អន្តរជាតិ
រុស្ស៊ីបញ្ចូននាវាចម្បាំងទៅកាន់កន្លែងនាវាចម្បាំងអាមេរិកផ្លោងមីស៊ីលចូលទឹកដីស៊ីរី 08, Apr 2017 , 11:18 am
× រុស្ស៊ីពង្រាយនាវាចម្បាំងទំនើបបន្ថែមទៅកាន់ភាគខាងកើតសមុទ្រមេឌីទែរ៉ាណេ ដែលស្ថិតនៅកន្លែងនាវាចម្បាំងអាមេរិកបាញ់ផ្លោងមីស៊ីលចូលកម្ទេចមូលដ្ឋានទ័ពអាកាសស៊ីរីនៅល្ងាចថ្ងៃព្រហស្បតិ៍នោះ។ រុស្ស៊ីក៏បានពង្រឹងការការពារដែនអាកាសផងដែរដើម្បីទប់ស្កាត់និងការពារសុវត្ថិភាពសព្វាវុធនិងកងទ័ពខ្លួនដែលកំពុងបំពេញប្រតិបត្តិការនៅស៊ីរី។
នាវាចម្បាំងដ៏ទំនើបរបស់រុស្ស៊ី Admiral Grigorovich បានធ្វើដំណើរចេញពីកំពង់ផែ Sevatopol នៃឧបទ្វីប Crimea និងធ្វើដំណើរឆ្ពោះទៅកាន់ទីតាំងដែលនាវាចម្បាំងអាមេរិក USS Porter និង USS Ross។ នាវាចម្បាំងអាមេរិកទាំងពីរគ្រឿងនេះហើយដែលបានបាញ់ផ្លោងមីស៊ីលចូលស្រោចលើមូលដ្ឋានទ័ពស៊ីរីនៅក្រុង Homs នៅល្ងាចថ្ងៃព្រហស្បតិ៍តាមបញ្ជារបស់លោក ដូណាល់ ត្រាំនោះ។
យោងតាមទីភ្នាក់ងារព័ត៌មានរុស្ស៊ី TASS នាវាចម្បាំងរបស់រុស្ស៊ី Admiral Grigorovich នេះបានធ្វើដំណើរទៅកាន់តំបន់សមុទ្រមេឌីទែរ៉ាណេ ជាទីកន្លែងដែលនាវាចម្បាំងអាមេរិកស្ថិតនៅ។ ហើយនាវាចម្បាំងគីឡូធ្ងន់នេះ មានបំពាក់សព្វាវុធច្រើននិងទំនើបៗក្នុងនោះមានមីស៊ីល Kalibr ដែលមានរយៈចម្ងាយឆ្ងាយផងដែរ។ នាវាមានទម្ងន់ ៤០០០តោននេះចូលសំចតនៅមូលដ្ឋានទ័ពជើងទឹករបស់រុស្ស៊ីនៅក្រុង Tartus។
អាជ្ញាធរតួកគីបានទទួលស្គាល់ថា នាវារុស្ស៊ីនេះបានធ្វើដំណើរឆ្លងកាត់តាមដែនទឹកអន្តរជាតិជិតប្រទេសខ្លួនមែន។ ហើយនាវាចម្បាំង Admiral Grigorovich ទើបតែចូលរួមក្នុងសមយុទ្ធមជាមួយតួកគីផងដែរ។
ការបញ្ជូននាវាចម្បាំងទំនើបនេះទៅកាន់ស៊ីរីជាការបង្ហាញសាច់ដុំយោធាឆ្លើយតបនឹងការវាយប្រហាររបស់អាមេរិកលើមូលដ្ឋានទ័ពស៊ីរី។ ក្រៅពីបង្ហាញសាច់ដុំ កងទ័ពរុស្ស៊ីក៏ព្យួរកិច្ចព្រមព្រៀងដែលសម្រួលការទាក់ទងគ្នារវាងកងទ័ពអាកាសប្រទេសទាំងពីរនៅស៊ីរីដើម្បីបញ្ចៀសការប៉ះទង្គិចគ្នាពេលបំពេញប្រតិបត្តិការផងដែរ។
ប្រធានាធិបតីរុស្ស៊ីលោក វ្ល៉ាឌីមៀ ពូទីន បានហៅសកម្មភាពយោធាឯកតោភាគីរបស់រដ្ឋបាលលោក ដូណាល់ ត្រាំ ថាជាសកម្មភាពឈ្លានពានយ៉ាងកំរោលប្រឆាំងរដ្ឋសមាជិកអង្គការសហប្រជាជាតិ។ លោកបានកោះប្រជុំក្រុមប្រឹក្សាសន្តិសុខបន្ទាន់ផងដើម្បីពិភាក្សាជជែកដេញដោលគ្នារឿងអាមេរិកវាយប្រហារស៊ីរីនេះ។
ក្រៅពីបញ្ជូនាវាចម្បាំងទៅកាន់សមុទ្រមេឌីទែរ៉ាណេ ក្រុងម៉ូស្គូបានប្រកាសថា អង្គភាពការពារដែនអាកាសខ្លួនដែលកំពុងឈរជើងនៅស៊ីរីប្រុងជើងការ ២៤ ម៉ោងដើម្បីការពារសព្វាវុធ ភ័ស្តុភារ និងកងទ័ពរុស្ស៊ីនៅស៊ីរី។ អ្នកនាំពាក្យក្រសួងការពារជាតិរុស្ស៊ីបានអះអាងថា ប្រព័ន្ធការពារមីស៊ីលមួយក្រុមត្រូវបានពង្រាយទៅការពារសុវត្ថិភាពកងទ័ពរុស្ស៊ីនិងយន្តហោះចម្បាំងនៅមូលដ្ឋានទ័ពអាកាស Hmeymim ហើយមួយក្រុមទៀតនៅឈរជើងការពារមូលដ្ឋានផ្ទុកភ័ស្តុភារកងទ័ពជើងទឹករុស្ស៊ីនៅ Tartus។ ប្រព័ន្ធការពារដែនអាកាសមាន S-400, S-300 និងប្រព័ន្ធផ្សេងទៀតផងនោះត្រូវបានពង្រាយទៅកាន់ប្រទេសស៊ីរីតាំងពីខែវិច្ឆិកាឆ្នាំ ២០១៥ម្ល៉េះ ក្រោយពេលកងទ័ពអាកាសតួកគីបាញ់ទម្លាក់យន្តហោះ Su-24 របស់រុស្ស៊ីដែលហោះហើរនៅព្រំដែនតួកគីនិងស៊ីរី។
Tag:
Admiral Grigorovich
ដូណាល់ ត្រាំ
ស៊ីរី
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com