៅប្រើប្រាស់យោធាវាយប្រហារកូរ៉េខាងជើងមុននៅពេលណាមួយ។
យ៉ាងណាមិញ សារព័ត៌មានរដ្ឋចិន Global Times បានចុះផ្សាយបទវិចារណកថាមួយដោយរិះគន់លោក ដូណាល់ ត្រាំ និងហៅការបាញ់មីស៊ីលរបស់អាមេរិកចូលដីស៊ីរីថាជាការ «បង្អួតកម្លាំង»។
បទវិចារណកថានោះបានបញ្ជាក់ដូច្នេះថា៖ «វាជាការសម្រេចចិត្តមួយដ៏ធំលើកិច្ចការអន្តរជាតិ ហើយវិធានការដ៏កាចរបស់លោក ដូណាល់ ត្រាំ ធ្វើឲ្យមនុស្សជាច្រើនចាប់អារម្មណ៍ខ្លាំង។ លោកត្រាំ ចង់បង្ហាញទៅមនុស្សគ្រប់គ្នាថា លោកហ៊ានធ្វើអ្វីដែលលោក អូបាម៉ា មិនហ៊ានធ្វើ។ គាត់ចង់បង្ហាញទៅពិភពលោកផងដែរថា លោកមិនមែនប្រធានាធិបតីចេះតែធ្វើជំនួញទេ។ ត្រាំនឹងប្រើប្រាស់ទ័ពដោយគ្មានស្ទាក់ស្ទើរឡើយឲ្យតែចាំបាច់»៕
Tag:
ដូណាល់ ត្រាំ
ស៊ី ជិនពីង
ស៊ីរី
Mar-a-Lago
© រក្សាសិទ្ធិដោយ thmeythmey.com