អន្តរជាតិ
ក្រោយអាមេរិកបាញ់មីស៊ីល៥៩គ្រាប់ មេទ័ពរុស្ស៊ីនិងអ៊ីរ៉ង់ ប្រកាសបន្តគាំទ្រលោក អាសាដ 09, Apr 2017 , 10:00 pm
× ភ្លាមៗក្រោយអាមេរិកបាញ់មីស៊ីលជិត៦០គ្រាប់ចូលទឹកដីស៊ីរី សម្ព័ន្ធមិត្តរបបលោក Bashar al-Assad គឺរុស្ស៊ី និងអ៊ីរ៉ង់ ក៏ចេញមុខរិះគន់អាមេរិក ដែលបំពានអធិបតេយ្យស៊ីរី។ ចំណែខាងយោធាវិញ ប្រមុខកងទ័ពរុស្ស៊ី និងអ៊ីរ៉ង់ ក៏សន្យារួមគ្នាក្នុងជួយគាំទ្ររបបដឹកនាំស៊ីរីលើផ្នែកយោធា ដើម្បីប្រឆាំងក្រុមភេរវជនឲ្យទាល់តែអស់ពីទឹកដីស៊ីរី។
មេបញ្ជាការកងទ័ពរុស្ស៊ី និងអ៊ីរ៉ង់ ប្រកាសបន្តប្រតិបត្តិការបោសសម្អាតក្រុមភេរវកម្ម និងអ្នកនៅពីក្រោយក្រុមនេះនៅស៊ីរីរហូតតែទទួលបានជោគជ័យ និងគាំទ្ររដ្ឋាភិបាលប្រធានាធិបតី Bashar al-Assad តទៅទៀត។ ប្រមុខកងទ័ពរុស្ស៊ី និងអ៊ីរ៉ង់ សន្យាដូចនេះ ក្រោយកងទ័ពអាមេរិកបាញ់មីស៊ីល Tomahawk ចំនួន៥៩គ្រាប់លើដាក់មូលដ្ឋានអាកាស Shayrat ដើម្បីឆ្លើយតបនឹងងការវាយប្រហារអាវុធគីមី ទោះជាស៊ីរីបដិសេធរួចក្ដី។
ក្នុងកិច្ចសន្ទានាតាមទូរសព្ទនៅថ្ងៃទី៨ ខែមេសា ប្រមុខកងទ័ពរុស្ស៊ី Valery Gerasimov និងមេបញ្ជាការទ័ពអ៊ីរ៉ង់ Mohammad Bagheri ក៏បានថ្កោលទោសប្រតិបត្តិការផ្លូវអាកាសរបស់អាមេរិកលើមូលដ្ឋានទ័ពស៊ីរី ដែលជាទង្វើគឃ្លើនប្រឆាំងរដ្ឋអធិបតេយ្យមួយ។ បើតាមសារព័ត៌មាន Al Jazeera ដែលស្រង់ប្រភពពីសារព័ត៌មានអ៊ីរ៉ង់ មេទ័ពទាំង២ប្រទេស ថែមទាំងចោទការបាញ់មីស៊ីលរបស់អាមេរិក ជាការបន្ទុចបង្អាក់ដំណើរឈានទៅរកជោគជ័យរបស់កងទ័ពស៊ីរី និងសម្ព័ន្ធមិត្ត ហើយបែរជាជួយពង្រឹងកម្លាំងក្រុមភេរវកម្មទៅវិញ។
ប្រមុខកងទ័ពទាំង២ ក៏ប្រកាសបន្តកិច្ចសហប្រតិបត្តិការយោធា ដើម្បីជួយគាំទ្រប្រធានាធិបតី Assad រហូតដល់ពេលក្រុមជ្រុលនិយមរដ្ឋឥស្លាម និងពួកដែលនៅគាំទ្រក្រុមនេះបរាជ័យទាំងស្រុង។ រដ្ឋាភិបាលក្រុងមូស្គូ និងតេហេរ៉ង់ បានចោទថាក្រុមឧទ្ទាមប្រឆាំងរបបបលោក Assad ជាក្រុមជ្រុលនិយមរដ្ឋឥស្លាមទាំងអស់ ហើយបានវាយប្រហារលើក្រុមឧទ្ទាមទាំងនោះ ដល់កម្រិតដែលមិនអាចតដៃជាមួយទាហានរដ្ឋាភិបាលស៊ីរីបាន។
ងាកមកប្រតិបត្តិការដែនអាកាសរបស់អាមេរិក រដ្ឋបាលលោក ដូណាល់ ត្រាំ ចោទរបបលោក Assad ថាបាននៅពីក្រោយការវាយប្រហារអាវុធគីមីលើប្រជាជនខ្លួនឯង។ ប៉ុន្តែ ទាំងរុស្ស៊ី ទាំងអ៊ីរ៉ង់ សុទ្ធតែចេញមកជួយការពារលោក Assad ហើយថែមទាំងអះអាងថា រដ្ឋាភិបាលស៊ីរីមិនបានប្រព្រឹត្តកំហុសដ៏ធ្ងន់ធ្ងរនេះឡើយ។ ការវាយប្រហាររដោយអាវុធគីមីកាលពីថ្ងៃទី៤ ខែមេសា បណ្ដាលឲ្យមនុស្សយ៉ាងតិច៨០នាក់បាត់បង់ជីវិត ក្នុងនោះក៏មានកុមារផងដែរ។
លើសពីនោះ ទាំងរុស្ស៊ី និងអ៊ីរ៉ង់ ក៏ស្នើឲ្យមានការបើកស៊ើបអង្កេតលើករណីវាយប្រហារអាវុធគីមីនេះដែរ។ ប្រធានាធិបតីអ៊ីរ៉ង់ Hassan Rouhani ដែលបានរិះគន់លោក ត្រាំ លើការបាញ់មីស៊ីល ក៏ស្នើឲ្យរកការពិតលើករណីវាយប្រហារអាវុធគីមី ដើម្បីរកអ្នកទទួលខុសត្រូវ ខណៈភាគីនានាបន្តចោទប្រកាន់គ្នាទៅវិញទៅមក។ អាមេរិក និងសម្ព័ន្ធមិត្តរបស់ខ្លួន ចោទលោក Assad ថានៅពីក្រោយទង្វើអមនុស្សធម៌នេះ តែស៊ីរី នៅឆ្លើយមិនដឹងដដែល៕
© រក្សាសិទ្ធិដោយ thmeythmey.com