អន្តរជាតិ
អាមេរិក នឹងបញ្ជូននាវាដឹកយន្តហោះទៅកាន់ឧបទ្វីបកូរ៉េ 09, Apr 2017 , 3:59 pm
កងនាវាប្រយុទ្ធ Carl Vinson (រូបភាព Twitter @US Pacific Command)
× អាមេរិក នឹងបញ្ជូននាវាមួយក្រុម ដឹកនាំដោយនាវាដឹកយន្តហោះ USS Carl Vinson ទៅកាន់ឧបទ្វីបកូរ៉េ ខណៈស្ថានការណ៍នៅតំបន់នោះកើនកម្ដៅខ្លាំងដោយសារសកម្មភាពបំពានរបស់កូរ៉េខាងជើង។ ការបញ្ជូននាវាមួយក្រុមនេះ ក៏ជាការបង្ហាញពីការប្ដេជ្ញាចិត្តរបស់អាមេរិកក្នុងជួយការពារសម្ព័ន្ធមិត្តរបស់ខ្លួនពីការវាយប្រហារណាមួយពីសំណាក់កូរ៉េខាងជើងដែរ ហើយវាក៏នឹងធ្វើឡើងក្រោយជំនួបរវាងប្រធានាធិបតី ដូណាល់ ត្រាំ និងប្រធានាធិបតី ស៊ី ជីនភីង ផងដែរ។
ទីបញ្ជាការកងទ័ពអាមេរិកប្រចាំប៉ាស៊ីហ្វិកប្រកាសថា នាវាប្រយុទ្ធមួយក្រុម នឹងត្រូវបញ្ជូនទៅកាន់តំបន់សមុទ្រប៉ាស៊ីហ្វិកខាងលិច ក្បែរឧបទ្វីបកូរ៉េ។ គោលដៅនៃការបញ្ជូននាវាមួយក្រុមនេះ គឺដើម្បីការពារសម្ព័ន្ធមិត្តរបស់អាមេរិកនៅក្នុងតំបន់នោះ ខណៈការគំរាមកំហែងពីសំណាក់មីស៊ីលកូរ៉េខាងជើង កើនឡើងខ្លាំងគួរឲ្យកត់សម្គាល់។ កូរ៉េខាងជើង បានសាកល្បងមីស៊ីលញឹកញាប់បំផុតនៅរយៈពេលចុងក្រោយ ដែលនេះតម្រូវឲ្យរដ្ឋបាលលោក ដូណាល់ ត្រាំ ចាត់វិធានការណ៍បន្ទាន់។
កម្លាំងទ័ពជើងទឹកដែលត្រូវបញ្ជូនទៅនេះ គឺជាក្រុមនាវាប្រយុទ្ធ Carl Vinson ដែលរួមមាននាវាដឹកយន្តហោះដ៏មានឥទ្ធិពល Carl Vinson និងនាវាចម្បាំងជាច្រើនគ្រឿងទៀត។ នាវាមួយក្រុមនេះ នឹងចាកចេញពីសិង្ហបុរី រួចធ្វើដំណើរតម្រង់ទៅកាន់មហាសមុទ្រសមុទ្រប៉ាស៊ីហ្វិកខាងលិច ដែលនៅមិនឆ្ងាយប៉ុន្មានពីឧបទ្វីបកូរ៉េឡើយ។ ដោយសំដៅដល់សកម្មភាពព្រហើនរបស់កូរ៉េខាងជើង មន្ត្រីអាមេរិកម្នាក់ប្រាប់ Reuters ថា ការបង្កើនវត្តមានយោធានៅទីនោះ ជារឿងចាំបាច់។
ស្ថានភាពនៅឧបទ្វីបកូរ៉េ កំពុងស្ថិតលើផ្លូវធ្វើដំណើរទៅរកការប្រឈមមុខគ្នាកាន់តែខ្លាំង។ គ្រាន់តែរយៈពេលប៉ុន្មានខែនៅដើមឆ្នាំ២០១៧ កូរ៉េខាងជើងបាញ់សាកល្បងមីស៊ីលជាច្រើនលើក ដើម្បីបំភ័យកូរ៉េខាងត្បូង និងជប៉ុន ខណៈអាមេរិក កូរ៉េខាងត្បូង និងជប៉ុនវិញ ក៏បានធ្វើសមយុទ្ធកំញើញវិញដែរ។ ជាមួយគ្នានេះ ក្រុងព្យុងយ៉ាង ទំនងជាសាកល្បងមីស៊ីលបន្ថែមទៀតនៅក្នុងខែមេសានេះ ដើម្បីអបអរថ្ងៃកំណើតស្ថាបនិកកូរ៉េខាងជើង គីម អ៊ីលស៊ុង។
ជាមួយការគំរាមទាំងនេះ បណ្ដាទីប្រឹក្សាសន្តិសុខជាតិរបស់លោក ត្រាំ ក៏បានលើកឡើងពីវិធានការណ៍មួយចំនួនដើម្បីបង្ខំឲ្យកូរ៉េខាងជើងបញ្ឈប់មហិច្ឆតានុយក្លេអ៊ែររបស់ខ្លួន។ អាមេរិក អាចបន្តដាក់ទណ្ឌកម្មលើកូរ៉េខាងជើង និងស្នើឲ្យចិនជួយដាក់សម្ពាធកាន់ខ្លាំងលើរដ្ឋកុម្មុយនីស្តក្រីក្រមួយនេះ។ ចំណែកចំណាត់ការយោធា ក៏មិនត្រូវបានបោះបង់ដែរ ប៉ុន្តែរដ្ឋបាលលោក ត្រាំ ចង់បន្តទណ្ឌកម្មសេដ្ឋកិច្ចសិន មុននឹងអនុវត្តចំណាត់ការយោធា ដែលជាជម្រើសចុងក្រោយ។
អំឡុងពេលសប្ដាហ៍នេះ លោក ត្រាំ ក៏បានជួបប្រធានាធិបតីចិន ស៊ី ជីនភីង នៅ Mar-a-Lago ហើយប្រធានបទកូរ៉េខាងជើង ក៏ត្រូវលើកឡើងដែរ។ ក្នុងជំនួបទល់មុខលើកទីមួយ ប្រធានាធិបតីអាមេរិក ក៏បន្តអំពាវនាវឲ្យចិនបញ្ចេញសកម្មភាពបន្ថែមទៀតលើករណីកូរ៉េខាងជើង ព្រោះចិនមានឥទ្ធិពលខ្លាំងលើរដ្ឋក្បាលរឹងមួយនេះ។ ច្បាស់ណាស់ថា បើចិនជួយអស់ពីលទ្ធភាពមែន ស្ថានការណ៍នៅឧបទ្វីបកូរ៉េនឹងធូរស្រាលមិនខាន៕
Tag:
អាមេរិក
ឧបទ្វីបកូរ៉េ
© រក្សាសិទ្ធិដោយ thmeythmey.com