អន្តរជាតិ
រុស្ស៊ីប្រកាសថា ប្រព័ន្ធការពារអាកាសខ្លូនប្រុងជើងការ ២៤ម៉ោងនៅស៊ីរី 08, Apr 2017 , 9:59 pm
× ក្រសួងការពារជាតិរុស្ស៊ីបានបញ្ជាក់ថា ប្រព័ន្ធការពារមីស៊ីលមានទាំង S-300, S-400 និង ប្រព័ន្ធផ្សេងទៀតនៅឈរជើង ២៧ ម៉ោងក្នុងមួយសប្តាហ៍ដើម្បីការពារកងទ័ពអាកាសរុស្ស៊ីនៅមូលដ្ឋានទ័ព Hmeymim។ រុស្ស៊ីយល់ថា វាក៏ជាពេលដែលត្រូវបង្កើនសមត្ថភាពការពារដែនអាកាសរបស់ស៊ីរីដើម្បីរក្សាសន្តិសុខនិងសុវត្ថិភាព។
ការវាយប្រហាររបស់អាមេរិកលើមូលដ្ឋានទ័ពអាកាសស៊ីរីនៅក្រុងHoms នៅល្ងាចថ្ងៃព្រហស្បតិ៍បង្កឲ្យរុស្ស៊ីខឹងសម្បារខ្លាំង។ រុស្ស៊ីហៅការវាយបាញ់ផ្លោងមីស៊ីលរបស់អាមេរិកលើទឹកដីស៊ីរីមិនខុសអ្វីពីការឈ្លានពានរំលោភអធិបតេយ្យរដ្ឋសមាជិកអង្គការសហប្រជាជាតិឡើយ។
ក្រៅពីនេះរុស្ស៊ីបានបង្កើនសមត្ថភាពការពារអាកាសនៅស៊ីរីផងដែរដើម្បីត្រៀមទប់ស្កាត់ក្រែងមានការវាយប្រហារកើតឡើងជាថ្មីទៀត។ ពាក់ព័ន្ធបញ្ហានេះ ក្រសួងការពារជាតិរុស្ស៊ីបានថ្លែងបញ្ជាក់ថា អង្គភាពប្រព័ន្ធការពារដែនអាកាសរុស្ស៊ីដែលនៅឈរជើងនៅស៊ីរីប្រុងជើងការគ្រប់ពេលវេលាពោលគឺ ២៤ម៉ោងក្នុងមួយសប្តាហ៍ដើម្បីការពារមូលដ្ឋានទ័ព Hmeymim ។
សារព័ត៌មាន Sputnik បានស្រង់សម្តីអ្នកនាំពាក្យក្រសួងការពារជាតិរុស្ស៊ី Ifor Konashenkov ថា៖ «ប្រព័ន្ធការពាររបស់រុស្ស៊ីនៅសាធារណរដ្ឋអារ៉ាប់ស៊ីរី គឺមានគោលដៅការពារមូលដ្ឋានទ័ពនិងរាល់សម្ភារៈទ័ព។ ប្រព័ន្ធ S-400, ប្រព័ន្ធ S-300 និង ប្រព័ន្ធ Pantsir-S1 អាចការពារមូលដ្ឋានទ័ពរុស្ស៊ីពីលើអាកាសបានយ៉ាងប្រសើរ»។
អ្នកនាំពាក្យខាងលើបានបន្តថា ប្រព័ន្ធការពារមីស៊ីលមួយក្រុមត្រូវបានពង្រាយទៅការពារសុវត្ថិភាពកងទ័ពរុស្ស៊ីនិងយន្តហោះចម្បាំងនៅមូលដ្ឋានទ័ពអាកាស Hmeymim ហើយមួយក្រុមទៀតនៅឈរជើងការពារមូលដ្ឋានផ្ទុកភ័ស្តុភារកងទ័ពជើងទឹករុស្ស៊ីនៅ Tartus។
តាមពិតទៅប្រព័ន្ធការពារអាកាសនេះត្រូវបានដាក់ឲ្យប្រុងជើងការនៅក្រោយពេលដែលប្រធានាធិបតីអាមេរិក ដូណាល់ ត្រាំ បញ្ជាឲ្យគេបាញ់ផ្លោងមីស៊ីល ៥៩គ្រាប់លើមូលដ្ឋានទ័ពអាកាសស៊ីរី។ ការវាយប្រហារនេះជាការឆ្លើយតបការចោទប្រកាន់រដ្ឋាភិបាលលោក បាសា អាល់អាសាដ ថាបានប្រើប្រាស់អាវុធគីមីនៅខេត្ត Idlib។ ក្រោយការវាយប្រហារនេះរុស្ស៊ីក៏បានសម្រេចព្យួរកិច្ចព្រមព្រៀងទំនាក់ទំនងផ្លូវអាកាសរវាងកងទ័ពប្រទេសទាំងពីរដែលបញ្ចៀសការប៉ះទង្គិចគ្នាជាយថហេតុពេលបំពេញប្រតិបត្តិការ។
ត្រឡប់មកវិញប្រព័ន្ធការពារដែនអាកាស S-400 រុស្ស៊ីត្រូវបានបញ្ជូនទៅកាន់មូលដ្ឋានទ័ពអាកសស៊ីរី Hmeymim ក្រោយពេលដែលកងទ័ពអាកាសតួកគីបាញ់ទម្លាក់យន្តហោះខ្លួន Su-24 មួយគ្រឿងនៅខែវិច្ឆិកាឆ្នាំ ២០១៥៕
Tag:
ស៊ីរី
រុស្ស៊ី
ដូណាល់ ត្រាំ
© រក្សាសិទ្ធិដោយ thmeythmey.com